मुद्रास्फीति दर ७.५ प्रतिशत राख्ने राष्ट्र बैंकको लक्ष्य

३० असार, २०७३ / राष्ट्र बैंकले आगामी बर्ष उपभोक्ता  मुद्रास्फीति  दरलाई  ७ दशमलव ५  प्रतिशत राख्ने लक्ष्य लिएको छ ।

आज मौद्रिक नीति सार्वजनिक गर्दै केन्द्रीय बैंकले आपूर्तीजन्य कारणले मुद्रस्फीतीमा चाप पर्न नदिन संवेदनशील वस्तुको स्टक कायम राख्ने, त्यस्ता वस्तुको आयात बढाउने तथा कालोबजारीमाथि कारवाही भए लक्षित मुद्रास्फीति कायम हुने जनाएको छ ।  मौद्रिक तथा बाह्य क्षेत्र व्यवस्थापन मार्फत् कम्तीमा ८ महिनाको वस्तु तथा सेवाको आयात धान्न पर्याप्त हुने विदेशी विनिमय सञ्चिति कायम राखिने नीतिमा उल्लेख छ ।

 नेपाल  सरकारको  बजेट  वक्तव्यमा  उल्लिखित  ६ दशमलव ५  प्रतिशतको  आर्थिक  वृद्धि  हासिल  गर्न  सहयोग  पुग्ने  गरी आवश्यक तरलताको व्यवस्थापन गरिने केन्द्रीय बैंकले जनाएको छ ।

मौद्रिक नीति सार्वजनिक गर्दै गभर्नर चिरञ्जिबी नेपालले आगामी वर्षको मौद्रिक नीतिमा कर्जालाई उत्पादनशील क्षत्रेमा केन्द्रीत गर्ने बताउनुभयो । नीति अनुसार शेयर लगानी तथा रियल स्टेटको कर्जामा कडाइ गरिएको छ । शेयरको  धितोमा  प्रवाह  हुने  मार्जिन  प्रकृतिको  कर्जाको  सुरक्षण  वापत  सेयरको  मूल्याङ्कन  गर्दा  पछिल्लो  १ सय ८० दिनको अन्तिम मूल्यको औसत मूल्य वा शेयरको प्रचलित बजार मूल्यमध्ये जुन कम हुन्छ सोको बढीमा ५० प्रतिशत रकमसम्म मात्र कर्जा प्रवाह गर्न सकिने व्यवस्था नीतिमा गरिएको छ । रियल  स्टेट  कर्जा  र  त्यसको  सुरक्षणबीचको  अनुपात हालको  ६०  प्रतिशतबाट बढीमा ५० प्रतिशत  कायम  गर्नुपर्ने  व्यवस्था  गरिएको  छ  ।
 आवासीय  रियल  स्टेट  कर्जाको हकमा  यस्तो  अनुपात  ६० प्रतिशतसम्म रहने व्यवस्था गरिएको छ । यसैगरी रााष्ट्रिय  स्तरको  थोक  कर्जा  प्रदान  गर्ने  लघुवित्त  संस्थाहरुले  २०७५  असार  मसान्तसम्म  न्यूनतम चुक्ता  पूँजी ६० करोड रुपैयाँ कायम गर्नुपर्ने व्यवस्था गरिएको छ ।