मापदण्ड नपुगेका ताप्लेजुङका २२ विद्यालय गाभिने

७ आसार/    ताप्लेजुङमा मापदण्ड नपुगेका २२ वटा विद्यालय अर्को विद्यालयमा गाभिने भएको छ । जिल्लाका विभिन्न गाउँका विद्यार्थी कम भएका विद्यालय गाभ्न लागेको  जिल्ला

शिक्षा कार्यालय ताप्लेजुङका उप—सचिव निलमणी खनालले जानकारी दिनुभयो ।

सरकारले निर्धारण गरे अनुसार एक शिक्षक बराबार ४० जना विद्यार्थी हुनु पर्ने छ । तर हिमाली जिल्ला भएका कारण त्यस मध्ये २० प्रतिशत अर्थात एक कक्षा बराबर ८ जना वा विद्यालयमा ४० जना विद्यार्थी अनिवार्य हुनु पर्ने प्राबधान छ । त्यती विद्यार्थी पनि नभएका तथा नजिकैको विद्यालय आधा घन्टाको दुरी भएको अवस्थामा विद्यालय गाभ्न सकिने भएकाले जिल्लाका २२ विद्यालय अर्को विद्यालयमा गाभ्ने प्रकृया अगाडी बढाएको र छिटै प्रकृया पुरा हुने उप–सचिव खनालले बताउनुभयो । अनुगमनका क्रममा ४० भन्दा कम विद्यार्थी भएका विद्यालय २२ वटा फेलापरेको शिक्षा कार्यालयले जनाएको छ ।

जिल्लाका दुर्गम गाउँ याम्फुदिनमा रहेको याम्फुदिन प्रा.वि. याम्फुदिन, कृष्ण प्रा.वि. याम्फुदिन, गहुबारी प्रा.वि. याम्फुदिन, पृथ्वी प्रा.वि. थुम्बेदिन, पाथीभरा प्रा.वि. तापेथोक, खाम्पीयोक प्रा.वि. सिनाम, लुङसुङ पौवा प्रा.वि. साब्लाखुलाई गभ्ने प्रक्रिया सुरु गरिएको उप–सचिव खनालले बताउनुभयो ।

त्यस्तै ताप्लेजुङ नगरपालिका–९ को याङलिजुङ प्रा.वि., भन्जारे प्रा.वि. पेदाङ, याङ्मा प्रा.वि. ओलाङचुङगोला, विश्वज्याति प्रा.वि. नाङखोल्यङ, शिब प्रा.वि. नाङखोल्याङ र गणेश प्रा.वि. हाङपाङ, जनता प्रा.वि. लिम्बुदिन र देउराली प्रा.वि. लिम्बुदिनमा पनि विद्यार्थीको संख्या कम भएकाले अर्को विद्यालयमा गाभ्न लागिएको उहाँले जानकारी दिनुभयो । ताप्लेजुङमा उच्च माध्यमिक र माध्यमिक गरी ५५, निम्न माध्यमिक ६१  र प्राथमिक विद्यालय २ सय २१ गरी जम्मा ३ सय ३७ वटा विद्यालय छन् । २२ विद्यालय गाभिने भएपछि जम्मा ३ सय १५ विद्यालय मात्र रहने पनि उपसचिब खनालले बताउनुभयो ।