दमकको कोभिड उपचार केन्द्रका लागी लायन्स कर्मीद्धारा दैनिक उपभोग्य सामाग्री वितरण

 

दमक। लायन्सकर्मीहरुले दमकको कोभिड उपचार केन्द्रका लागी दैनिक उपभोग्य सामाग्री वितरण गरेका छन् । दमक र लखनपुरका चार लायन्स क्लबमा आबद्ध लायन्सकर्मीहरुले कोभिड उपचार केन्द्रलाई खाना पकाउन प्रयोग गरिने ग्यास सिलिण्डर सहितका सामाग्री वितरण गरेको लायन्स क्लब अफ दमक लखनपुरका सचिव दिपक खड्काले जानकारी दिनुभयो ।

उनीहरुले दमक नगरपालिकाकी उप–प्रमुख गिता अधिकारी, डा. नविन ढकाल लगायतको टोलीलाइ ति सामाग्रीहरु हस्तान्तरण गरेका थिए । कार्यक्रममा लायन्स क्लब अफ दमक लखनपुरका अध्यक्ष राजु खड्का, दमक एक्टिभकी अध्यक्ष कल्पना पोख्रेल, दमक गरिमाका अध्यक्ष नविन अग्रवाल, कमल प्रोफेशनलका फष्ट भिपी पुष्प पाठक कौशिक, लियो दिपिना भट्टराई, आइपीपी अनिस खड्का, लायन नेत्र चौलागाई लगायतको उपस्थिति रहेको थियो ।

पछिल्लो क्रममा यि चार लायन्स क्लबहरुले विभिन्न कार्यक्रम गर्दै सामाजिक कार्यलाई तिव्रता दिएका छन् । हिजो मात्र यि क्लबहरुले संयुक्त रुपमा दमकको हिमावीको सेनिटाइज गरेका थिए । उनीहरुको यो चौथो संयुक्त कार्यक्रम हो ।

दमक र लखनपुरका लायन्सकर्मीहरुले गरे हिमावीको सबै कक्षा कोठाको सेनिटाइज

 दमक। दमक र लखनपुरका लायन्सकर्मीहरुले दमकको हिमालय माविको आज सेनिटाइज गरेका छन् । उनीहरुले विद्यालयको सबै क्षेत्रको सेनिटाइज गरेको लायन्स क्लब अफ दमक लखनपुरका सचिव दिपक खड्काले जानकारी दिनुभयो ।

विद्यालयमा प्रशासन खुल्ला रहेको तथा धेरै विद्यार्थी भएको र विद्यार्थीहरु पनि आउन थालेकोले सेनिटाइज गरिएको दमक लखनपुरका अध्यक्ष राजु खड्काले बताउनु भयो । सो क्रममा विद्यालयको गेटदेखि नै सेनिटाइज गरिएको थियो । विद्यालयको अफिस, कक्षा कोठा सबै क्षेत्रको सेनिटाइज गरिएको भन्दै अध्यक्ष खड्काले साप्ताहिक कार्यक्रम अन्तरगत आज हिमावीमा सेनिटाइज गरिएको बताउनु भयो ।

सेनिटाइज कार्यक्रम लायन्स क्लब अफ दमक लखनपुर, लायन्स क्लब अफ दमक एक्टिभ, लायन्स क्लब अफ दमक गरिमाले संयुक्त रुपमा गरेका हुन् ।

रिजन चियरपर्सन चन्द्र गजमेरको प्रमुख आतिथ्यतामा भएको कार्यक्रममा विशिष्ठ अतिथि जोन चियरपर्सन हेमसिंह अधिकारी, विद्यालयका प्रधानाध्यापक ओम प्रसाद आचार्य, लायन्स क्लब अफ दमक एक्टिभको अध्यक्ष कल्पना पोखरेल, गरिमाका अध्यक्ष नविन अग्रवाल, लिओका अध्यक्ष दीपना भट्टराई आइपीपी अनिस खड्का लगायतको उपस्थिति रहेको थियो । दमक लखनपुरका सेकेण्ड भाइस प्रेसिडेण्ट दयासागर आचार्यको संयोजनमा भएको कार्यक्रम सचिव दिपक खड्काले संचालन गर्नु भएको थियो ।

 

हिमानी कोष झापाद्धारा भद्रपुरमा राहत वितरण

 

उत्तम रिजाल,दमक। सामाजिक कार्यमा सक्रिय संस्था हिमानी कोषले आज झापाको भद्रपुर नगरपालिकाका २० विपन्न परिवारलाई खाद्यान्न सामाग्री वितरण गरेको छ । पूर्व युवराज्ञी हिमानी शाहको नेतृत्वमा रहेको सो संस्थाले नगर क्षेत्रका अपांग, वृद्धवृद्धा, एकल महिला तथा विपन्न समुदायका परिवारलाई राहत सामाग्री वितरण गरेको हो । हिमानी कोषले भद्रपुर ६ र ७ का २० परिवारलाई खाद्यान्न सामग्री वितरण गरेको हो । कोषले प्रति परिवार २५ केजी चामल वितरण गरेको उत्तम भट्टराईले जानकारी दिनुभयो ।

कोभिड–१९ महामारी पश्चात देशभर हिमानी कोषले राहत वितरणलाई तिब्र बनाएको छ । सोही अन्तरगत हिमानी कोषको सहयोगमा भद्रपुरका विपन्न परिवारलाई राहत चामल हस्तान्तरण गरिएको हिमानी कोष झापाकी अगुवा पुनमसिंह राजवंशीले बताउनु भयो । कोषले समयानुसार आवश्यकतालाई हेरेर थप सहयोग गर्ने पनि उहाँले बताउनु भयो ।

२०७८, असार ४

चुलाचुलीलाई ४ अक्सिजन सिलिण्डरसहित स्वास्थ्य सामाग्री प्रदान

 

उत्तम रिजाल, दमक/ कोरोना संक्रमितहरुलाई उपचारको लागि अभावका रुपमा रहेको अक्सिजन सिलिण्डरसहित इलामको चुलाचुली गाउँपालिकालाई आज विभिन्न स्वास्थ्य सामाग्री प्रदान गरिएको छ । 

सो सामाग्री भुटानी शरणार्थी शिविर बेलडाँगीका शिविर प्रमुख सुरेन्द्र दाहालले प्रदान गर्नु भएको हो । उहाँले गाउँपालिकाका प्रमुख प्रदिपचन्द्र राईलाई सो सामाग्री प्रदान गर्नु भएको हो ।

अमेरिकामा रहेको ग्लोबल भुट्निज हिन्दु अर्गनाइजेशनका तर्फबाट सो अर्गनाइजेशनका अध्यक्ष कमल धिमालले पठाएका ती सामाग्री एक कार्यक्रमकाविच शिविरको कार्यालयबाट शिविर प्रमुख दाहालले प्रदान गर्नु भएको हो ।

चुलाचुलीलाई प्रदान गरिएका सामाग्रीमा ४ ओटा अक्सिजन सिलिण्डर, ४ ओटा अक्सिजन रेगुलेटर, २० ओटा सिराने सहित बेडसीट, एक अक्सिमिटर, १० लिटर सेनिटाइजर, एक हजार ओटा सर्जिकल मास्क र २० ओटा केएन ९५ मास्क छन् ।

सहयोग हस्तान्तरण कार्यक्रममा शिविर व्यवस्थापन समितिका सल्लाहकार टिआर कालिकोटे लगायतको उपस्थिति रहेको थियो । ति सामाग्रीहरु कोरोना संक्रमित भुटानी शरणार्थी तथा शरणार्थी आसपासका संक्रमितहरुको उपचारमा सहयोग गर्ने उदेश्यले प्रदान गरिएको शिविर प्रमुख दाहालले जानकारी दिनुभयो ।

२०७८, जेठ २४

शिविर प्रमुखद्धारा दमक र मिक्लाजुङ्गलाई अक्सिजन सिलिण्डर सहित स्वास्थ्य सामाग्री हस्तान्तरण

 

उत्तम रिजाल, २३ जेठ ,दमक/ कोरोना भाइरस संक्रमितले अक्सिजन अभाबमा मृत्युबरण गरिरहेको अबस्थामा झापाको दमक स्थित भुटानी शरणार्थी शिविरका शिविर प्रमुख सुरेन्द्रराज दाहालले दुई स्थानीय तहका लागि ८ ओटा अक्सिजन सिलिण्डर हस्तान्तरण गर्नु भएको छ ।

वहाँले झापाको दमक नगरपालिकालाई दमक कोभिड उपचार केन्द्रका लागि ३ ओटा र मोरङ्गको मिक्लाजुङ्ग गाउँपालिकाको आइसोलेशन तथा उपचारकेन्द्रको लागि ५ ओटा गरी ८ ओटा ठूलो साइजको अक्सिजन सिलिण्डर सहित अन्य स्वास्थ्य सामाग्री हस्तान्तरण गर्नु भएको हो । 

बेलडाँगी स्थित भुटानी शरणार्थी शिविरमै सहयोग हस्तान्तरण गर्दै शिविर प्रमुख दाहालले भुटानी शरणार्थीहरु तथा अन्य कोरोना संक्रमितहरुले अक्सिजनको अभावमा मृत्युवरण गर्नु नपरोस भनेर सहयोग हस्तान्तरण गरेको बताउनु भयो । त्यस्तै शिविर सचिव कृष्ण सुब्बाले शिविर भित्रका कोहिपनि संक्रमित भए उनीहरुलाई उपचार गर्न तथा शिविर बाहिरका अन्य संक्रमितको उपचारमा अक्सिजनको अभाब हुन नदिन दाताबाट प्राप्त स्वास्थ्य सामाग्री सहयोग गरिएको बताउनु भयो ।

सोक्रममा दमक नगरपालिकालाई ३ ओटा, मिक्लाजुङ्ग गाउँपालिकालाई ५ ओटा अक्सिजन रेगुलेटर पनि सहयोग गरिएको छ । त्यस्तै मिक्लाजुङ्गलाई सिराने सहितको ३० बेड सीट र दमकलाई २० बेड सीट तथा एक/एक हजार सर्जिकल मास्क, २०/२० ओटा केएन ९५ मास्क प्रदान गर्नुभयो । त्यस्तै मिक्लाजुङ्गलाई एक ओटा अक्सिमिटर र दश लिटर सेनिटाइजर पनि दिइएको छ ।

ती स्वास्थ्य सामाग्रीहरु मिक्लाजुङ्ग गाउँपालिकाका लागि गाउँपालिका प्रमुख देवीप्रसाद आचार्य र दमक नगरपालिकाका लागि उप–प्रमुख गिता अधिकारीलाई हस्तान्तरण गरिएको छ ।

क्याम्प सचिव कृष्ण सुब्बाको अध्यक्षतामा भएको सहयोग हस्तान्तरण कार्यक्रममा क्याम्पका सल्लाहकार टिकाराम कालीकोटे, शसस्त्र प्रहरीबल बेलडाँगी बेस क्याम्पका प्रमुख गोपाल पोखरेल, लगायतको उपस्थिति रहेको थियो । सो सहयोग ग्लोबल भुट्निज हिन्दु अर्गनाइजेशनको तर्फबाट अध्यक्ष कमल धिमालले पठाएका थिए । उनी अमेरिकामा बस्दै आएका छन् ।

सहयोगी हातले गर्यो सुरक्षाकर्मीलाई सहयोग

दमक। सहयोगी हात नेपालले कोरोना महामारीसँगैको निषेधाज्ञामा खटिएका सुरक्षाकर्मीका लागि सहयोग गरेको छ । उसले दमक, केर्खा, चुलाचुली लगायतका प्रहरीहरुको लागि जारसहितको पिउने पानी, मास्क र सेनिटाइजर सहयोग गरेको हो ।

वितरण पछि संस्थाका अध्यक्ष छविलाल बाँसकोटाले  यो विषम परिस्थितिमा जनमानसको निम्ति अहोरात्र खटिएका सुरक्षाकर्मी लाई केही मात्रामा राहत मिलोस भन्ने अभिप्रायले सहयोग गरेको प्रतिक्रिया दिनुभयो । 

सो संस्थाले दमकको डाँफेमुनाल चोक, ताराबारी प्रहरी विट,फाल्गुनन्द चोक प्रहरी विट,  पाडाँजुगी प्रहरी विट केर्खा प्रहरी विट इलामको चुलाचुली प्रहरी चौकी तथा दमक कोभिड अस्पताल बेलडाँँगीमा पिउने पानी, जार, मास्क ,सेनिटाइजर वितरण गरेको छ । 

सो क्रममा संस्था अध्यक्ष छविलाल बास्कोटा, वरिष्ठ उपाध्यक्ष रमा लिम्बू , उपाध्यक्ष भानुभक्त खतिवडा सचिव रमेश अधिकारी कोषाध्यक्ष ख्यामराज अधिकरी, सल्लाहकार बिमल शर्मा,ताराप्रसाद अधिकारी, लगायतको उपस्थिति रहेको थियो । 

२०७८, जेठ २

थप ९ हजार १९६ जनामा संक्रमण, ५० जनाको मृत्यु

काठमाडौं/  पछिल्लो २४ घण्टामा ९ हजार १९६ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार १९ हजार ९८७ पीसीआर परीक्षणमा ९ हजार २३ र ४९५ एन्टिजेन परीक्षणमा ७३ जना गरी ९ हजार १९६ जनामा संक्रमण पुष्टि भएको हो ।

कोरोना भाइरस संक्रमणका कारण पछिल्लो २४ घण्टामा ५० जनाको मृत्यु भएको छ, त्यस्तै २ हजार ९०५ जनामा संक्रमणमुक्त भएका छन् । नेपालमा कोरोना भाइरसको सक्रिय संक्रमित संख्या ७८ हजार ६२९ पुगेको छ भने कोरोना भाइरस संक्रमणबाट शुक्रबारसम्म ३  हजार ५७९ जनाको मृत्यु भएको छ ।

७२८ जना आईसीयूमा र २३१ जना भेन्टिलेटरमा उपचाररत छन् । त्यस्तै  ७२ हजार ७६९ जना होम आइसोलेसनमा छन् भने ५ हजार ८६० जना संस्थागत आइसोलेसनमा छन् । हालसम्म संक्रमणमुक्त हुनेको संख्या २ लाख ९५ हजार ३९५ पुगेको छ ।

२०७८, बैशाख २४

कोरोना संक्रमित बढेसँगै दमकमा मास्क बाढ्दै बाणिज्य संघ

 उत्तम रिजाल, दमक/ एकै दिन १५ जनामा कोरोना भाइरस संक्रमण पुष्टि भएसँगै झापाको दमकमा उद्योग बाणिज्य संघले व्यापारी तथा सर्वसाधारणमा सचेत रहन आग्रह गर्दै मास्क वितरण शुरु गरेको छ ।

उसले आज विहान दमकको नयाँ सब्जि बजार क्षेत्रका व्यापारी तथा सर्वसाधारणमा मास्क वितरण गरेको छ । उद्योग बाणिज्य संघका बरिष्ठ उपाध्यक्ष गोपाल गुरागाई, प्रथम उपाध्यक्ष राजु खड्का, राजकुमार योङया, रमा लिम्बु लगायत बाणिज्य संघका अन्य पदाधिकारी लगायतको टोलीले मास्क वितरण गरेको हो ।

विहान मात्र एक हजार हाराहारीमा मास्क वितरण गर्दै कार्यक्रम गरेको उसले दिउँसो बैठक बसी थप निर्णय गर्ने बाणिज्य संघका प्रथम उपाध्यक्ष राजु खड्काले जानकारी दिनुभयो । दमकमा हिजो मात्र वडा नम्बर २, ४, ६ र ८ का ७ महिला र ८ पुरुष गरी १५ जनामा कोरोना भाइरस संक्रमण पुष्टि भएको छ ।

कोरोना संक्रमित प्रहरीको लापर्वाही, सुटुक्क गए बुट्बल

दमक। झापाको मेचीनगर नगरपालिकाबाट स्वाब संकलन गरी पीसीआर परीक्षणका लागि धरान पठाइएको स्वाबको रिपोर्ट नआइ नै नेपाल प्रहरीका एक अधिकृत बुट्बल गएको खुल्न आएको छ । मेचीनगरबाट गत २५ गते स्वाब संकलन गरिएका थियो ।

जसको आज रिपोर्ट आएको भएपनि रिपोर्ट नआउँदै कोरोना संक्रमित प्रहरी नायब निरीक्षक आज दिउँसो नै बुट्बल पुगेको खुल्न आएको हो । उनी घर विदामा आएर मेचीनगर ७ को उनको घरमा नै होम क्वारेन्टाइनमा बस्दै आएका थिए ।

तर उनी आज रिपोर्ट आउँदा बुट्बल पुगेका थिए । प्रहरी जस्तो जिम्मेवार व्यक्ति भएर पनि यसरी रिपोर्ट नआउँदै बाहिर हिड्नुले कोरोना संक्रमण बढाउन थप बल पुग्ने देखिएको छ । श्रोतका अनुसार उनी अख्तियार बुट्बलमा कार्यरत हुन् ।

मेचीनगरमा आज ती प्रहरीसहित ४ जनामा कोरोना संक्रमण भएको पुष्टि भएको थियो । जसमध्ये दुई जनालाई स्वास्थ्य चौकी धाइजनको आइसोलेसनमा र एक जनालाई मेचीनपाको आम्दा अस्पतालमा राखिएको छ । प्रहरी भने कोरोना पोजेटिभ भएको रिपोर्ट आउँदा बुट्बल आसपास सरर हिडिरहेका थिए ।

 

गौरादहका ५ जनामा कोरोना संक्रमण पुष्टि

 दमक। झापाको गौरादह नगरपालिकाका ५ जनामा कोरोना भाइरस संक्रमण पुष्टि भएको छ । गौरादहबाट १ सय ५ जनाको स्वाब संकलन गरी पीसीआर परीक्षणका लागि पठाइएको थियो ।

जसमध्ये ५ जनामा कोरोना भाइरस संक्रमण पुष्टि भएको नगरपालिकाका स्वास्थ्य शाखाका संयोजक पर्शुराम भट्टराईले जानकरी दिनुभयो । कोरोना संक्रमण पुष्टि हुनेमा दुई जना सशस्त्र प्रहरी बलमा कार्यरत भइ विदामा घर आएका हुन भने तीन जना साउदी अरबबाट आएका पुरुषहरु हुन् । 

जसमा वडा नम्बर ७ र ९ का दुई–दुई जना पुरुष तथा वडा नम्बर ५ का एक पुरुष छन् । योसँगै गोरादहमा कोरोना संक्रमण पुष्टि हुनेको संख्या १६ पुगेको छ । यद्यपि यसअघिका ११ जनाले भने कोरोना जितिसकेका छन् ।

कोरोना संक्रमित आएको थाहापाएपछि हस्पिटल बन्द

दमक। झापाको दमकमा रहेको दमक हस्पिटल बन्द गरिएको छ । आज कोरोना संक्रमण पुष्टि भएका सशस्त्र प्रहरीका एक पुरुष हस्पिटलमा जाँच गराउन गएको खुल्न आएसँगै हस्पिटल बन्द गरिएको अस्पताल श्रोतले बताएको छ । उनी कोरोना परीक्षणको रिपोर्ट नआउँदै दिउँसो हस्पिटल गएका थिए । 

उनको दमक नगरपालिकाबाट स्वाब संकलन गरी बुधबार पीसीआर परीक्षणका लागि पठाइएको थियो । दमकबाट पठाइएका एक सय ७ जनामध्ये आज ४७ जनाको रिपोर्ट आएको थियो । जसमा उनको मात्र रिपोर्ट पोजेटिभ आएको नगरपालिकाको क्वारेन्टाइन व्यवस्थापन समितिका सदस्यसचिव कुबेरप्रसाद भट्टराईले जानकारी दिनुभयो ।

हस्पिटलमा उनी दिउँसो जाँच गराउन गएको श्रोतले बतायो । उनी साथीसँग गएको र उनमा रुगा लागेको अबस्थामा अस्पताल गएको श्रोतले बतायो । श्रोतले भन्यो, उनी दिउँसो हस्पिटल आएका थिए । उनीसँगै अर्का साथी पनि आएका थिए । दुबै जनाले चेक जाँचका लागि पुर्जा लगेको र पछि हस्पिटलबाट फर्किएका थिए । हस्पिटलमा दिउँसो धेरै भिड रहेको पनि बुझिएको छ ।

हस्पिटलका कार्यकारी निर्देशक तेजराज घिमिरेले यो विषम परिस्थितिमा पनि जनतामा सेवा दिदैं आएको तर सुरक्षा निकायका सदस्यबाट नै लापर्वाही गर्नाले हस्पिटलले सेवा दिन नसक्ने बताउनु भयो । वहाँले भन्नु भयो, कन्ट्रयाक ट्रेसिङ्गको रिपोर्ट नआएसम्म सम्पूर्ण सेवा बन्द गरिएको छ । 

नगरपालिकाको क्वारेन्टाइन व्यवस्थापन समितिका सदस्यसचिव भट्टराईले ३–४ दिनमा उनको सम्पर्कमा आएका र हस्पिटलका को–को सँग उनको भेट भएको थियो, तिनीहरुले को–को सँग भेट गरे तिनीहरु सबैको परीक्षण गरिने बताउनु भयो ।

 स्वाब संकलन गरीएका व्यक्ति रिपोर्ट नआउँदैं खुल्लम खुला हिडेको पाइएसँगै त्रास बढेको छ । उनमा कोरोना पुष्टि भएको खबर पाएपछि हस्पिटलमा काम गर्नेहरुमा पनि त्रास बढेको छ । एक जनाले नाम नखुलाउने शर्तमा भने, जनतालाई सुरक्षा दिनेबाटै यत्रो गल्ति हुन्छ भने अन्य सर्वसाधारणले के गर्लान । उनको हेल्चेक्राइले अन्यमा पनि संक्रमण भएमा त्यसको जिम्मेबार को हुने ? दमकमा भयावह स्थिति आएमा त्यसको जिम्मेवारी कसले लिने । आजको यस घटनाले सुरक्षा निकायसँग पनि सचेत हुनुपर्ने देखिएको छ ।

प्रदेश २ का कानूनमन्त्री यादवलाई कोरोना भएसँगै प्रदेश १ का आन्तरिक मामिला तथा कानूनमन्त्री हिक्मत कार्की होम क्वारेन्टाइनमा

दमक। प्रदेश नं १ का आन्तरिक मामिला तथा कानूनमन्त्री हिक्मत कार्की होम क्वारेन्टाइनमा बस्नु भएको छ । यही साउन १४ गते प्रहरी समायोजनसम्बन्धी समन्वय समितिको बैठकमा समितिमा रहेका प्रदेशका आन्तरिक मामिला तथा कानूनमन्त्रीहरु, संघीय सरकारका गृहमन्त्रीलगायतले बालुवाटार पुगेर प्रधानमन्त्रीसँग छलफल गरेका थिए ।

देशमा प्रहरी व्यवस्थापन सम्बन्धमा काठमाण्डौंमा भएको छलफलमा सहभागी प्रदेश नं. २ का आन्तरिक मामिला तथा कानूनमन्त्री ज्ञानेन्द्रकुमार यादवलाई कोरोना सक्रमण भएको पुष्टि भएसँगै मन्त्री कार्की होम क्वारेन्टाइनमा बस्नु भएको वहाँका स्वकीय सचिव कमल पौडेलले जानकारी दिनुभयो।

काठमाडौंमा प्रदेश प्रहरी विधेयक पारित भइसकेपछि प्रदेशमा प्रहरी व्यवस्थापन सम्बन्धमा भएको छलफलमा ७ वटै प्रदेशका आन्तरिक मामिला तथा कानूनमन्त्री सहभागी रहनु भएको थियो ।

कार्कीको सचिवालयले १६ साउनपछि मन्त्रीसँग भेटघाट गर्ने र प्रत्यक्ष सम्पर्कमा पुग्नेहरूलाई सतर्क रहन आग्रह समेत गरेको छ । मन्त्री कार्कीका स्वकीय सचिव कमल पौडेलका अनुसार मन्त्री कार्कीले आफूहरूसँग प्रत्यक्ष सम्पर्कमा रहेका सबैलाई स्वाब परीक्षण गर्न आग्रह समेत गर्नु भएको छ ।

झापामा १२ सशस्त्र प्रहरीसहित १३ जनामा कोरोना सङ्क्रमण

दमक/  झापामा शुक्रबार १२ जना सशस्त्र प्रहरीसहित १३ जनामा कोरोना भाइरस सङ्क्रमण पुष्टि भएको छ । पूर्वी नाका काँकडभिट्टास्थित राजस्व तथा भन्सार गुल्ममा कार्यरत १२ जना र अर्जुनधारा नगरपालिकाका एक सर्वसाधारणमा कोरोना भाइरस सङ्क्रमण पुष्टि भएको हो ।

काँकडभिट्टा सशस्त्रका १२ जनामा कोरोना सङ्क्रमण पुष्टि भएको मेचीनगर नगरपालिकाका फोकल पर्सन नवीन बरालले जानकारी दिए । उनका अनुसार मेचीनगर नगरपालिकाबाट ३२ जना सशस्त्र प्रहरीसहित एक सय १७ जनाको स्वाब सङ्कलन गरी पीसीआर परीक्षणका लागि पठाइएको थियो । जसमा १२ जना सशस्त्रमा कोरोना सङ्क्रमण पुष्टि भएको हो ।

सशस्त्रका कोरोना सङ्क्रमित हुनेमा १० पुरुष र २ महिला छन् । सङ्क्रमित हुने पुरुषहरु २७ वर्षदेखि ४० वर्षसम्मका छन् । त्यस्तै, दुवै महिला २७ वर्षीया हुन् । योसँगै काँकडभिट्टामा कोरोना सङ्क्रमित हुने सशस्त्र प्रहरीको सङ्ख्या ३२ पुगेको छ । यसअघि सोही गुल्मका २० जनामा कोरोना सङ्क्रमण पुष्टि भएको थियो । उनीहरु आइसोलेसनमा छन् ।

सङ्क्रमित १० पुरुषलाई मोरङको गोठगाउँस्थित पूर्वाञ्चल विश्वविद्यालयको कोभिड अस्पताल पठाइएको छ भने २ महिलालाई धरानस्थित बीपी कोइराला स्वास्थ्य विज्ञान प्रतिष्ठानको कोभिड अस्पताल पठाइएको छ । शुक्रबार आएको रिपोर्टले मेचीनगरमा समुदायमा भने कोरोना सङ्क्रमण नभएको प्रस्ट भएको मेचीनगर नगरपालिकाको उपप्रमुख मीना पोखरेल उप्रेतीले प्रतिक्रिया दिइन् ।

उप्रेतीले भनिन, ‘मेचीनगरबाट पठाइएका एक सय १७ जनामध्ये १२ जनामा कोरोना देखियो, ती सबै सशस्त्रका हुन् । समुदायका कसैको पनि रिपोर्ट पोजेटिभ देखिएन । यसले समुदायमा कोरोना फैलिएको छैन भन्ने प्रस्ट भएको छ ।’

उप्रेतीले सशस्त्रका थपमा कोरोना देखिनुले सङ्क्रमित एउटै हलमा बस्दा पनि कोरोना फैलन सक्ने देखिएको भन्दै सामुदायिक भवनलाई क्वारेन्टाइन बनाउन उपयुक्त नहुने देखिएको बताइन । उपप्रमुख उप्रेतीले सबैमा सचेत रहन पनि अनुरोध गरेकी छन् । उनले सञ्चार क्षेत्रले सही सूचना सम्प्रेषण गरेर खबरदारी गर्न पनि अनुरोध गरिन ।

यससँगै झापामा कोरोना सङ्क्रमित सशस्त्रको सङ्ख्या ३५ पुगेको छ । बिहीबार मात्र झापाको पाथीभरा शिक्षालयका तीन जनामा कोरोना सङ्क्रमण पुष्टि भएको थियो । त्यस्तै, अर्जुनधारा नगरपालिका–१ का ३१ वर्षीय पुरुषमा कोरोना सङ्क्रमण पुष्टि भएको छ । उनलाई थप उपचारका लागि गोठगाउँ पठाइएको छ । यससँगैै झापामा कोरोना सङ्क्रमित हुनेको सङ्ख्या ३ सय ६८ पुगेको छ ।

नेपालमा कोरोना सङ्क्रमितको सङ्ख्या १९ हजार नाघ्यो

दमक/ नेपालमा कोरोना भाइरस (कोभिड–१९) सङ्क्रमितको सङ्ख्या १९ हजार नाघेको छ । स्वास्थ्य तथा जनसङ्ख्या मन्त्रालयले मङ्गलबार दिएको जानकारीअनुसार मङ्गलबार थप ३ सय ११ जनामा कोरोना पोजिटिभ देखिएको हो ।

विभिन्न २७ प्रयोगशालामा ४ हजार ३२ जनामा गरिएको परीक्षणमा थप ३ सय ११ जनामा सङ्क्रमण पुष्टि भएको मन्त्रालयका प्रवक्ता प्रा.डा. जागेश्वर गौतमले जानकारी दिए ।

यससँगै नेपालमा कोरोनाबाट सङ्क्रमण हुनेको सङ्ख्या १९ हजार ६३ पुगेको छ । जसमध्ये सङ्क्रमितको सङ्ख्या ५ हजार १ सय ३९ रहेको छ । यता, नेपालमा कोरोनामुक्त हुनेको सङ्ख्या १३ हजार ८ सय ७५ पुगेको छ । पछिल्लो २४ घण्टामा थप १ सय २१ जना कोरोनालाई जितेर घर फर्किएका छन् ।

घरमै बसेका बाह्रदशीका २ जनामा कोरोना, ३ वडा सिल

दमक/ 

झापाको बाह्रदशी गाउँपालिकाको तीनवटा वडा सिल गरिएको छ । घरमै बसेका दुई जना पुरुषमा कोरोना भाइरस सङ्क्रमण पुष्टि भएपछि गाउँपालिकाको वडा नम्बर १, २ र ३ अर्थात साबिकको राजगढ सिल गरिएको वडा नम्बर ३ का वडाध्यक्ष वीरेन्द्रप्रसाद राजवंशीले जानकारी दिनुभयो ।

घरमै बस्दै आएका उनीहरुमा कोरोना सङ्क्रमण पुष्टि भएसँगै कोरोना समुदायमा प्रवेश गरिसकेको देखिएको छ । यही साउन ८ गते स्वाब सङ्कलन गरी पीसीआर परीक्षणका लागि प्रादेशिक प्रयोगशाला विराटनगर पठाइएकोमा सोमबार आएको रिपोर्टमा कोरोना पोजेटिभ देखिएको हो ।

कोरोना पोजेटिभ देखिनेमा बाह्रदशी गाउँपालिका–३ का ५१ वर्षीय र वडा नम्बर–२ का ४० वर्षीय पुरुष हुन् । सङ्क्रमण पुष्टि भएकामा एक जना राजनीतिकर्मी हुन् भने अर्का स्वाथ्यकर्मी हुन् । घरमै बसेकामा कोरोना सङ्क्रमण देखिएपछि स्थानीयमा त्रास बढेको छ । दुवै जना समाजमा घुलमिल हुने भएकाले कोरोना सङ्क्रमण देखिएपछि कोरोना नियन्त्रण स्थानीय समन्वय समितिको आकस्मिक बैठक बसी यी वडाहरु सिल गर्ने निर्णय भएको हो ।

बैठकमा गाउँपालिकाका प्रमुख, उपप्रमुख, सुरक्षाकर्मी, उद्योग वाणिज्य संघका अध्यक्ष तथा अन्य वडाका वडा अध्यक्षसहित राजनीतिक दलका प्रतिनिधि लगायतको उपस्थिति रहेको थियो । बैठकपछि समितिले ती वडाहरु आज मध्यराति देखि लागू हुनेगरि सिल गरेको भनि सूचना निकालेको छ । घरमै बसेकामा सङ्क्रमण देखिएकाले झापाका प्रमुख जिल्ला अधिकारी उदयबहादुर रानाले उनीहरुसँगको भेटघाट भएकाहरुको खोजी गरी स्वाब सङ्कलन गरी पीसीआर परीक्षणको रिपोर्ट नआउन्जेलसम्मका लागि सो क्षेत्रमा लकडाउन गरिएको बताए ।

त्यस्तै, वडा नम्बर ३ का वडा अध्यक्षले भोलि मङ्गलबार उनीहरुको ट्राभल हिस्ट्री, क्लोज कन्ट्र्याक ट्रेसिङ गर्ने तथा डिटेल लिने बताए । त्यसपछि उनीहरुको स्वाब सङ्कलन गरी कोरोना सङ्क्रमण भए नभएको परीक्षण गर्ने बताए । सोको रिपोर्ट नआएसम्म तोकिएको क्षेत्र खुला नहुने राजवंशीले बताए ।

उनले निर्माण सामग्री, यातायात, होटल, रेस्टुरेन्ट, यातायात,बैंक तथा वित्तिय संस्थाहरु पनि बन्द रहने सवाल नेपाललाई जानकारी दिनुभयो । सङ्क्रमित दुवै जनालाई मोरङको गोठगाउँस्थित पूर्वाञ्चल विश्वविद्यालयको कोभिड अस्पताल पठाइएको पनि वडा अध्यक्ष राजवंशीले जानकारी दिनुभएको छ ।

पीसीआर ल्याब छिटो सञ्चालन गर्न झापाका राजनीतिक दलको सरकारसँग माग

बिर्तामोड/ एकका लागि एक अभियानको पूर्ण सहयोगमा जनस्तरबाट झापाको कोटिहोमस्थित समर्पण भवनमा सञ्चालनमा आउन लागेको पीसीआर ल्याब छिटो सञ्चालन गर्न झापाका राजनीतिक दलले सरकारसँग माग गरेका छन् ।

सरकार, सहकारी र समुदायको सहकार्यमा स्थापना गर्न लागिएको पीसीआर ल्याब यही साउन १० गतेभित्र परीक्षणका लागि तयार हुँदै छ । ल्याब प्रदेश सरकारअन्तर्गत मेची अञ्चल अस्पतालको मातहतमा रहने गरी सञ्चालन अनुमतिको पर्खाइमा छ ।

अभियानले ल्याब तयार पारिसकेपछि सरकारलाई हस्तान्तरण गर्नेछ । सञ्चालनको सम्पूर्ण जिम्मेवारी प्रदेश सरकारले लिने गरी हस्तान्तरण गर्न राजनीतिक दलका प्रमुखहरुका राय छ । अभियानले यसअघि नै ल्याब निर्माण सम्पन्न गरेर सरकारलाई जिम्मा लगाउने बताइसकेको छ ।

बिहीबार ल्याब रहेको भवनमा भएको छलफल कार्यक्रममा नेपाली काङ्ग्रेस झापाका सभापति उद्धव थापा, महासमिति सदस्य देउमान थेवे, जनता समाजवादी पार्टी झापाका अध्यक्षद्वय अनुतसिंह राजवंशी, दिपेनबाला राई, राप्रपा झापाका सचिव केशवराज ओझा, कनकाईका नगरप्रमुख राजेन्द्रप्रसाद पोखरेल लगायतले संघीय र प्रदेश सरकारसँग ल्याब सञ्चालनको अनुमतिका लागि जोडदार माग गरेका हुन् ।

छलफलमा सहायक प्रमुख जिल्ला अधिकारी उमेश पाण्डे, झापाका निमित्त प्रहरी प्रमुख राकेश थापा, अनारमनीका प्रहरी प्रमुख मुकुन्द रिजाललगायत अभियानका सदस्यहरुको उपस्थिति रहेको थियो ।

पीसीआर ल्याब साउन १० गतेभित्र तयार हुने र सञ्चालनका लागि सरकार सकारात्मक बन्नुपर्ने अभियानका संयोजक महेन्द्रकुमार गिरीले बताएका छन् । ल्याब स्थापना हुने समर्पण भवनमा आवश्यक संरचना निर्माण, घेराबारा, वायरिङ, एसीलगायत उपकरण राख्ने टेबल जडान कार्य सकिएको उनले जानकारी दिए ।

ल्याबका लागि आवश्यक पीसीआर मेसिन, वायोसफ्टी क्याबिनेट, माइनस ८० डिग्रीका फ्रिज, सेन्ट्रिफुगल, आवश्यक किट तथा अन्य सामग्री समर्पण भवनमा आइसकेको सहसंयोजक विनोद बस्नेतले जानकारी दिए । 

पीपीईलगायत थप किट प्रदेश सरकारले परीक्षण सुरु भएपछि व्यवस्थापन गर्ने बताइएको छ ।

ल्याब स्थापनाका लागि अन्तर्राष्ट्रिय झापाली समाज र झापा जिल्ला सहकारी संघको समन्वयमा २५/२५ लाख रुपैयाँ प्रदान गरेका छन् भने विभिन्न वित्तीय संस्था तथा व्यक्तिगत र संस्थागत रुपमा सामाजिक संघसंस्थाले रकम सहयोग गरिरहेका छन् । ल्याब स्थापनाका लागि अभियानले १ करोड २० लाख रुपैयाँ सङ्कलन गरिसकेको छ ।

प्रदेश १ मा सङ्कलन भइरहेको र्यालको नमुना सङ्ख्याको तुलनामा ल्याबको अभाव छ । प्रदेश १ को सबैभन्दा बढी कोरोना सङ्क्रमित जिल्ला झापा हो । अब झापासहित इलाम, पाँचथर, ताप्लेजुङ र पूर्वोत्तर मोरङबाट सङ्कलित नमुना परीक्षणमा सहज हुनेछ ।

गौरीगञ्जका ३ जनामा कोरोना संक्रमण पुष्टि

दमक। झापाको गौरीगञ्ज गाउँपालिकाका ३ जनामा कोरोना भाइरस संक्रमण पुष्टि भएको छ । गाउँपालिकाबाट पठाइएका ३७ जनाको पीसीआर परीक्षणमा ३ जनाको रिपोर्ट पोजेटिभ आएको क्वारेन्टाइन फोकल पर्सन अनुप शर्माले जानकारी दिनु भयो ।

वहाँका अनुसार कोरोना पुष्टि हुनेमा वडा नम्बर ५ का दुई जना र वडा नम्बर ६ का एक जना छन् । उनीहरु भारतबाट आएर क्वारेन्टाइनमा बस्दै आएका थिए । संक्रमण पुष्टि भएका वडा नम्बर ५ का १९ र २२ वर्षीय पुरुष हुन भने वडा नम्बर ६ का २१ वर्षीय हुन् ।

संक्रमण पुष्टि भएकाहरुलाई गोठगाउँ स्थित पूर्वाञ्चल विश्वविद्यालयको कोभिड अस्पताल पठाइएको फोकल पर्सन शर्माले

जानकारी दिनु भयो । योसँगै गौरीगञ्जमा कोरोना संक्रमण पुष्टि हुनेको संख्या २२ पुगेको छ ।

दमकका थप एक जनामा कोरोना पुष्टि

दमक। झापाको दमक नगरपालिकामा थप एक जनामा कोरोना संक्रमण पुष्टि भएको छ । योसँगै दमकका कोरोना संक्रमितको संख्या १० पुगेको छ । आइतबार दमकबाट पठाइएका ३२ जनाको स्वावको पिसीआर परीक्षणमा एक जनामा कोरोना संक्रमण पुष्टि भएको हो ।

पुष्टि हुनेमा काँकडभिट्टा नाकाहुँदै भारतबाट २५ गते आएर मानसरोबर क्वारेन्टाइनमा बस्दै आएका ४३ वर्षीय पुरुष छन् । श्रोतका अनुसार उनी दमकको वडा नम्बर ८ का हुन् । संक्रमण पुष्टि भएसँगै उनलाइ गोठगाउँ स्थित पूर्वाञ्चल विश्वविद्यालयको कोभिड अस्पतालमा पठाइएको छ ।

दमकबाट पीसीआर परीक्षणका लागि २४ जना पुरुष र ८ जना महिलाको स्वाब संकलनगरी पठाइएको थियो । स्वाव पठाइएकामा दमकको मानसरोबर क्वारेन्टाइनका १६ जना थिए भने महिला क्वारेन्टाइनका ३ जना र अस्पतालका ७ जना थिए ।

त्यस्तै होम क्वारेन्टाइनका ६ जना थिए । रिपोर्ट नेगेटिभ आएका मध्ये क्वारेन्टाइनबाट आज १२ जना घर फर्किएका छन् । दमकका संक्रमित मध्ये ६ जनाले कोरोना जितेर घर फर्किसकेका छन् ।

x