एभनिर एफसी जय हुमागाई स्मृति गोल्डकपको सेमिफाईनलमा

उत्तम रिजाल, झापा।  क्यामरुनको एभनिर एफसी झापाको दमकमा जारी प्रथम जय हुमागाई स्मृति गोल्डकप फुट्बल प्रतियोगिताको सेमिफाईनलमा प्रबेश गरेको छ । उसले बिवाईसी बेलडाँगीलाई पाँच शुन्यले पराजित गर्दै सेमिफाईनल प्रबेश गरेको हो । खेलको शुरुवातदेखि नै आक्रामक रुपमा प्रस्तुत भएको एभनिरले दोश्रो मिनेटमै अग्रता लिएको थियो ।

उसका गिनीले गोल गर्दै खाता खोलेका थिए । त्यसपछि टिम्बा टिम्बाले १७ औं मिनेटमा गोल गर्दै खेलमा एभनिरलाई दुई शुन्यको अग्रता दिलाए । टिम्बाले हेड मार्फत दर्शनीय गोल गरेका थिए । त्यसपछि झनै आक्राम देखिएको उसले २७ औं मिनेटमा स्टेफनको गोलबाट अग्रता तेब्बर बनाएको थियो ।

उता बिवाईसीका खमिर गिल्शन कन्दङ्गवा १३ औ मिनेटमा गोल गर्न चुके भने राहुल राईले ३१ औं मिनेटमा वान भर्सेस वानमा पनि गोल गर्न नसक्दा पहिलो हाफमा बिवाईसी तीन शुन्यले पछि परेको थियो । पहिलो हाफमा तीन शुन्यले पछि परेको बिवाईसीले दोश्रो हाफमा केहि सुधारिएको खेल प्रदर्शन गरेपनि एभनिरका सोङ्गलाई रोक्न सकेन् ।

सोङ्गले दोश्रो हाफको ३६ औं र ३७ औं मिनेटमा गोल गर्दै एभनिर एफसीलाई पाँच शुन्यको जित दिलाए । नेपालका चर्चित खेलाडीहरु देवेन्द्र तामाङ्ग,सुनिल खड्का, पुजन उपरकोटी, रुपेश केसी, अशोक खबास, बर्तमान राई एन्जल गुरुङ्ग लगायतका खेलाडी मैदानमा उत्रिएपनि बिवाईसी एभनिर विरुद्ध निरीह देखिएको थियो ।

जितसँगै एभनिरले सिरहाको सल्हेस युवा क्लबसँगको भेट पक्का गरेको छ । खेलको म्यान अफ द म्याच विजयी टिमका जर्सी नम्बर २२ का स्टेफन भए । उनले नगद पाँच हजार हात पारे । शनिवार अन्तिम चार प्रबेशका लागि युकेएफसी दार्जेलिङ्ग र उपाधि दाबेदार बिवाईएससी मिनिसोटा अमेरिका आमनेसामने हुने छन् ।

प्रतियोगिताको विजेताले नगद ५ लाख हात पार्नेछ भने उपविजेताले नगद ३ लाख हात पार्नेछ । त्यस्तै प्रतियोगिताको सर्वोत्कृष्ट खेलाडीले नगद २५ हजार र विधागततर्फका उत्कृष्ट खेलाडीहरुले जनही ७ हजार प्राप्त गर्ने खेल संयोजक तारा कालिकोटेले जानकारी दिनुभयो । प्रतियोगितामा नेपाल, भारत, अमेरिका र क्यामरुनका गरी ८ टिमको सहभागिता रहेको छ । प्रतियोगिताको आयोजना जय हुमागाई मेमोरियल ट्रष्टले गरेको हो ।

सल्हेस युवा क्लब सिरहा प्रथम जय हुमागाई गोल्डकपको सेमिफाइनलमा

 

उत्तम रिजाल,झापा।  सल्हेस युवा क्लब सिरहा झापाको दमक-३ स्माथित भुटानी शरणार्थी शिविरमा जारी प्रथम जय हुमागाई स्मृति गोल्डकप फुटबल प्रतियोगिताको सेमिफाइनलमा प्रबेश गरेको छ ।

आज सम्पन्न उद्घाटन खेलमा झापाको विर्तामोड युनाइटेड फुटबल क्लबलाई टाईब्रेकरमा ४-२ ले पराजित गर्दै सल्हेसले अन्तिम चारमा आफ्नो स्थान सुरक्षित गरेको हो ।

निर्धारित समय सम्म गोल रहित बराबरी भएपछि खेल टाईब्रेकर सम्म पुगेको थियो । टाईब्रेकरमा सल्हेसका लगातार चार पेनाल्टी गोलमा परिणत भएको थियो भने विर्तामोडका शुरुवाति दुई पेनाल्टी बाहिरिएको थियो । सल्हेसका फोडे फोफोना, रितिक खड्का, सिमान्त थापा र अजय मार्टिनले गोल गरेका थिए ।

पराजित विर्तामोडकातर्फबाट बिक्रम तामाङ र पदम भट्टराईले मात्र गोल गरेका थिए। खेलको म्यान अफ द म्याच विजयी टिमका जर्सी नम्बर २ का सिमान्त थापा भए। उनले नगद ५ हजार प्राप्त गरे । भोलि अन्तिम चार प्रबेशका लागि भुटानी शरणार्थी शिविर पथरी र शान्तिनगर एफसी सुनसरी आमने-सामने हुनेछन् । प्रतियोगिताको विजेताले नगद ५ लाख र उप-विजेताले नगद ३ लाख प्राप्त गर्नेछन् ।

त्यस्तै प्रतियोगिताको सर्वोत्कृष्ट खेलाडीले नगद २५ हजार हात पार्दा विधागततर्फका उत्कृष्ट खेलाडीले नगद ७ हजार हात पार्ने खेल संयोजक तारा कालिकोटेले जानकारी दिनुभयो । प्रतियोगितामा नेपाल, भारत, क्यामरुन र अमेरिकाका गरि ८ टिमको सहभागिता रहेेको यस प्रतियोगिताको झापाका सहायक प्रमुख जिल्ला अधिकारी रुद्रप्रसाद न्यौपानेले उद्घाटन गर्नु भएको थियोे ।

सो क्रममा स्वर्गीय जय नारायण हुमागाईको प्रतिमा स्तभको प्रमुख अतिथि न्यौपानेले अनाबरण पनि गर्नु भएको थियोे । सो खेल मैदान करिब ३५  लाख लगानीमामा स्वर्गीय हुमागाईका सुपुत्र शिव हुमागाई र उनको परिवारले निर्माण गरेको हो । त्यहाका दुई तीन वटा रुख हटाईएमा हुमागाई परिवारले अन्तरास्ट्रिय स्तरको प्याफिटसहितको रंगशाला बनाईदिने  पनि बताएका छन् ।

केन्या विरुद्धको पाँच म्याचको श्रृंखला नेपाललाई

केन्या विरुद्धको पाँच म्याचको श्रृंखला नेपालले तीन दुईले जितेको छ ।  पाँचौ तथा अन्तिम टि–२० मा घरेलु टोली केन्यालाई ३१ रनले हराउँदै नेपालले सिरिज हात पारेको हो । ओपनर तथा पूर्व कप्तान ज्ञानेन्द्र मल्लको अर्धशतक र रोहित पौडेलको आक्रामक ब्याटिङमा नेपालले केन्यालाई ३१ रनले पराजित गरेको थियो ।

जितको लागि १ सय ७६ रनको विशाल लक्ष्य लिएर ब्याटिङ्ग गरेको घरेलु टोलीले ७ विकेट गुमाउँदै १ सय ४४ रन बनायो । केन्याका नेहेम्याह ओधियाम्बोले २२ बलमा ४ चौका र १ छक्कासहित सर्वाधिक ३७ रन बनाए ।

कप्तान शेम न्गोचे १८ बलमा ३ चौका र २ छक्कासहित ३३ रनमा अविजित रहे । नेल्सन ५ बलमा १ चौका र १ छक्कासहित १३ रनमा अविजित रहे । विकेटकिपर इफरान करिम २८ र कोलिन्स ओबुयाले २३ रन बनाए । नेपालका सन्दीप लामिछाने र बसिर अहमदले समान दुई दुई विकेट लिए । दीपेन्द्रसिंह ऐरी, आदिल अन्सारी र करण केसीले एक एक विकेट लिए ।

त्यसअघि नैरोबीमा रहेको जिमखाना क्लब ग्राउन्डमा टस जितेर पहिला ब्याटिङ थालेको नेपालले निर्धारित २० ओभरमा ७ विकेट गुमाउँदै १ सय ७५ रन बनाएको थियो । नेपालका ज्ञानेन्द्र मल्ल ४४ बलमा ५ चौका र २ छक्कासहित सर्वाधिक ५९ रनमा आउट भए । ज्ञानेन्द्रले ४१ बलमा आफ्नो टि२० आई करिअरको दोस्रो अर्धशतक प्रहार गरे ।

रोहित पौडेलले २५ बलमा ७ चौकासहित ४७ रनमा आउट भए । ओपनर अर्जुन साउद २१ बलमा ४ चौका र १ छक्कासहित २९ रनमा आउट भए । पहिलो विकेटका लागि अर्जुन साउद र ज्ञानेन्द्र मल्लले ८ ओभरमा ६५ रनको साझेदारी गर्दै राम्रो सुरुवात दिलाएका थिए ।

अर्जुन शेम न्गोचेको आठौं ओभरको अन्तिम बलमा विकेटकिपर इफरान करिमबाट स्टम्पिङ आउट भए । नियमित ओपनर पवन सरार्फको स्थानमा नेपालले आज ज्ञानेन्द्रलाई ओपनिङ गराएको थियो । तेस्रो नम्बरमा आएका दीपेन्द्रसिंह ऐरी १७ बलमा ३ चौकासहित २२ रनमा आउट भए । पवन १ रन, विवेक यादव २ र आदिल अन्सारी ४ रनमा आउट भए ।

केन्याका स्पिनर विरज पटेल, शेम न्गोचे र नेहेम्याह ओधियाम्बो दुई दुई विकेट लिए । नेपाल पहिलो खेलमा ५ विकेटले विजयी हुँदा दोस्रो खेलमा १८ रनले पराजित भएको थियो । तेस्रो खेलमा ४ विकेटले विजयी हुँदा चौथो खेलमा ७ रनले स्तब्ध भएको थियो । अव तीन एकदिवसिय अभ्यास खेलको सिरिज हुनेछ । पहिलो खेल शुक्रबार हुनेछ ।

युएईको फ्रेन्चाइज क्रिकेट प्रतियोगितामा शीर्ष खेलाडीलाई साढे चार लाख डलर पारिश्रमिक

 युएईको फ्रेन्चाइज क्रिकेट प्रतियोगिता इन्टरनेसनल लिग टी-२० (आईएल टी-२०) ले विश्वको शीर्ष खेलाडीलाई साढे चार लाख डलर पारिश्रमिक दिने प्रस्ताव गरेको छ ।

पहिलो संस्करणका लागि आईएल टी-२० ले विश्वका शीर्ष खेलाडीलाई एक सिजनमा ४ लाख ५० हजार अमेरिकी डलरसम्म पारिश्रमिक दिने तयारी गरेकोे छ ।

जुन पारिश्रमिक भारतको इन्डियन प्रिमियर लिग (आइपीएल) पछिकै सर्वाधिक बढी हो । आईएल टी-२० ले प्रतियोगितालाई आकर्षक र विश्व क्रिकेटको ध्यान तान्न खेलाडीलाई मोटो रकमको पारिश्रमिक दिने योजना बनाएको हो ।

मोटो रकमको कारण विश्वका ठूला खेलाडी प्रतियोगिता खेल्न आउने अनुमान गरिएको छ । अष्ट्रेलियाका पूर्व कप्तान डेभिड वार्नर अष्ट्रेलियाको बिग ब्यास लिग छाडेर आईएल टी-२० लिग खेल्न आउने बताइएको छ ।

प्रतियोगिता आगामी जनवरी ६ देखि फेब्रुवरी १२ सम्म आयोजना हुनेछ । प्रतियोगितालाई इमिरेट्स क्रिकेट बोर्ड (इसिबी) ले स्वीकृति दिइसकेको छ । प्रतियोगितामा ६ टोलीले प्रतिस्पर्धा गर्नेछन् ।

प्रतियोगितामा कुल ३४ खेल हुनेछ । प्रतियोगितामा सहभागी टोलीले १८ खेलाडी टिममा राख्न पाउनेछन् । जसमा १२ विदेशी खेलाडी राख्न पाइनेछ । यस्तै हरेक टोलीले तीन जना यूएइका खेलाडी, दुई एसोसिएट राष्ट्रका र एक यूएई यू-२३ टिमका खेलाडी अनिवार्य गरिएको छ ।

प्लेईङ–११ मा भने कम्तिमा एक जना युएई र एसोसियट राष्ट्रका खेलाडी हुनु पर्नेछ । प्रतियोगितामा तीन भारतीय क्लबहरुको सहभागिता रहनेछ ।

विर्तामोडलाई पाखा लगाउँदै बेलबारी फाईनलमा

विर्तामोड युनाईटेडलाई पाखा लगाउँदै मोरङ्गको नर्थ राधानगर फुट्बल क्लब झापाको दमकमा जारी दुम्सेली नक आउट फुट्बल प्रतियोगिताको फाईनल प्रबेश गरेको छ । उसले विर्तामोड माथी एक शुन्यको जीत निकालेको हो ।

निक्कै नै प्रतिस्पर्धात्मक रहेको खेलमा विजयी टिमका लागि म्यान अफ दि म्याच विवेक पौडेलले निर्णायक गोल गरे । जर्सी नम्बर ७ का पौडेलले दोश्रो हाफको १७ औं मिनेटमा गोल गर्दै टिमलाई अग्रता दिलाएका थिए । त्यसपछि एक शुन्यले पछि परेको विर्तामोडले खेलमा उत्कृष्ट प्रदर्शन गरेपनि गोल गर्न नसक्दा प्रतियोगिताको सेमिफाईनलबाटै बाहिरीएको छ । भोली अन्तिम सेमिफाईनलमा आयोजक चुलाचुली फुट्बल क्लब र फुलबारी स्पोर्टिङ्ग क्लब धरमपुर आमने–सामने हुने खेल संयोजक अनिस बस्नेतले जानकारी दिनुभयो । दमक–३ स्थित चुलाचुली खेल मैदानमा जारी सो प्रतियोगिताको विजेताले नगद २५ हजार र उप–विजेताले नगद १५ हजारसँगै ट्रफी हात पार्ने छन् । प्रतियोगितामा झापा र मोरङ्गका गरी १२ टिमको सहभागिता रहेको छ ।

वाईएफसी पथरीलाई एक शुन्यले पाखा लगाउँदै आयोजक सेमिफाईनलमा

 वाईएफसी पथरीलाई एक शुन्यले पाखा लगाउँदै आयोजक चुलाचुली फुट्बल क्लब झापाको दमकमा जारी दुम्सेली नक आउट फुट्बल प्रतियोगिताको सेमिफाईनल प्रबेश गरेको छ । 

विजयी टिमका लागि म्यान अफ दि म्याच मल्दिनो आङ्गथुपोले निर्णायक गोल गरे । उनले पहिलो हाफको ५ औं मिनेटमा पेनाल्टि मार्फत गरेको गोल नै अयोजकलाई सेमिफाईनल पुग्न पर्याप्त भयो ।

खेलको शुरुवातमै एक शुन्यले पछि परेको वाईएफसीले गोल गर्ने थुप्रै अबसर पाएपनि सदुपयोग गर्न नसक्दा प्रतियोगितामा उत्कृष्ट खेल प्रदर्शन गरेपनि क्वाटरफाईनलबाटै घर फर्किएको छ ।

जितसँगै आयोजकले अब अन्तिम दुई प्रबेशका लागि फुलबारी स्पोर्टिङ्ग क्लब धरमपुरसँग प्रतिस्पर्धा गर्नेछ । भोली प्रतियोगिताको पहिलो सेमिफाईनलमा विर्तामोड युनाईटेड झापा र बेलबारी फुट्बल क्लब मोरङ्ग आमने–सामने हुने खेल संयोजक अनिस बस्नेतले जानकारी दिनुभयो ।

दमक–३ स्थित चुलाचुली खेल मैदानमा जारी सो प्रतियोगिताको विजेताले नगद २५ हजार र उप–विजेताले नगद १५ हजारसँगै ट्रफी हात पार्ने छन् ।

रियललाई पाखा लगाउँदै चात्यासा क्वाटर फाईनलमा

 

झापा, ४ पुस/  रियल स्टार फुट्बल क्लबलाई टाइब्रेकरमा ४–३ ले पाखा लगाउँदै चात्यासा फुट्बल क्लब झापाको दमकमा जारी दुम्सेली नक आउट फुट्बल प्रतियोगिताको क्वाटर फाईनलमा प्रबेश गरेको छ ।

निर्धारीत समय सम्म १–१ को बराबरी भएपछि भएको टाईब्रेकरमा चात्यासाले बाजी मारेको हो । उसका लागी सन्देश केसी, श्याम श्रेष्ठ, राहुल लिम्बु र प्रविन राईले गोल गरेका थिए ।

उता पराजित रियलका तर्फबाट अबिन लिम्बु, बिकास लिम्बु र बिकास माझीले गोल गरे । उसका रोशन धिमालको प्रहार भने चात्यासाका गोलरक्षक योगेश धिमालले बिफल तुल्याएसँगै चात्यासाले अन्तिम आठमा आफ्नो स्थान पक्का गरेको हो ।

यसअघि खेलको ३२ औं मिनेटमा गोल गर्दै प्रबिन राईले चात्यासालाई अग्रता दिलाएका थिए भने किस्मत लिम्बुले दोश्रो हाफको १८ औं मिनेटमा गोल गरेपछि निर्धारित समय सम्म खेल बराबरीमा सकिएको थियो ।

खेलको म्यान अफ दि म्याच विजयी टिमका गोलरक्षक योगेश धिमाल भए । चात्यासाले अब अन्तिम चार प्रबेशका लागी विर्तामोड युनाईटेडसँग बुधबार प्रतिस्पर्धा गर्नेछ ।

भोली भुट्निज युथ क्लब र वाईएफसी पथरीबीच खेल हुने खेल संयोजक अनिस बस्नेतले जानकारी दिनुभयो । प्रतियोगिताको विजेताले नगद २५ हजार हात पार्ने छ भने उप–विजेताले नगद १५ हजार प्राप्त गर्नेछ । प्रतियोगिताको आयोजना चुलाचुली फुट्बल क्लब दुम्सेले गरेको हो ।

पथरीलाई पराजित गर्दै आयोजक फाइनलमा, उपाधिका लागि राष्ट्रिय जागृतिसँग भिड्ने

उत्तम रिजाल, झापा – पथरी फुटबल क्लब मोरङलाई टाइब्रेकरमा ४–३ ले पराजित गर्दै आयोजक गुहेश्वरी युवा क्लब झापाको कमल गाउँपालिकामा जारी स्वर्गीय विशाल खड्का स्मृति कप फुटबल प्रतियोगिताको फाइनलमा प्रवेश गरेको छ।

निर्धारित समयसम्म २–२ को बराबरी भएपछि भएको टाइब्रेकरमा आयोजकका जर्सी नम्बर–१५ का निशान लिम्बु, जर्सी नम्बर–२३ का अशोक खबास, जर्सी नम्बर–१० का तीर्थ बस्नेत र जर्सी नम्बर–४ का निरज बस्नेतले गोल गरेका थिए।

आयोजकका जर्सी नम्बर–३ का सुरेन खबासको प्रहार पथरीका गोल रक्षक अर्जुन बस्नेतले विफल तुल्याएका थिए। पथरीका तर्फबाट जर्सी नम्बर–१७ का दिपक राई, जर्सी नम्बर–११ का साइमन लिम्बु र जर्सी नम्बर–३ का कवि राईले मात्र गोल गर्न सके।

कप्तान मीन धिमालको प्रहार आयोजकका गोल रक्षक किशोर गिरीले विफल बनाएका थिए। त्यस्तै, जर्सी नम्बर–४ का सुवास तामाङको प्रहार क्रस बारमा लागेर बाहिरिएको थियो।

यद्यपि खेलमा अग्रता पथरीले पहिलो हाफको ३२औं मिनेटमा साइमन लिम्बुको गोलबाट लिएको थियो। उनले पेनाल्टी मार्फत गोल गरेका थिए। साइमनले नै पहिलो हाफकै इन्जुरी समयमा थप अर्को गोल गर्दै अग्रता दोब्बर बनाएका थिए।

तर, पहिलो हाफमा दुई शुन्यले पछि परेको आयोजकले दोश्रो हाफको छैटौ मिनेटमा जर्सी नम्बर ११ का सुनिल खड्काको गोलबाट अग्रता कम गरेको थियो। दोश्रो हाफको २४औं मिनेटमा पथरीका जर्सी नम्बर–१० का सुमन राई रातो कार्ड खाँदै मैदानबाट बाहिरिएका थिए।

उनले आयोजकका जर्सी नम्बर–२३ का अशोक खबासमाथि हातपात गरेपछि रेफ्री लोकराज ढुङ्गानाले रातो कार्ड दिएका हुन्। त्यसपछि दश खेलाडीमा सीमित भएको पथरीविरुद्ध झनै आक्रामक देखिएको आयोजकले दोश्रो हाफको ३५औं मिनेटमा बराबरी गर्यो।

उसका निरज बस्नेतले डिबक्सभित्र निशान लिम्बुले दिएको क्रस पासमा दर्शनीय गोल गरेका थिए। यसअघि, खेल शुरु भएको ९औं मिनेटमा अयोजकका जर्सी नम्बर–१० का तीर्थ बस्नेतको प्रहार बायाँ पोलमा लागेर बाहिरिएको थियो।

दोश्रो हाफको इन्जुरी समयमा आयोजकका कप्तान सुरेन थापाको प्रहार पनि क्रसबारमा लागेर बाहिरिएको थियो। खेलको म्यान अफ दि म्याच विजयी टिमका निरज बस्नेत भए। उनले ट्रफी तथा नगद दुइ हजार प्राप्त गरे।

अब आयोजकले उपाधिका लागि सुनसरीको राष्ट्रिय जागृतिसँग आगामी शुक्रबार प्रतिस्पर्धा गर्नेछ। 

राष्ट्रिय जागृतिले यसअघि सम्पन्न पहिलो सेमिफाइनलमा सयपत्री फुटबल क्बल पाँचथरलाई ३–१ ले पराजित गरेको थियो। प्रतियोगिताको विजेताले नगद एक लाख एक सय एघार तथा उप–विजेताले पचास हजार पाँच सय पचपन्न रुपैयाँ प्राप्त गर्नेछन्।

२०७४ माघ,  २५

एपीएफलाई टाइब्रेकरमा पछि पार्दै पथरी फुटबल क्लब सेमिफाइनलमा

उत्तम रिजाल, झापा – शसस्त्र प्रहरी बलको एपीएफ क्लब झापालाई टाइब्रेकरमा ५–३ ले पछि पार्दै पथरी फुटबल क्लब मोरङ्ग झापाको कमल गाउँपालिकामा जारी स्वर्गीय विशाल खड्का स्मृती कप फुट्बल प्रतियोगिताको सेमिफाइनल प्रवेश गरेको छ।

निर्धारीत ७० मिनेट सम्म खेल गोल रहित बराबरीमा सकिएपछि भएको टाइब्रेकरमा शसस्त्रका जर्सी नम्बर ८ का उज्वल राईको प्रहार क्रसबारमा लागेर फर्किएपछि एपीएफको अघिल्लो चरण पुग्ने सपना अधुरै भएको हो।

विजयी टिमका लागि जर्सी नम्बर १५ का सुमन राई, जर्सी नम्बर ८ का साइमन लिम्बु, जर्सी नम्बर ४ का मिन धिमाल, जर्सी नम्बर १२ का सुबास तामाङ्ग र जर्सी नम्बर ३ का कबी राईले गोल गरेका थिए ।

उता पराजित शसस्त्रको तर्फबाट भने जर्सी नम्बर १० का सुशील राई, जर्सी नम्बर ४ का अभिषेक लिम्बु र जर्सी नम्बर ५ का पवन बस्नेतको प्रहार मात्र गोलमा परिणत भएको थियो । खेलको म्यान अफ दि म्याच विजयी टिमका जर्सी नम्बर १२ का सुबास तामाङ्ग घोषित भए।

उनलाई कमल गाउँपालिकाका खेलकुद विकास समितिका सह–सम्योजक तेज कुमार राईले ट्रफी प्रदान गरे। त्यस्तै आयोजकका अध्यक्ष कृष्ण कार्कीले नगद २ हजार पुरस्कार प्रदान गरेका थिए। यो खेलसँगै प्रतियोगितको सेमिफाइनल समीकरण पनि पुरा भएको छ।

मंगलबार पहिलो सेमिफाइनलमा राष्ट्रिय लिग खेलेका खेलाडीहरुले भरिएको सयपत्री फुट्बल क्लब पाँचथर र राष्ट्रिय जागृती फुटबल क्बल सुनसरी आमने–सामने हुनेछन्। प्रतियोगिताको विजेताले नगद १ लाख १ सय ११ र उप–विजेताले नगद ५० हजार पाँच सय पचपन्न रुपैयाँसँगै ट्रफी हात पार्नेछन्। खेल गुहेश्वरी युवा क्लबले आयोजना गरेको हो। 

२०७४ माघ, २३

फुटबलका विशाल राई र क्रिकेटकी रुबिना क्षेत्री झापा जिल्लाको उत्कृष्ट वर्ष खेलाडी घोषित, प्रोफाइल भने कमजोर

उत्तम रिजाल , झापा,११ माघ।  नेपाल खेलकुद पत्रकार मन्च झापाले फुटबलका विशाल राई र क्रिकेटकी रुबिना क्षेत्रीलाई झापा जिल्लाको उत्कृष्ट वर्ष खेलाडी घोषित गरेको छ । विशाल पुरुषतर्फ र रुबिना महिलातर्फ उत्कृष्ट बर्ष खेलाडी घोषित भएका हुन् । दुबैको प्रोफाइल भने अन्य प्रतिस्पर्धीको भन्दा कम छ । तर आयोजकले अवार्ड घोषणा गर्दा कुनै पनि खेलाडीको प्रोफाइल अतिथि तथा उपस्थित दर्शक सामु प्रस्तुत गरेन् ।

आयोजकले भने २०७३ साल भरिको ब्यक्तिगत प्रदर्शनका आधारमा उनीहरुलाई २०७३ सालको उत्कृष्ट बर्ष खेलाडी घोषित गरेको जनाएको छ । यद्यपी अन्य प्रतिस्पर्धी खेलाडीले भने अवार्ड वितरणमा खेलाडीको प्रोफाइल दर्शक सामु नदेखाइ आँफुखुसी उत्कृष्ट खेलाडी घोषणा गरेको गुनासो गरेका छन् । पुरुषतर्फको बर्ष खेलाडी घोषित भएका मनाङ्ग मस्र्याङ्दी क्लबका मिडफिल्डर विशालले फुटबलकै योगेश गुरुङ र बुद्धिचालका भूपेन्द्र निरौलालाई पछि पार्दै उपाधि जितेका हुन् । बर्षको उत्कृष्ट खेलाडी हुन उसले बर्षभरी अन्य प्रतिस्पर्धी खेलाडीको भन्दा उत्कृष्ट प्रदर्शन गरेको हुनु पर्दछ। तर त्यो नहेरिएको बक्सिङ्गकी सुलब मगर र बुद्धिचालका भुपेन्द्र निरौलाले अवार्ड वितरण पछि प्रतिक्रिया दिए ।

---

यस्तो छ विशाल,योगेश र भुपेन्द्रको बर्ष २०७३ को प्रोफाइल ।

---

बर्ष २०७३ मा विशाल राई

बर्ष २०७३ मा खेलेका सबै प्रतियोगीतामा गरि मनाङले आहा रारा,झापा गोल्डकप र धनगडी गोल्डकप जीतेको विशालले बताए । उनीसँगको कुराकानीमा उनले भने बर्ष २०७३ भरी दुइ तीन गोल गरे होला । उनी बर्ष २०७३ मा कुनै प्रतियोगितामा सर्बाधिक गोलकर्ता तथा उत्कृष्ट मिडफिल्डर भएनन् ।

---

बर्ष २०७३ मा योगेश गुरुङ्ग

झापा ११ बाट खेल्दै आएका योगेश गुरुङ्गले बर्ष २०७३ मा झापा ११ ले माइ भ्याली गोल्डकप, काँकडभिट्टा गोल्डकप र मानेभञ्ज्याङ्ग गोल्डकप जीतेको बताए । उनलाई बर्ष २०७३ भरी तपाइले कति गोल गर्नु भयो भनी सोधिएको प्रश्नमा उनले भने २०७३ भरी सबै प्रतियोगिता गरि चार पाँच गोल गरे होला । योगेश पनि बर्ष २०७३ मा कुनै प्रतियोगितामा सर्बाधिक गोलकर्ता तथा उत्कृष्ट खेलाडी घोषित भएनन् ।

---

बर्ष २०७३ मा भुपेन्द्र निरौला

बुद्धिचालका भुपेन्द्र निरौलाले बर्ष २०७३ मा इलाममा सम्पन्न १९ औं राष्ट्रिय बुद्धिचालमा एक खेल अगाबै नेपाल च्याम्पियन बन्दै उपत्यका बाहिरको पहिलो नेपाल च्याम्पियन बन्ने पहिलो खेलाडीको रुपमा आँफुलाई दर्ज गरेका थिए । त्यस्तै उनले अजरबैजानको बाकुमा भएको विश्वका एक सय ८० देश का खेलाडी सहभागी ओलम्पियाड ( चेस ओलम्पिक ) मा नेपालको प्रतिनिधित्व गरेका थिए । सोहि प्रतियोगितामा उनले बुद्धिचालका २५१० रेटिङ्गका कोलम्बियन ग्राण्डमास्टर लाई पराजीत गरे । २५०० रेटिङ्ग माथीको ग्राण्डमास्टरलाई पराजीत गर्ने उनी नै पहिलो नेपाली खेलाडी समेत हुन् । त्यस्तै २०७३ मै स्याङ्गजामा भएको धनबहादुर प्रधान स्मृती राष्ट्र व्यापी बुद्धिचालमा अपराजीत रहदै दोश्रो भएका थिए । सातौ राष्ट्रिय खेलकुद प्रतियोगितामा नेपाल आर्मी क्लब बाट सहभागी ( उपत्यका बाहिर बाट विभागीय टोलीबाट खेल्ने पहिलो बुद्धिचाल खेलाडी ) ।

---

के भने उपाधि जितेपछि स्टेजबाट विशालले

उपाधि जितेपछि स्टेजबाट सम्बोधन गर्दै विशालले भने– म मनाङ्गको खेलाडी हुँ । मलाई झापा बाट खेल्ने मन छ । अहिले सम्म झापा बाट खेल्न पाएको छुइन । अब चाँहि पुरा हुन्छ होला, भगिरथ आले मामा यहिँ हुनुन्छ, जेके सर यहि हुनुन्छ । मलाई झापा बाट खेलाउनु हुन्छ होला । म झापा बाट खेल्न चाहान्छु ।

---

---

उता उत्कृष्ट महिला वर्ष खेलाडी भएकी रुबिनाको बर्ष २०७३ राम्रो थिएन् । उनले खेलेका ११ खेलमा कुनैमा पनि अर्ध सतक बनाउन त सकिनन् नै उनले १३ रन भन्दा बढी रन जोड्न सकिनन् । यद्यपी उनले बक्सिङकी सुलब मगर र कराँतेकी एस्तर राईलाई उछिन्दै उपाधि जीतेकी थिइन् ।

---

यस्तो छ बर्ष २०७३ मा रुबिना क्षेत्रीको प्रदर्शन

उनको नेतृत्वमा हङ्गकङ्गमा भएको विश्वकप क्रिकेटको लागी एशिया क्षेत्रको छनोट प्रतियोगिताका ६ खेल मध्ये ३ मा जीत,३ मा हार,उनले प्रतियोगितामा खेलेका ६ खेलमा सबै भन्दा बढी चीन विरुद्ध १३ रन जोडेकी थिइन् ।

पहिलो खेल ९ अक्टोबर २०१६ – आयोजक हङ्गकङ्गसँग ६ विकेटले पराजित, नेपाल १९.२ ओभरमा ७७ रनमा अल आउट । रुबिना १२ रनमा आउट, बलिङ्गतर्फ ३ ओभर ११ रन ।

दोश्रो खेल १० अक्टोबर २०१६ – थाइल्याण्डसँग ३ विकेटले पराजित, नेपालले २० ओभरमा ८ विकेट गुमाएर ७६ रन बनाउँदा १५ बल खेलेकी रुबिना ७ रनमा अविजित, बलिङ्गतर्फ ३ ओभर १४ रन एक विकेट ।

तेश्रो खेल ११ अक्टोबर २०१६ – नेपाल २० रनले विजयी, नेपालले २० ओभरमा ९ विकेट गुमाएर ९५ रन जोड्दा ७ बल खेलेकी रुबिना ४ रनमै आउट । बलिङ्गतर्फ ४ ओभर १० रन १ विकेट ।                                               

चौथो खेल १३ अक्टोबर २०१६ – नेपाल हङ्गकङ्ग विरुद्ध ६ रनले विजयी, नेपालले २० ओभरमा ८ विकेट गुमाएर ७५ रन जोड्दा ४ बल खेलेकी रुबिना ४ रनमै आउट । बलिङ्गतर्फ ३ ओभरमा १५ रन खर्चेर एक विकेट ।

पाँचौ खेल १४ अक्टोबर २०१६ – नेपाल थाइल्याण्डसँग एक विकेटले पराजित, नेपालले २० ओभरमा ४ विकेटको क्ष्यतिमा एक सय ८ रन जोड्दा रुबिना १० रनमा अविजित ।

छैटौ खेल १५ अक्टोबर २०१६ – चीन विरुद्ध नेपाल ४ विकेटले विजयी, ९ बल खेलेकी रुबिना १३ रनमा अविजित, बलिङ्गतर्फ ४ ओभरमा १० रन खर्चेर २ विकेट लिन सफल । सो खेलमा मात्र प्लेयर अफ दि म्याच ।  

त्यस्तै उनको नेतृत्वमा थाइल्याण्डको बैंककमा भएको ट्वान्टी–ट्वान्टी एशिया कप क्रिकेट प्रतियोगिता खेलेको नेपालले प्रतियोगिताका कुनै पनि खेलमा जीत निकाल्न सकेन् । उनले प्रतियोगितामा खेलेका ५ खेलमा सबै भन्दा बढी पाकिस्तान विरुद्ध ११ रन जोडेकी थिइन् ।
 
एशिया कपको पहिलो खेल २६ नोभेम्बर २०१६ – नेपाल पाकिस्तानसँग ९ विकेटले पराजित, नेपाल १८.१ ओभरमा ४७ रनमा अल आउट, ३३ बल खेलेकी रुबिना ११ रन जोड्दै विस्माह मारुफको बलमा क्लिन बोल्ड, बलिङ्गतर्फ उनले २ ओभरमा ११ रन दिइन् ।

दोश्रो खेल २८ नोभेम्बर २०१६– नेपाल श्रीलंकासँग ८ विकेटले पराजित,१६.३ ओभरमा २३ रनमै सिमित, रुबिना १४ बलमा एक रन जोड्दै आउट । बलिङ्गतर्फ २ ओभरमा १७ रन खर्चेर एक विकेट ।

तेश्रो खेल २९ नोभेम्बर २०१६ – बंगलादेशसँग ९२ रनले पराजित, नेपाल १७.३ ओभरमा ४१ रनमै अल आउट, रुबिना १९ बलमा ७ रन जोड्दै जहनरा आलमको बलमा बोल्ड । बलिङ्गतर्फ ४ ओभरमा एक मेडन राख्दै एक विकेट ।

चौथो खेल १ डिसेम्बर २०१६ – थाइल्याण्डसँग ८ विकेटले पराजित, नेपाल १९.५ ओभरमा ६३ रनमै प्याक । १५ बल खेलेकी रुबिना ८ रनमा आउट, बलिङ्गतर्फ ४ ओभर १६ रन ।

पाँचौ खेल २ डिसेम्बर २०१६ – इण्डीयासँग ९९ रनले पराजित, नेपाल १६.३ ओभरमा २१ रनमै अल आउट । १६ बल खेलेकी रुबिना २ रनमै पुनम यादवको बलमा स्टम्पिङ आउट । बलिङ्गतर्फ ४ ओभर २१ रन २ विकेट ।

---

बर्ष २०७३ मा सुलब मगर

क्षेत्रिय प्रतियोगितामा स्वर्ण पदक, सातौ राष्ट्रिय खेलकुद प्रतियोगितामा स्वर्ण पदक, भारतमा सम्पन्न दिल्ली सुपर लिग बक्सिङ्ग प्रतियोगिताको लागी भारत उत्तर प्रदेश सरकार द्धारा दुइ बर्षे अनुबन्ध गरिएकी नेपालकी एक मात्र महिला खेलाडी, सो प्रतियोगिताका लागी उनलाई प्रति खेल ७०० अमेरिकी डलरमा अनुबन्ध गरिएको थियो । प्रति खेल ७०० अमेरिकी डलर पाउने उनी नेपालकै पहिलो तथा एक मात्र खेलाडी । १७ बर्षे उमेरमा दिल्ली सुपर लिग खेल्ने विश्वकै पहिलो खेलाडी ।

---

बर्ष २०७३ मा एस्तर राई

क्षेत्रिय प्रतियोगितामा स्वर्ण पदक,राष्ट्रिय प्रतियोगितामा स्वर्ण पदक   

---

खेलाडीको गुनासो

बक्सिङ्गकी सुलब मगरले आँफुलाई अवार्ड घोषणा गर्ने अघिल्लो दिन मात्र फोन गरेर तपाई पनि मनोनयनमा पर्नु भएको छ । आउनु होला, निर्णायक र दर्शकले भोट गरेर उत्कृष्ट खेलाडी घोषर्णा गर्ने हो भनेर बोलाएको भएपनि त्यस्तो नभएको भन्दै सहि निर्णय नभएको गुनासो गरिन् ।

उनले आयोजकले आफ्नो भिडियो समेत नबनाएको बताईन् । उनले खान बस्नको ब्यबस्था छ भनेर आयोजकले अरुलाई पनि ल्याएर आउनुस भनेको र आँफुले गुरुलाई लिएर गएको तर राती अबेर त्यतिकै हिड्नु परेको गुनासो समेत गरिन् । उनले भनिन– भने जस्तो केहि रहेनछ धन्न साथीहरुलाई लिएर गइनछु , नत्र बेइजत नै हुने रहेछ ।

त्यस्तै कराँतेकी एस्तरले फुट्बल र क्रिकेटलाई मात्र खेल देख्नेहरुले बक्सिङ्ग र कराँते के बुझ्थे भन्दै प्रतिक्रिया दिएकी थिइन् भने बुद्धिचालका भुपेन्द्रले खेलाडीको ब्यक्तिगत प्रदर्शनका आधारमा आयोजकले अवार्ड घोषणा नगरेको प्रतिक्रिया दिए ।

उनले खेलाडीको व्यक्तिगत प्रदर्शन हेरेर मुल्यांकन गर्नुको सट्टा आयोजकले आफ्नो नजिककोलाई अवार्ड दिएको आरोप लगाउँदै खेलाडीको प्रोफाइल अतिथि तथा उपश्थित दर्शक,पत्रकार सामु नदेखाउनु नै कमजोर प्रोफाइल भएकालाई उत्कृष्ट खेलाडी घोषणा गर्न सजिलो भएको प्रतिक्रिया दिए ।

---

त्यस्तै पूर्व क्रिकेटर तथा नेपाल पुलिस क्लबका प्रशिक्षक मनोज कटुवाल वर्षका उत्कृष्ट प्रशिक्षक बने । मनोजसँगै उत्कृष्ट प्रशिक्षकमा झापा ११ का सञ्जय राई र कराँतेकी सीता राई मनोनयनमा परेका थिए । अवार्डमा फुटबलले वर्ष खेलाडीसहित तीन विधामा पुरस्कार जित्यो । युवा वर्ष खेलाडीको उपाधि झापा ११ का डिफेन्डर देवेन्द्र तामाङले पाए भने रमपम झापा ११ पिपुल्स च्वाइजतर्फ उत्कृष्ट टोली बन्यो । विजेता सबैले समान १५ हजार रुपैयाँ प्राप्त गरेका थिए ।

अवार्ड विजेतालाई कार्यक्रमका प्रमुख अतिथि राष्ट्रिय खेलकुद परिषद्का सदस्यसचिव केशव कुमार विष्ट, एन्फाका केन्द्रीय सदस्य पंकजविक्रम नेम्वाङ, एन्फा पूर्वाञ्चल संयोजक जलकुमार गुरुङ, जिल्ला खेलकुद विकास समिति झापाका अध्यक्ष शंकर थापा,जिल्ला फुटबल संघ झापाका अध्यक्ष भगिरथ आलेलगायतले पुरस्कृत गरेका थिए । नगद पुरस्कार एन्फा सदस्य नेम्वाङले दिवंगत भाइ फुटबलर आशिषविक्रम नेम्वाङको स्मृतिमा प्रदान गरेका थिए ।

विराटनगरमा महानगरपालिका कप बुद्धिचाल प्रतियोगिता हुने

झापा,११ माघ।  मोरङ्गको विराटनगरमा विद्यालय स्तरीय महानगरपालिका कप बुद्धिचाल प्रतियोगिता हुने भएको छ । विराटनगर महानगरपालिका भित्रका बुद्धिचालका खेलाडीहरुको खेल स्तर बृद्धिका लागि खेलको आयोजना गरिएको जिल्ला बुद्धिचाल संघका अध्यक्ष विजय थापाले जानकारी दिए । 

प्रतियोगिता आगामी २६ गते देखी २८ गते सम्म संचालन हुनेछ । प्रतियोगितामा विराटनगर महानगरपालिका भित्रका ७० बढी खेलाडीको सहभागिता रहने पनि अध्यक्ष थापाले जानकारी दिए ।

लिग लिडर चेल्सीको अप्रत्यासित हार

लिग लिडर चेल्सीले अप्रत्यासित हार ब्यहोरेपछि इङ्गलिस प्रिमियर लिग फुटबलको उपाधि होड रोमाञ्चक बनेको छ । गए राति आफ्नै घरेलु मैदान स्टामफोर्ड ब्रिजमा भएको खेलमा उ  क्रिस्टल प्यालेससंग २–१ ले पराजित भयो । खेलको ५ औ मिनेटमा सेस फाब्रिगासको गोल मार्फत अग्रता लिएपनि त्यसको ६ मिनेटमा २ गोल खाएको थियो ।

खेलपछि चेल्सी प्रशिक्षक एन्टोनी कोन्टेले अप्रत्यासित हारले प्रिमियर लिगको उपाधि यात्रा अझ रोचक बनेको प्रतिक्रिया दिए । लिगमा ९ खेल बाँकी रहदा लण्डन क्लब, दोस्रो स्थानको टोटनह्याम भन्दा ७ अंकले अघि छ । अर्को खेलमा टोटनह्यामले वर्नलीलाई २–० ले पराजित गरेको छ । त्यस्तै, लिभरपुलले एर्भटनलाई ३–१ ले पराजित गर्दै अर्को सिजन च्याम्पियन्स लिगमा छनोट हुने सम्भावना बलियो बनाएको छ ।

शीर्ष चार भित्र पर्न संघर्षरत म्यानचेष्टर युनाईटेडले भने वेष्ट ब्रोमसंग गोल रहित बराबरी खेल्दै अंक बाँडेको छ । पछिल्लो नतिजाले शीर्ष चारभित्र पर्दै अर्को सिजन च्याम्पियन्स लिग खेल्ने म्यान युको सम्भावना कम्जोर बनेको छ । ९ खेल बाँकी छदा म्यान यु चौथो स्थामा रहेको म्यान्चेष्टर सिटी भन्दा ४ अंकले पछाडी छ । २० चैत्र, २०७३

आयरल्याण्ड ३ विकेटले विजयी

अफगानिस्तान विरुद्धको चौथो वण्डेमा आयरल्याण्ड ३ विकेटले विजयी भएको छ । अफगानिस्तानले प्रस्तुत गरेको  २ सय २१ रनको लक्ष्य उसले खेल सकिन १९ बल अगावै पुरा गर्यो ।

ओपनर ब्याट्समेन पउल स्टर्लिङ्गलाई  २८, एड जोयसलाई २४ तथा कप्तान विलियम पोटरफिल्डलाई  ६ रनमा गुमाउँदा ३ विकेटको क्ष्यतिमा आयरल्याण्डले मात्र  ५९  रन जोडेको थियो । त्यसपछि दबाबमा रहेको उसले एक सय  ३० रन जोड्दा  ६ विकेट  गुमाएर पराजयतर्फ  धकेलिएको उसका लागी विकेट किपर  गेरी विल्सल  र  केबिन ओब्रेनले  ६६ रनको साझेदारी गरेपछि टोली जितको नजिक पुगेको थियो । ६७ बलको सामना गरेका विल्सन  ३ चौकाको सहायतामा  ४१  रनमा आउट भए ।

त्यसपछि  क्रिजमा आएका जर्ज डकरेल  र ओब्रेनले टिमलाई जीत दिलाए । अविजित यात्रा तय गरेका डकरेलले १० बलको सामनामा ५ तथा ६० बलको सामना गरेका ओब्रेनले विष्फोटक ब्याटिङ्ग गर्दै ८ चौका र २ छक्काको सहायतामा ७२ रन जोडे । उनले ४७ औं ओभरको पाँचौ बलमा चौका प्रहार गरेसँगै आयरल्याण्डले २ सय २४ रन बनाएको थियो । ओब्रेन नै म्यान अफ दि म्याच घोषित भए । बलिङ्गतर्फ मोहम्मद नाबीले ४ तथा रसिद खानले २ विकेट लिए ।

यसअघि इण्डीयाको नोयडामा टस जितेर ब्याटिङ्ग गरेको अफगानिस्तानले आफ्ना आक्रामक र भरोसादार खेलाडीलाई सस्तैमा गुमाएपछि अफगानिस्तान एक सय २० रनमा समेटिएको थियो ।

उसले खेल सकिन एक बल अगाबै सबै विकेट गुमायो । अफगानिस्तानले आफ्ना ६ ब्याट्समेनलाई दोहोरो अंकको रन जोड्न नपाउँदै गुमायो । ओपनर मोहम्मद सहजाद एक रनमा आउट हुँदा उस्मान घानी तीन रनमा पेवेलियन फर्किए । त्यसपछि अर्का आक्राम ब्याट्समेन राहत शाहले खाता खोल्नै भ्याएनन् । ११ रन जोड्दा ३ विकेट गुमाएको उसले ८३ रन जोड्दा थप ४ विकेट गुमाएको थियो । त्यसपछि १४२ रन जोड्दा आठौं विकेट गुमाएको थियो । 

उसका लागी सफिकउल्लाहले सर्बाधिक ४२ तथा मोहम्मद नाबी र दौलत जद्रानले समान ४१ रनको योगदान दिए । जद्रान अविजित रहेका थिए । कप्तान अस्घर तनिकजाइले ३५ रनको योगदान दिएका थिए । अफगानिस्तानलाई सस्तैमा समेट्ने क्रममा केविन ओब्रेनले ४, जाकोब मुल्डरले ३ र एण्डी म्याकब्रेनले २ विकेट लिए ।

 

जितसँगै पाँच म्याचको श्रृंखला २–२ को बराबरीमा पुगेको छ । पाँचौ तथा अन्तिम म्याच पर्सी शुक्रबार नोयडामा हुनेछ ।

९ चैत्र, २०७३

इण्डीया र अष्ट्रेलियाबीचको तेस्रो टेष्ट बराबरी, मार्स र हेन्ड्सकोम्बले बचाए अष्ट्रेलियालाई

इण्डीया र अष्ट्रेलियाबीचको तेस्रो टेष्ट बराबरीमा सकिएको छ । आज पाँचौ तथा अन्तिम दिन पाहुँना टोली अष्ट्रेलियाले पुरै खेलेपछि तेस्रो टेष्ट बराबरीमा सकिएको हो । चौथो दिन ७.२ ओभरमा २ विकेट गुमाएर दबाबमा रहेको कंगारु टोलीका लागी आज थप दबाब रहेको थियो । आज ओपनर ब्याट्समेन म्याट रेन्स १५ तथा कप्तान स्टेभन स्मिथ २१ रनमा आउट भएपछि पाहुना टोली संकटमा परेको थियो । यद्यपी सन मार्स र पेटर हेन्ड्सकोम्बको साझेदारी घरेलु टोली इण्डीयाको लागी बाधक बन्यो ।

India’s captain Virat Kohli, right, shakes hands with Australia’s Matthew Wade at the end of their third test cricket match that ended in a draw in Ranchi, India, Monday, March 20, 2017.

स्मिथलाई चौथो विकेटमा गुमाउँदा मात्र ६३ रन जोडेको कंगारु टोलीका लागी मार्स र हेन्ड्सकोम्बको जोडीले एक सय ८७ रन सम्म पुर्याएका थिए । आज बाँकी  ९२.४  ओभर  मात्र  खेल्नु  पर्ने  भएकोले  पाहुना  टोली संकटमा  परेसँगै पुरै ओभर टिक्न संघर्षरत थियो । मार्स रविन्द्र जडेजाको बलमा मुरली विजयद्धारा समातिएका थिए । उनले एक सय ९७ बलको सामनामा ७ चौकाको सहायताले ५३ रन जोडे । उनी ९१.२ ओभरमा आउट भएका थिए ।

त्यसपछि क्रिजमा आएका आक्रामक ब्याट्समेन ग्लेन म्याक्सवेल मात्र  २ रनमा पेवेलियन फर्किएपनि  ह्याण्ड्सकोम्ब र विकेट किपर म्याथ्यु वाडले अविजित खेलेका थिए । २०० बल खेलेका ह्याण्ड्सकोम्ब ७ चौका प्रहार गर्दै ७२ रनमा रहे भने वाडले १६ बलमा २ चौका हान्दै ९ रन जोडे । खेल सकिंदा पाहुना टोलीले एक सय ओभरमा ६ विकेटको क्ष्यतिमा २ सय ४ रन बनाएको थियो । बलिङ्गतर्फ रविन्द्र जडेजाले ४ तथा इशान्त शर्मा र रविचन्द्रन अश्विनले समान एक विकेट लिए ।

यसअघि राँचीमा टस जितेर ब्याटिङ्ग गरेको पाहुना टोली अष्ट्रेलियाले पहिलो इनिङ्गमा कप्तान स्टेभन स्मिथको सर्बाधिक अविजित एक सय ७८ तथा ग्लेन म्याक्सवेलको एक सय ४ रनको मद्दतमा १३७.३ ओभरमा ४ सय ५१ रन बनाएको थियो ।

जवाफमा घरेलु टोली इण्डीयाले उत्कृष्ट प्रदर्शन गर्दैै चेतेश्वर पुजराको २ सय २ , ऋद्धिमान शाहाको एक सय १७ तथा ओपनर मुरली विजयको ८२ र लोकेश राहुलको ६७ रनको मद्दतमा २१० ओभरमा ९ विकेटको क्ष्यतिमा ६ सय ३ रन बनाउँदै इनिङ्ग समाप्तिको घोषणा गरेको थियो । 

यो बराबरीसँगै चार टेष्ट म्याचको श्रृंखला एक / एक को बराबरीमा कायमै रहेको छ । यो खेलको म्यान अफ दि म्याच चेतेश्वर पुजरा भए । चौथो तथा अन्त्मि टेष्ट १२ गतेबाट धर्मशालामा शुरु हुनेछ ।

७ चैत्र,२०७३

इण्डीयाको गतिलो जबाफ

उत्तम रिजाल,  घरेलु टोली इण्डीयाले अष्ट्रेलिया विरुद्धको तेस्रो टेष्टको पहिलो इनिङ्गमा गतिलो जबाफ दिएको छ । पाहुना टोली अष्ट्रेलियालाई आज  ४  सय ५१ रनमा रोक्दै आफ्नो इनिङ्ग शुरु गरेको उसले दोस्रो दिनको खेल सकिंदा सम्म एक विकेट गुमाएर एक सय २० रन जोडेको छ ।Australia’s Pat Cummins, right, celebrates the dismissal of India’s Lokesh Rahul, left, during the second day of their third test cricket match in Ranchi, India, Friday, March 17, 2017.
उसका लागि ओपनर दोय लोकेश राहुन र मुरली विजयले ९१ रनको साझेदारी गरे । राहुल एक सय २ बलको सामना गर्दै ९ चौकाको सहायताले ६७ रन जोडेर आउट भए । उनी पाट कुमिन्सको बलमा विकेट किपर म्याथ्यु वाडद्धारा क्याच आउट भए । क्रिजमा एक सय १२ बलको सामना गरेका मुरली विजय ६ चौकाको सहायताले ४२ तथा २६ बलको सामना गरेका चेतेश्वर पुजरा एक चौकाको सहायताले १० रनमा छन् ।
यसअघि आज ४ विकेटको क्ष्यतिमा २ सय ९९ रनबाट खेख्न शुरुगरेको पाहुना टोली अष्ट्रेलियाले एकसय ३७.३ ओभरमा ४ सय ५१ रन जोडेको थियो । उसका लागि कप्तान स्टेभन स्मिथले सर्बाधिक अविजित एक सय ७८, ग्लेन म्याक्सवेलले एक सय ४, म्याट रेनसले ४४ तथा विकेट किपर म्याथ्यु वाडले ३७ रनको योगदान दिएका थिए । बलिङ्गतर्फ रविन्द्र जडेजाले ५, उमेश यादवले ३ तथा रविचन्द्रन अश्विनले एक विकेट लिए ।

India’s Cheteshwar Pujara bends to avoid a rising delivery during the third day of their second test cricket match against Australia in Bangalore, India, Monday, March 6, 2017.

भोलि घरेलु टोली एक विकेटको क्ष्यतिमा एक सय २० रनबाट खेल्न शुरु गर्नेछ । चार टेष्ट म्याचको श्रृंखला एक एक को बराबरीमा छ ।

Australia’s Steve O’Keefe, left, reacts as the stumps break in an unsuccessful attempt to run-out India’s Murali Vijay, right, during the second day of their third test cricket match in Ranchi, India, Friday, March 17, 2017.

  ४ चैत्र,२०७३

श्रीलंकाको खराब प्रदर्शन

उत्तम रिजाल,  बंगलादेश विरुद्धको दोस्रो टेष्टको पहिलो इनिङ्गमा श्रीलंकाले खराब प्रदर्शन गरेको छ । कोलम्बोमा टस जितेर ब्याटिङ्ग गरेको घरेलु टोलिले पहिलो दिनको खेल सकिंदा सम्म ८३.१ ओभर खेल्दै ७ विकेटको क्ष्यतिमा २ सय ३८ रन बनाएको छ । क्रिजमा दिनेश चण्डीमाल सर्बाधिक ८६ रनमा अविजित छन् ।

उनले २ सय १० बलको सामनामा ४ चौकाको सहायताले सो रन बनाएका हुन् । उनलाई कप्तान रंगना हेराथले ६३ बलमा २ चौकाको सहायताले १८ रनमा साथ दिइरहेका छन् । यसअघि ओपनर दिमुथ करुनारत्नेलाई पहिलो विकेट स्वरुप ७ रनमा गुमाएको श्रीलंकाले कुशल मेण्डिसलाई दोस्रो विकेट स्वरुप ५ रनमा गुमाएको थियो ।

त्यसपछि अर्का ओपनर उपल थारंगा ११ तथा गनारत्ने १३ रनमा आउट हुँदा धनन्जय डे शिल्भा र निरोशन डिकवेलले समान ३४ रनको योगदान दिए । त्यसपछि दिलरुवान परेराले ९ रनमा चित्त बुझाए । बलिङ्गतर्फ मुस्तफिजुर रहमान र मेहेदि हसनमिराजले २/२ तथा सुबाशिस रोय, तैजुल स्लाम र सकिब अल हसनले समान एक विकेट लिए ।

भोलि दोस्रो दिनको खेल शुरुहुँदा घरेलु टोलिले ७ विकेटको क्ष्यतिमा २ सय ३८ रनबाट खेल्न शुरु गर्नेछ ।

२ चैत्र,२०७३

अल्ट्रा म्याराथुन धाविका मिरा र उनका प्रशिक्षकलाई आज सम्मान गरिदैं

उत्तम रिजाल,  अल्ट्रा म्याराथुन धाविका मिरा राई र उनका प्रशिक्षक धर्म विक्रम मल्ल लाई आज सम्मान गरिदैं छ । उनीहरुलाई झापाको दमकमा नगद सहित सम्मान गर्न लागिएको हो । मिरालाई नगद २८ लाख तथा प्रशिक्षक मल्ललाई २ लाख सहित सम्मान गरिने छ। सरकार र नेताले उनको साहासिक यात्रा बुझ्न नसेके पनि झापा दमकका ब्रिटिस आर्मीका खुकुरी प्रशिक्षक राष्ट्र राईले उनलाई सम्मान गर्न लागेका हुन् । उनले अयोग्य भनि फालिएको तथा कम्जोर आर्थिक अबस्था भएको व्यक्तीले राष्ट्रको नाम विश्व सामु चिनाउँदा पनि त्यसको मुल्यांकन गर्न नसकेकाले उनी जस्ता राष्ट्रको नाम रोशन गर्नेका लागि केहि गर्नुपर्छ भन्ने भएर नै सम्मान गर्न लागिएको बताए ।

उनले मिरालाई राष्ट्रले नचिने पनि आँफुहरुले चिनेको बताए । खुकुरी प्रशिक्षक राईले ब्रिटेनमै उनले स्थापना गरेको शगरमाथा ताइकन्दो डोजाङ्ग युकेको पहलमा अन्य चार सहयोगी संस्थाकोे सहयोगमा उक्त रकम दिन लागेका हुन्। उनलाई किराँत राई यायोख्खा, जेन मार्शल आर्ट एकेडेमी, भोजपुर समाज र नेपाल युके युथले सहयोग गरेको राईले बताए । खुकुरी प्रशिक्षक राईले मिरालाई खाडी मुलुक जान रोकेका गुरु धर्म विक्रम मल्ललाई पनि सम्मान गर्नुले राष्ट्रका लागि केहि योगदान दिन खोज्नेहरुलाई प्रेरणा मिल्ने बताए।

बाह्र बर्षको कलिलै उमेरमा माओवादी सशस्त्र द्धोन्द्धमा बन्दुक बोकाइएकी उनी माओवादी शान्ति प्रक्रियामा आएसँगै अयोग्य लडाकुमा परिणत भएकी थिइन् । माओवादी सत्ता प्राप्तीमा लागिरहदा योग्य भएकी उनी त्यतिबेला अयोग्य भइन जतिबेला माओवादी अध्यक्ष प्रधानमन्त्री हुने निश्चित थियो । त्यही पदको आशामा बसेका प्रचण्ड लगायतका माओवादी नेताहरुले अनमीनले लडाकु प्रमाणीकरण गर्दा उनीसँगै सयौं लडाकु अयोग्यको बिल्ला भिर्न बाध्य भए । त्यस पश्चात खिन्न मन भएपछि खाडी मुलुक जाने सोचका साथ तयारी गरेकी उनी धर्म विक्रम मल्ल नामका एक गुरुबाट रोकिइन र दौडतर्फ लागिन् । जसको फलस्वरुप उनी अल्ट्रा म्याराथुन धाविका बनिन् र आँफू अयोग्य नभएको मात्र होईन् नेताको सत्ता र कुर्सी मोहका कारण अयोग्य बनाइएको प्रमाणित गर्न सफल भइन् ।

प्रमाणिकरणमा अयोग्य भनिएपनि हरेश नखाई निरन्तरको मेहेनतले नेपाल र नेपालीको नाम विश्व सामु चिनाउन सकेको भन्दै उनको साहासिक कामको अहिले सर्बत्र चर्चा छ । सम्मान कार्यक्रम दमक रेडक्रस भवनमा गरि सम्मान गरिने शरगमाथा मल्टि मार्शल आर्टका अध्यक्ष तथा प्रशिक्षक दिपक धिमालले जानकारी दिए । कार्यक्रममा राष्ट्रिय खेलकुद परिषदका सदस्य सचिव केशव कुमार विष्टलाई प्रमुख अतिथिको रुपमा आमन्त्रण गरिएको पनि उनले जानकारी दिए ।

२१ पुस, २०७३

झापामा मिरालाई २८ लाखको सम्मान गरिने

उत्तम रिजाल
अल्ट्रा म्याराथुन धाविका मिरा राईलाई झापामा नगद २८ लाखको सम्मान गरिने भएको छ । सरकार र नेताले उनको साहासिक यात्रा बुझ्न नसेके पनि झापा दमकका एक ब्यक्तीले भने उनको उच्च सम्मान गर्ने तयारी गरेका छन् । 

ब्रिटिस आर्मीका खुकुरी प्रशिक्षक दमक १९ निवासी राष्ट्र राईले उनलाई सम्मान गर्न लागेका हुन् । उनले अयोग्य भनि फालिएको तथा कम्जोर आर्थिक अबस्था भएको  व्यक्तीले राष्ट्रको नाम विश्व सामु चिनाउँदा पनि त्यसको मुल्यांकन गर्न नसकेकाले राष्ट्रका लागि केहि गर्नुपर्छ भन्ने भएर नै सम्मान गर्न लागिएको बताए । उनले मिरालाई राष्ट्रले नचिने पनि आँफुहरुले चिनेको बताए । 

खुकुरी प्रशिक्षक राईले ब्रिटेनमै उनले स्थापना गरेको शगरमाथा ताइकन्दो डोजाङ्ग युकेको पहलमा अन्य चार सहयोगी संस्थाकोे सहयोगमा उक्त रकम दिन लागेको बताए । उनलाई किराँत राई यायोख्खा, जेन मार्शल आर्ट एकेडेमी, भोजपुर समाज र नेपाल युके युथले सहयोग गरेको बताए । खुकुरी प्रशिक्षक राईले मिरालाई खाडी मुलुक जान रोकेका गुरु धर्म विक्रम मल्ललाई पनि नगद दुई लाखले सम्मान गर्ने बताए । 

बाह्र बर्षको कलिलै उमेरमा माओवादी सशस्त्र द्धोन्द्धमा बन्दुक बोकाइएकी उनी माओवादी शान्ति प्रक्रियामा आएसँगै अयोग्य लडाकुमा परिणत भएकी थिइन् । माओवादी सत्ता प्राप्तीमा लागिरहदा योग्य भएकी उनी त्यतिबेला अयोग्य भइन जतिबेला माओवादी अध्यक्ष प्रधानमन्त्री हुने निश्चित थियो । त्यही पदको आशामा बसेका प्रचण्ड लगायतका माओवादी नेताहरुले अनमीनले लडाकु प्रमाणीकरण गर्दा उनीसँगै सयांै लडाकु अयोग्यको बिल्ला भिर्न बाध्य भए । त्यस पश्चात खिन्न मन भएपछि खाडी मुलुक जाने सोचका साथ तयारी गरेकी उनी धर्म विक्रम मल्ल नामका एक गुरुबाट रोकिइन र दौडतर्फ लागिन् । जसको फलस्वरुप उनी अल्ट्रा म्याराथुन धाविका बनिन् र आँफू अयोग्य नभएको मात्र होईन् नेताको सत्ता र कुर्सी मोहका कारण अयोग्य बनाइएको प्रमाणित गर्न सफल भइन् ।

प्रमाणिकरणमा अयोग्य भनिएपनि हरेश नखाई निरन्तरको मेहेनतले नेपाल र नेपालीको नाम विश्व सामु चिनाउन सकेको भन्दै उनको साहासिक कामको अहिले सर्बत्र चर्चा छ । मिरालाई यहि २१ गते दमक रेडक्रस भवनमा एक कार्यक्रम गरि सम्मान गरिने छ । 

१७ पुस,२०७३