तातोपानी सडक खुलाउन चीनसँग अनुरोध गर्ने सरकारको तयारी

१३ असार/   भूकम्पले चिरा पारेको पहाडबाट वर्षासँगै पहिरो आउने क्रम

बढेपछि सरकारले तातोपानी सडक खुलाउन चीनसँग अनुरोध गर्ने तयारी गरेको छ । तत्काल सडक खुलाउन सरकारी स्रोतसाधनले असम्भव देखेपछि चीनले दिने अनुदानबाटै खर्च हुने गरी बाह्रबिसे–तातोपानी खण्डको २६ किलोमिटर सडकको पहिरो पन्छाउन अनुरोध गर्न लागिएको हो। अरनिको राजमार्गको १ सय ३ किमिदेखि मितेरी पुलसम्मको ११ किमि सडकको माथिल्लो भागबाट लगातार पहिरो झरेपछि सीमित स्रोतसाधनले तत्काल सडक खुलाउन कठिन हुने निष्कर्ष सरकारी पक्षले निकालेको छ । यसका लागि चीन सरकारलाई अनुरोध गर्न आग्रह गर्दै वाणिज्य तथा आपूर्ति मन्त्रालयले परराष्ट्र मन्त्रालयलाई पत्राचार गरेको छ । वाणिज्यका सहसचिव जीवराज कोइरालाका अनुसार परराष्ट्रले भौतिक योजना र अर्थ मन्त्रालयको सहमति लिएर चीनसँग अनुरोध गर्नेछ । ‘मौखिक रूपमा त चिनियाँ दूतावाससँग पनि कुरा भएको छ,’ कोइरालाले भने, ‘उनीहरूले लिखित अनुरोध आउने बित्तिकै सडकको काम सुरु गर्ने वचन दिएका छन्।’ नेपाल हिमालय सीमापार वाणिज्य संघका महासचिव अर्जुन गौतमले वाणिज्यको पत्र परराष्ट्रलाई बुझाएको बताए । उनले भने ‘आज चिनियाँ दूतावासमा पत्राचार हुने सम्भावना छ । ल्हासा, खासा र रमिते जंगलमा नेपालका व्यवसायीको करोडौं रुपैयाँका चिनियाँ सामान तथा सयौं कन्टेनर अलपत्र अवस्थामा छन्। ‘भूकम्प आएदेखि नै अलपत्र सामान कुन अवस्थामा छन् भन्नेबारेमा अनभिज्ञ रहेको गौतमले बताए । खासा क्षेत्रमा अलपत्र ३ सय २१ कन्टेनर अलपत्र छन् । भूकम्पका कारण लगातार पहिरो आएकाले चिनियाँ सामान लोड गरिएका कन्टेनर दुई महिनादेखि नेपाल भित्रिन सकेका छैनन्।