कोपा अमेरिका कपमा वोलिभिया विजयी

१ असार/   कोपा अमेरिका कप फुटबल प्रतियोगिता अन्तर्गत गएराति सम्पन्न खेलमा वोलिभिया विजयी भएको छ । समुह ए अन्तर्गतको खेलमा उसले इक्वेडरलाई ३–२ ले पराजित गर्यो ।  पाँचौ मिनेटमा नै रानोल्ड राल्डेसको गोल मार्फत अग्रता लिएको बोलिभियाले १८ औं मिनेटमा अग्रता दोब्बर पार्यो । बोलिभियाका लागि दोश्रो गोल मार्टिन डालेसले गरेका थिए । पहिलो हाफको ४३ औं मिनेटमा मार्सेलो मोलेनोले पेनाल्टी मार्फत गोल गरेपछि बोलिभियाले पहिलो हाफमा ३–० को अग्रता लिएको थियो ।

 तर दोश्रो हाफको तेश्रो मिनेटमा नै इनर भ्यालेन्सियाले गोल गर्दै इक्वेडरलाई खेलमा फर्काउने संकेत गरे । दोश्रो हाफको ३६ औं मिनेटमा इक्वेडरका मिलर बोलानोसले गोल गरेपछि खेल निकै रोमाञ्चक भएको थियो । तर त्यसपछि कुनै टोलीबाट गोल हुन सकेन र खेल बोलिभियाले ३–२ ले जित्यो । जितसँगै बोलिभिया चिलीसँग गोल अन्तरका आधारमा पछि पर्दै समुह ए को दोश्रो स्थानमा रहेको छ । इक्वेडर भने बिना अंक समुह ए को पुछारमा रहेको छ । 

त्यस्तै आज भएको खेलमा आयोजक चिलीले मेक्सिकोसँग ३–३ गोलको बाराबरी खेलेको छ । निकै रोमाञ्चक भएको खेलमा अग्रता भने खेलको २१ औं मिनेटमा मार्टिस भुसोको गोलमार्फत मेक्सिकोले लिएको थियो । तर त्यसको एक मिनेट बित्न नपाउँदै चिलीले खेल बराबरी गर्यो । २२ औं मिनेटमा चिलीका भिडालले गोल गर्दै खेल बराबरीमा ल्याए । २९ औं मिनेटमा राउल जिमेनेजले गोल गर्दै मेक्सिकोलाई पुन अग्रता दिलाए । ४२ औं मिनेटमा चिलीका भारगासले गोल गरेपछि खेल २–२ गोलको बराबरीमा पुग्यो । तर दोश्रो हाफको अन्त्यतिर  पाएको पेनाल्टीमा भिडालले गोल गर्दै चिलीलाई ३–२ को अग्रता दिलाए । 

दोश्रो हाफको २१ औं मिनेटमा मार्टिस भुसो व्यक्तिगत दोश्रो तथा टोलीका लागि तेश्रो गोल गर्दै खेल बराबरीमा ल्याए । त्यसपछि कुनै टोलीबाट गोल हुन सकेन र खेल ३–३ गोलको बराबरीमा सकियो ।

 बराबरीसँगै चिली २ खेलमा ४ अंकका साथ समुह ए का शीर्ष स्थानमा रहेको छ २ अंक जोडेको मेक्सिको भने तेश्रो स्थानमा रहेको छ ।