आजबाट नयाँ वर्ष २०७४ साल प्रारम्भ

नयाँ वर्ष २०७४ साल आजबाट प्रारम्भ भएको छ । नयाँ वर्षको पहिलो दिन स्वदेश तथा विदेशमा रहेका नेपालीबीच शुभकामना आदानप्रदान गरी हर्षोउल्लासका साथ मनाइँदैछ ।

गएराती मुलुकभर विभिन्न कार्यक्रम गरी नयाँ बर्षको स्वागत गरिएको छ । नयाँ वर्षको पुर्व सन्ध्यामा काठमाडौ, पोखरा, चितवन लगायत मुलुकका मुख्य मुख्य पर्यटकीय स्थलमा आन्तरीक पर्यटकको घुइँचो लागेको छ । आजका दिन गत वर्ष गरेका कामको मुल्याङकन गरी सफलता प्राप्त गर्न नयाँ योजना बनाउने परम्परा समेत रहेको छ । नयाँ वर्षको अवसरमा मीठोमीठो खाने, साथीभाई तथा आफन्त सँग भेटघाट गरी एक आपसमा शुभकामना आदान प्रदान गरिन्छ ।

 

नयाँ वर्षको अवसरमा राष्ट्रपति, प्रधानमन्त्री तथा विभिन्न दलका नेताले शुमकामना दिँदै संविधानको सफल कार्यान्वयनमा जोड दिएका छन् । यस्तै राष्ट्रपति विद्यादेवी भण्डारीले नयाँ वर्षको आगमनसँगै मुलुकमा नयाँ सोच, शैली र गन्तव्य सहित अघि बढ्नुपर्ने बेला भएको भन्दै वर्ष सुखद् र उपलब्धिमूलक बन्न सकोस् भन्ने कामना गर्नुभएको छ । प्रधानमन्त्री पुष्पकमल दाहालले दिएको शुभकामना सन्देशमा नयाँ वर्षले मुलुकलाई शान्ति र समृद्धिको दिशामा अग्रसर गराउने विश्वास व्यक्त गर्नुभएको छ ।

 

संविधानको सफल कार्यान्वयन गर्ने दिशामा यो वर्ष महत्वपूर्ण जिम्मेवारी आएको प्रधानमन्त्रीको भनाइ छ । कांग्रेस सभापति शेरबहादुर देउवा, एमाले अध्यक्ष केपी ओली लगायतले नयाँ वर्षको शुभकामना दिँदै स्थानिय निर्वाचनमा सहभागि हुन अपिल गरेका छन् ।

२०७४ , वैशाख १