संशोधन प्रस्तावमा केही दलले बिमति राख्नुको कुनै तुक छैन्–प्रम दाहाल

पुस १, २०७३ ।  प्रधानमन्त्री पुष्पकमल दाहालले सरकारले संसदमा दर्ता गरेको संविधान संशोधन प्रस्तावमा केही दलले बिमति राख्नुको कुनै तुक नभएको बताएका छन् ।

सम्वाद र सहमतिबाट मात्र निकास सम्भव रहेको उल्लेख गर्दै उनले कसैको मागले मात्र संशोधन प्रस्ताव फिर्ता नहुने बताए ।  तर, उनले सहमतिमा संसदीय प्रक्रियाबाट यसलाई परिमार्जन गर्न भने सकिने बताए । पोखरामा आज सञ्चारकर्मीसँग कुरा गर्दै माओवादी केन्द्रका अध्यक्ष समेत रहेका प्रधानमन्त्री दाहालले बिगतमा दलहरुले सहमति जनाएकै बिषयलाई समेटेर सरकारले विधेयक ल्याएको उल्लेख गर्नुभयो । उनले भने, विगतमा आफैले सहमति जनाएका बिषयमा अहिले विरोध गर्नुको कुनै अर्थ नभएको बताए ।  

सरकारले दर्ता गराएको प्रस्तावले राष्ट्रिय हित र एकतामा कुनै आँच नआउने दावी गर्दै प्रधानमन्त्री दाहालले सबैको सहमतिमा राष्ट्रिय संकटको समाधान खोज्न सरकार प्रयासरत रहेको उल्लेख गरे । उनले भने, ‘सरकार सहमतिमै राष्ट्रिय संकटको समाधान चाहन्छ । म हिमाल, पहाड र तराईलाई मिलाएर राष्ट्रिय एकता हासिल गर्ने र संविधान कार्यान्वयन गर्ने प्रयत्नमा छु । यसलाई गलत अर्थमा व्याख्या गर्नु कसैको हितमा छैन ।

प्रधानमन्त्री दाहालले सरकार स्थानीय तहको निर्वाचनकै पक्षमा रहेको बताएका छन् । पुरानै संरचनामा स्थानीय निकायको निर्वाचन गर्नेबारे प्रमुख दलहरु निश्कर्षमा पुगी नसकेको जानकारी दिदै उनले पुरानो वा नयाँ संरचनामा स्थानीय निकायको निर्वाचन गर्ने भन्नेबारे केही दिनभित्रै निश्कर्षमा पुग्ने उल्लेख गरे ।  सरकार बैशाखसम्म स्थानीय तहको निर्वाचन गर्ने तयारीमा रहेको उनले बताए ।