आयरल्याण्ड ३ विकेटले विजयी

अफगानिस्तान विरुद्धको चौथो वण्डेमा आयरल्याण्ड ३ विकेटले विजयी भएको छ । अफगानिस्तानले प्रस्तुत गरेको  २ सय २१ रनको लक्ष्य उसले खेल सकिन १९ बल अगावै पुरा गर्यो ।

ओपनर ब्याट्समेन पउल स्टर्लिङ्गलाई  २८, एड जोयसलाई २४ तथा कप्तान विलियम पोटरफिल्डलाई  ६ रनमा गुमाउँदा ३ विकेटको क्ष्यतिमा आयरल्याण्डले मात्र  ५९  रन जोडेको थियो । त्यसपछि दबाबमा रहेको उसले एक सय  ३० रन जोड्दा  ६ विकेट  गुमाएर पराजयतर्फ  धकेलिएको उसका लागी विकेट किपर  गेरी विल्सल  र  केबिन ओब्रेनले  ६६ रनको साझेदारी गरेपछि टोली जितको नजिक पुगेको थियो । ६७ बलको सामना गरेका विल्सन  ३ चौकाको सहायतामा  ४१  रनमा आउट भए ।

त्यसपछि  क्रिजमा आएका जर्ज डकरेल  र ओब्रेनले टिमलाई जीत दिलाए । अविजित यात्रा तय गरेका डकरेलले १० बलको सामनामा ५ तथा ६० बलको सामना गरेका ओब्रेनले विष्फोटक ब्याटिङ्ग गर्दै ८ चौका र २ छक्काको सहायतामा ७२ रन जोडे । उनले ४७ औं ओभरको पाँचौ बलमा चौका प्रहार गरेसँगै आयरल्याण्डले २ सय २४ रन बनाएको थियो । ओब्रेन नै म्यान अफ दि म्याच घोषित भए । बलिङ्गतर्फ मोहम्मद नाबीले ४ तथा रसिद खानले २ विकेट लिए ।

यसअघि इण्डीयाको नोयडामा टस जितेर ब्याटिङ्ग गरेको अफगानिस्तानले आफ्ना आक्रामक र भरोसादार खेलाडीलाई सस्तैमा गुमाएपछि अफगानिस्तान एक सय २० रनमा समेटिएको थियो ।

उसले खेल सकिन एक बल अगाबै सबै विकेट गुमायो । अफगानिस्तानले आफ्ना ६ ब्याट्समेनलाई दोहोरो अंकको रन जोड्न नपाउँदै गुमायो । ओपनर मोहम्मद सहजाद एक रनमा आउट हुँदा उस्मान घानी तीन रनमा पेवेलियन फर्किए । त्यसपछि अर्का आक्राम ब्याट्समेन राहत शाहले खाता खोल्नै भ्याएनन् । ११ रन जोड्दा ३ विकेट गुमाएको उसले ८३ रन जोड्दा थप ४ विकेट गुमाएको थियो । त्यसपछि १४२ रन जोड्दा आठौं विकेट गुमाएको थियो । 

उसका लागी सफिकउल्लाहले सर्बाधिक ४२ तथा मोहम्मद नाबी र दौलत जद्रानले समान ४१ रनको योगदान दिए । जद्रान अविजित रहेका थिए । कप्तान अस्घर तनिकजाइले ३५ रनको योगदान दिएका थिए । अफगानिस्तानलाई सस्तैमा समेट्ने क्रममा केविन ओब्रेनले ४, जाकोब मुल्डरले ३ र एण्डी म्याकब्रेनले २ विकेट लिए ।

 

जितसँगै पाँच म्याचको श्रृंखला २–२ को बराबरीमा पुगेको छ । पाँचौ तथा अन्तिम म्याच पर्सी शुक्रबार नोयडामा हुनेछ ।

९ चैत्र, २०७३

राष्ट्रिय दल बन्न ३ प्रतिशत थ्रेसहोल्ड र १ सिट जित्नै पर्ने

काठमाडौं।  संसदको राज्य व्यवस्था समितिले ३ प्रतिशत थ्रेसहोल्डको प्रावधान सहित राजनीतिक दलसम्बन्धी विधेयक पारित गरेको छ । समितिको आज बसेको बैठकले उपसमितिको प्रस्ताव अनुसार बिधेयक पारित गर्दै संसद बैठकमा लैजाने निर्णय गरेको हो । बिधेयकमा राष्ट्रिय दलको मान्यता पाउन प्रतिनिधि सभा निर्वाचनमा समानुपातिक तर्फ तीन प्रतिशत मत र प्रत्यक्ष तर्फ कम्तीमा एक सिट जित्नु पर्ने प्रावधान राखिएको समिति सदस्य राजेन्द्र फुयांलले जानकारी दिनुभयो ।

बैठकमा नेकपा माले, मजदुर किसान पार्टी, जनमुक्ति पार्टी र जनजागरण पार्टीका सांसदले थ्रेसहोल्डको प्रावधानमा असन्तुष्टि जनाउदै बैठक बहिष्कार गरेका थिए । समितिले पारित गरेको बिधेयक आजै अपरान्ह बस्ने संसद बैठकमा पेश हुनेछ । 

नयाँ प्रावधान अनुसार कुनैपनि दलले राष्ट्रिय मान्यता प्राप्त गर्न कुल मतको ३ प्रतिशत र प्रत्यक्षतर्फ एक सिट जित्नैपर्ने वाध्यता भएको छ । प्रत्यक्षमा सिट जित्ने तर ३ प्रतिशत मत प्राप्त नगरेको दलका सांसदले स्वतन्त्रको हैसियतमा संसदमा प्रतिनिधित्व गर्ने समिति सदस्य रामकृष्ण यादवले जानकारी दिनुभयो ।

प्रत्यक्षतर्फ सिट नजितेको तर ३ प्रतिशत वा बढी मत प्राप्त गरेको दलले पनि समानुपातिकमा स्वतन्त्रको हैसियतले प्रतिनिधत्व गर्न पाउने यादवको भनाइ छ । सिंहदरवारमा आज बिहान बसेको समिति बैठकमा मजदुर किसान पार्टीका प्रेम सुवाल, नेकपा मालेका अइन्द्रसुन्दर नेम्बाङ, जनजागरण पार्टीका लोकमणी ढकाल र जनमुक्तिका शिवलाल थापाले असहमति राख्दै सभापतिलाइ ज्ञापनपत्र बुझाएर बहिष्कार गरेका थिए । एमाले सांसद फुयालले नयाँ प्रावधान संघीय लोकतान्त्रिक गणतन्त्र संस्थागत गर्दै जनताको चाहाना पुरा गर्न कोषे ढुंगा सावित हुने दावी गर्नुभयो ।

कांग्रेस सांसद आनन्दप्रसाद ढुंगाना संयोजकत्वको उपसमितिले बिहान लामो समयको छलफलपछि थ्रेसहोल्डको ब्यवस्थासहितको प्रतिवेदन तयार पारेको थियो । सरकारले प्रस्तुत गरेका निर्वाचनसँग सम्बन्धित अन्य चार वटा विधेयक यसअघि नै पारित गरेपनि दलहरुबीच सहमति हुन नसक्दा राजनीतिक दलसम्बन्धी विधेयक भने राज्य ब्यवस्था समितिमै अड्किएको थियो ।

९ चैत्र, २०७३

मन्त्रिपरिषद् वैठकले प्रधानमन्त्रीको चीन भ्रमणको कार्यतालिका तय गर्ने

काठमाडौं।   प्रधानमन्त्रीको आसन्न चीन भ्रमणको कार्यतालिका तय गर्न मन्त्रिपरिषद्को वैठक आज बस्दैछ । भोलीदेखि सुरु हुने प्रधानमन्त्री पुष्पकमल दाहालको साताव्यापी चीन भ्रमणका क्रममा उठाईने एजेण्डा तथा दुई पक्षीय भेटवार्तालाई अन्तिम रुप दिन मन्त्रिपरिषद् वैठक बस्न लागेको भौतिक पूर्वाधार तथा यातायात मन्त्री रमेश लेखकले जानकारी दिनुभयो ।

वैठक सिंहदरवारमा अपरान्ह ५ वजेपछि बस्दैछ । प्रधानमन्त्रीको भ्रमणका क्रममा आधा दर्जन एजेण्डामा छलफल हुने भनिएपनि कुनै सम्झौता भने नहुने मन्त्रिपरिषद् श्रोतले जानकारी दिएको छ । आगामी शनिवार बोवाओ फोरमलाई सम्वोधन गर्न जान लागेका प्रधानमन्त्री दाहालले १४ गते सोमबार वेइजिङस्थित ग्रेट हल अफ द पिपलमा चिनियाँ राष्ट्रपति सि जिनपिङसंग औपचारिक भेटवार्ता गर्दैहुनुहुन्छ । राष्ट्रपति जिनपिङसंग १५ मिनेटको भेटको समय मिलाईएको मन्त्रिपरिषद् श्रोतले जनाएको छ ।

यसैबीच प्रधानमन्त्री दाहाल चीन भ्रमणबाट फर्किएपछि मात्रै प्रहरी महानिरिक्षक नियुिक्त प्रक्रिया सुरु हुने भएको छ । प्रधानमन्त्रीको भ्रमणका क्रममा गृहमन्त्रालयले कार्य मूल्याङ्कन प्रतिवेदनलाई अन्तिम रुप दिने र उहाँ फर्किएपछि नियुिक्त प्रक्रियाले अन्तिम रुप लिने मन्त्री लेखकले जानकारी दिनुभयो । 

यद्यपी गृहमन्त्रालयले भने सर्वोच्च अदालतको परमादेशपछि नयाँ आईजीपी नियुक्तीका लागि आजैबाट प्रक्रिया सुरु गर्दैछ । सर्वोच्चले कार्यसम्पादन र वरिष्ठताका आधारमा आईजीपी नियुक्ती गर्न आदेश दिएपछि गृहले ४ डिआईजीबारे कार्यसम्पादन मूल्याङ्कन सुरु गर्न लागेको गृहमन्त्रालय श्रोतले जनाएको छ ।

९ चैत्र, २०७३

प्रधानमन्त्रीको चीन भ्रमणका क्रममा सन्धि सम्झौतामा हस्ताक्षर नहुने

काठमाडौं।  प्रधानमन्त्री पुष्पकमल दाहालले भोलिबाट गर्ने चीन भ्रमणका कुनै पनि सन्धि सम्झौता र समझदारीमा हस्ताक्षर नहुने भएको छ । परराष्ट्र मन्त्रालयले आज पत्रकार सम्मेलन गरी भ्रमणका क्रममा द्विपक्षीय सम्बन्ध र सहायतामा सम्झौता गर्न नेपालले आवश्यक तयारी पूरा गरेको र निकट भविष्यमा हुने अन्य भ्रमणमा सहमति भई हस्ताक्षर हुने विश्वास व्यक्त गरेको छ ।

चीन भ्रमणका क्रममा प्रधानमन्त्री दाहालले चीनका राष्ट्रपति सि जिनपिङसँग शिष्टाचार भेट गर्ने पक्का भएको परराष्ट्रले जनाएको छ । यद्यपि भेटको मिति भने परराष्ट्रले जारी गरेको विज्ञप्तिमा उल्लेख छैन । प्रधानमन्त्री दाहालले बोआओ मञ्चको उद्घाटन समारोहलाई सम्बोधन गर्ने कार्यक्रम रहेको छ ।

त्यस्तै चैत १३ गते प्रधानमन्त्री दाहालले बेइजिङ फरेन स्टडिज युनिभर्सिटी मा व्यवसायी, शिक्षाविद् र विद्यार्थीहरुलाई सम्बोधन गर्नुहुने भएको छ । त्यसपछि चीनको तिब्बत स्वशासित क्षेत्रको भ्रमण गरी दाहाल चैत १६ गते स्वदेश फर्किने कार्यक्रम छ । प्रधानमन्त्रीको टोलीमा परराष्ट्र मन्त्री, परराष्ट्रका सचिव र प्रधानमन्त्री कार्यालय र परराष्ट्रका अन्य उच्च अधिकारीहरु समेत सम्मिलित हुनु हुनेछ ।

९ चैत्र, २०७३

१२ मुलुकमा सिफारिस राजदुतको नाम अनुमोदन

 काठमाडौं।  संसदीय सुनुवाइ विशेष समितिले विभिन्न १२ वटा मुलुकमा सिफारिस राजदुतको नाम अनुमोदन गरेको छ । सिंहदरबारमा आज बसेको समितिको बैठकले सुनुवाइ सकेपछि १२ जनाकै नाम अनुमोदन गरेको हो ।

समितिले लगातार तीन दिन सुनुवाई गरेको थियो । समितिले बंगलादेशका लागि प्रस्तावित चोपलाल भुषाल, बहराईनका लागि प्रस्तावित पदम सुन्दास, म्यानमारका लागि प्रस्तवित भीमकृष्ण उदास, श्रीलंकाका लागि प्रस्तावित विश्वम्भर प्याकुरेल र साउदी अरेबियाका लागि प्रस्तावित महेन्द्रप्रसाद सिंह राजपुतको आज सुनुवाई गरेको हो ।

 

समितिले हिजो ओमानका लागि प्रस्तावित शर्मिला पराजुली ढकाल, इजरायलका लागि प्रस्तावित निरञ्जनकुमार थापासँग सोधपुछ गरेको थियो । यस्तै कतारका लागि प्रस्तावित रमेश कोईराला, गणतन्त्र कोरियाका लागि प्रस्तावित अर्जुन जंगबहादुर सिंह, डेनमार्कका लागि प्रस्तावित युवराज लम्साल र जापानका लागि प्रस्तावित प्रतिभा राणाको पनि सुनुवाइ गरेको थियो । अस्ती सोमबार पहिलो दिन अष्ट्रेलियाका लागि प्रस्तावित राजदूत लक्की शेर्पाको सुनुवाई भएको थियो ।

 

अनुमोदन भएका १२ जनाले नै आफ्नो कार्यकाल सफल बनाउन योग्यता र क्षमताले भ्याएसम्मका प्रयास जारी राख्ने बताएका थिए । संसदीय समितिबाट अनुमोदन भएपछि राष्ट्रपतिले राजदुत नियुक्त गर्ने संवैधानिक व्यवस्था छ ।

९ चैत्र, २०७३

इण्डीया र अष्ट्रेलियाबीचको तेस्रो टेष्ट बराबरी, मार्स र हेन्ड्सकोम्बले बचाए अष्ट्रेलियालाई

इण्डीया र अष्ट्रेलियाबीचको तेस्रो टेष्ट बराबरीमा सकिएको छ । आज पाँचौ तथा अन्तिम दिन पाहुँना टोली अष्ट्रेलियाले पुरै खेलेपछि तेस्रो टेष्ट बराबरीमा सकिएको हो । चौथो दिन ७.२ ओभरमा २ विकेट गुमाएर दबाबमा रहेको कंगारु टोलीका लागी आज थप दबाब रहेको थियो । आज ओपनर ब्याट्समेन म्याट रेन्स १५ तथा कप्तान स्टेभन स्मिथ २१ रनमा आउट भएपछि पाहुना टोली संकटमा परेको थियो । यद्यपी सन मार्स र पेटर हेन्ड्सकोम्बको साझेदारी घरेलु टोली इण्डीयाको लागी बाधक बन्यो ।

India’s captain Virat Kohli, right, shakes hands with Australia’s Matthew Wade at the end of their third test cricket match that ended in a draw in Ranchi, India, Monday, March 20, 2017.

स्मिथलाई चौथो विकेटमा गुमाउँदा मात्र ६३ रन जोडेको कंगारु टोलीका लागी मार्स र हेन्ड्सकोम्बको जोडीले एक सय ८७ रन सम्म पुर्याएका थिए । आज बाँकी  ९२.४  ओभर  मात्र  खेल्नु  पर्ने  भएकोले  पाहुना  टोली संकटमा  परेसँगै पुरै ओभर टिक्न संघर्षरत थियो । मार्स रविन्द्र जडेजाको बलमा मुरली विजयद्धारा समातिएका थिए । उनले एक सय ९७ बलको सामनामा ७ चौकाको सहायताले ५३ रन जोडे । उनी ९१.२ ओभरमा आउट भएका थिए ।

त्यसपछि क्रिजमा आएका आक्रामक ब्याट्समेन ग्लेन म्याक्सवेल मात्र  २ रनमा पेवेलियन फर्किएपनि  ह्याण्ड्सकोम्ब र विकेट किपर म्याथ्यु वाडले अविजित खेलेका थिए । २०० बल खेलेका ह्याण्ड्सकोम्ब ७ चौका प्रहार गर्दै ७२ रनमा रहे भने वाडले १६ बलमा २ चौका हान्दै ९ रन जोडे । खेल सकिंदा पाहुना टोलीले एक सय ओभरमा ६ विकेटको क्ष्यतिमा २ सय ४ रन बनाएको थियो । बलिङ्गतर्फ रविन्द्र जडेजाले ४ तथा इशान्त शर्मा र रविचन्द्रन अश्विनले समान एक विकेट लिए ।

यसअघि राँचीमा टस जितेर ब्याटिङ्ग गरेको पाहुना टोली अष्ट्रेलियाले पहिलो इनिङ्गमा कप्तान स्टेभन स्मिथको सर्बाधिक अविजित एक सय ७८ तथा ग्लेन म्याक्सवेलको एक सय ४ रनको मद्दतमा १३७.३ ओभरमा ४ सय ५१ रन बनाएको थियो ।

जवाफमा घरेलु टोली इण्डीयाले उत्कृष्ट प्रदर्शन गर्दैै चेतेश्वर पुजराको २ सय २ , ऋद्धिमान शाहाको एक सय १७ तथा ओपनर मुरली विजयको ८२ र लोकेश राहुलको ६७ रनको मद्दतमा २१० ओभरमा ९ विकेटको क्ष्यतिमा ६ सय ३ रन बनाउँदै इनिङ्ग समाप्तिको घोषणा गरेको थियो । 

यो बराबरीसँगै चार टेष्ट म्याचको श्रृंखला एक / एक को बराबरीमा कायमै रहेको छ । यो खेलको म्यान अफ दि म्याच चेतेश्वर पुजरा भए । चौथो तथा अन्त्मि टेष्ट १२ गतेबाट धर्मशालामा शुरु हुनेछ ।

७ चैत्र,२०७३

एमाले दमकमा नयाँ संरचना अनुसारको कमिटी गठन

उत्तम रिजाल, दमक।  नेकपा एमाले दमकले नयाँ संरचना अनुसारको कमिटी गठनलाई तिब्रता दिएको छ । उसले आज साबिकको दमक २,३ र ४ को कमिटी समायोजन गरि नयाँ सरचना अनुसार दमक २ को ३६ सदस्यीय वडा कमिटी गठन गरेको छ । 

जसको अध्यक्षमा पुस्प अधिकारी उपाध्यक्षमा टीका प्रसाईं र सचिबमा डिल्ली दुलाल चुनिनु भएको छ । सदस्यहरुमा टंक गौतम, गोपाल निरौला , धनकुमारी दाहाल , नेत्र कुमारी धिमाल , बुद्धि सिग्देल, सान्ता भट्टराई , दुर्गा पौडेल , भेषराज काफ्ले ,कृष्ण बराल लगायत रहनु भएको छ ।

भालुकुडी स्थित शिवालय मन्दिरमा भएको कार्यक्रमा प्रमुख अतिथी रोमनाथ ओली, भक्ता दाहाल, मन्जु थापा, प्रजापती सापकोटा अन्तलाल धिमाल, नेत्र पोख्रेल लगायतले मन्तव्य राख्नु भएको थियो । कार्यक्रम वार्ड समायोजनका सहजकर्ता नेत्र दाहालको अध्यक्षतामा भएको थियो ।

 ७ चैत्र,२०७३

इण्डीयाको गतिलो जबाफ

उत्तम रिजाल,  घरेलु टोली इण्डीयाले अष्ट्रेलिया विरुद्धको तेस्रो टेष्टको पहिलो इनिङ्गमा गतिलो जबाफ दिएको छ । पाहुना टोली अष्ट्रेलियालाई आज  ४  सय ५१ रनमा रोक्दै आफ्नो इनिङ्ग शुरु गरेको उसले दोस्रो दिनको खेल सकिंदा सम्म एक विकेट गुमाएर एक सय २० रन जोडेको छ ।Australia’s Pat Cummins, right, celebrates the dismissal of India’s Lokesh Rahul, left, during the second day of their third test cricket match in Ranchi, India, Friday, March 17, 2017.
उसका लागि ओपनर दोय लोकेश राहुन र मुरली विजयले ९१ रनको साझेदारी गरे । राहुल एक सय २ बलको सामना गर्दै ९ चौकाको सहायताले ६७ रन जोडेर आउट भए । उनी पाट कुमिन्सको बलमा विकेट किपर म्याथ्यु वाडद्धारा क्याच आउट भए । क्रिजमा एक सय १२ बलको सामना गरेका मुरली विजय ६ चौकाको सहायताले ४२ तथा २६ बलको सामना गरेका चेतेश्वर पुजरा एक चौकाको सहायताले १० रनमा छन् ।
यसअघि आज ४ विकेटको क्ष्यतिमा २ सय ९९ रनबाट खेख्न शुरुगरेको पाहुना टोली अष्ट्रेलियाले एकसय ३७.३ ओभरमा ४ सय ५१ रन जोडेको थियो । उसका लागि कप्तान स्टेभन स्मिथले सर्बाधिक अविजित एक सय ७८, ग्लेन म्याक्सवेलले एक सय ४, म्याट रेनसले ४४ तथा विकेट किपर म्याथ्यु वाडले ३७ रनको योगदान दिएका थिए । बलिङ्गतर्फ रविन्द्र जडेजाले ५, उमेश यादवले ३ तथा रविचन्द्रन अश्विनले एक विकेट लिए ।

India’s Cheteshwar Pujara bends to avoid a rising delivery during the third day of their second test cricket match against Australia in Bangalore, India, Monday, March 6, 2017.

भोलि घरेलु टोली एक विकेटको क्ष्यतिमा एक सय २० रनबाट खेल्न शुरु गर्नेछ । चार टेष्ट म्याचको श्रृंखला एक एक को बराबरीमा छ ।

Australia’s Steve O’Keefe, left, reacts as the stumps break in an unsuccessful attempt to run-out India’s Murali Vijay, right, during the second day of their third test cricket match in Ranchi, India, Friday, March 17, 2017.

  ४ चैत्र,२०७३

राप्रपाको एजेण्डै सकियो , निर्वाचन आयोगले विधानबाट हिन्दु राष्ट्र र राजसंस्था हटायो

काठमाडौं ।  राष्ट्रिय प्रजातन्त्र पार्टी राप्रपाको मेन एजेण्डा नै सकिएको छ । निर्वाचन आयोगले विधानबाट हिन्दु राष्ट्र र राजसंस्था हटाएपछि राप्रपाको एजेण्डा सकिएको हो । निर्वाचन आयोगले संविधानसँग राप्रपाको विधान बाझिएको भन्दै बिधानमा उल्लेखित हिन्दु राष्ट्र एवम् राजसंस्था सम्बन्धी वाक्यांश हटाइदिएको छ । यससँगै कुन एजेण्डा लिएर चुनावमा जाने भन्ने चिन्ताले नेताहरुलाई सताएको छ ।

कमल थापा नेतृत्वको राप्रपाको विधानको प्रस्तावनामै ‘…पूर्ण धार्मिक स्वतन्त्रता सहितको सनातन हिन्दुराष्ट्र एवं राजसंस्था सहितको लोकतन्त्रको मान्यता अभिवृद्धि गर्न र कायम गर्न…’ भन्ने वाक्यांश छ । यसैगरी विधानको धारा पाँचमा ‘…नेपाललाई सनातन हिन्दुत्वको भावना अभिवृद्धि गर्ने’ भन्ने वाक्यांश छ ।

फागुन ६ गतेदेखि १० गतेसम्म राजधानीमा आयोजित राप्रपाको एकता महाधिवेशनले पारित गरेको विधानमा उल्लेखित केही वाक्यांशहरु नेपालको संविधानसँग मेल नखाएको भन्दै निर्वाचन आयोगले हटाइदिएको छ ।

हेर्नुहोस्- निर्वाचन आयोगको निर्णय (बायाँ) र राप्रपाको विधान

आयोगले भनेको छ, ‘नेपालको संविधानको धारा ४ मा उल्लेखित धर्म निरपेक्ष तथा गणतन्त्रात्मक सम्बन्धी प्रावधानसँग मेल नखाएको देखिएको तथा राजनीतिक दल सम्बन्धी ऐन २०५८ को दफा ८ को उपदफा (१) को खण्ड (ग)मा दलको नाम, उद्देश्य, चिन्ह वा झण्डा धार्मिक, साम्प्रदायिक वा देशलाई बिखण्डित गर्ने प्रकृतिको भएमा आयोगले दल दर्ता गर्न इन्कार गर्न सक्ने उल्लेख भएको देखिँदा उक्त हिन्दु राष्ट्र एवं राजसंस्था सहितको र हिन्दुत्वको भन्ने वाक्यांश हटाई विधानको बाँकी व्यहोरालाई प्रमाणित गर्ने ।’

                                                           प्रदीपविक्रम राणा

आयोगको यस निर्णयले पार्टीको मुख्य एजेण्डा नै ओझेलमा परेकाले चुनावमा भोट माग्न समस्या हुने राप्रपाका नेता प्रदीपविक्रम राणाले बताए । उनले भने, ‘राप्रपाको मुख्य एजेण्डा नै राजसंस्था र हिन्दु राज्य हो । यी दुबैलाई निर्वाचन आयोगले खारेज गरिदिएको छ । अब राप्रपा के एजेण्डा लिएर चुनावमा जान्छ ?’

आयोगको यो निर्णयसँगै राप्रपाका नेता-कार्यकर्ता अन्यौलमा परेको भन्दै उनले यसको जवाफ पार्टी अध्यक्ष कमल थापाले दिनुपर्ने बताए ।

राणा तिनै व्यक्ति हुन् जसले राप्रपाको एकता महाधिवेशनमा कमल थापाविरुद्ध उम्मेदवारी दिएका थिए ।

राप्रपाले चुनाव चिन्ह ‘गाई’ पाएको छ जसलाई राप्रपाले शनिबार सार्बजनिक गर्दैछ ।

राप्रपा प्रवक्ता भन्छन्- कोर्टमा जान्छौं

राप्रपाका प्रवक्ता सुशीलकुमार श्रेष्ठले निर्वाचन आयोगको निर्णयबारे आफूहरुलाई औपचारिक जानकारी नभएको बताए । यदि आयोगले राजसंस्था र हिन्दु राष्ट्रको वाक्यांश हटाए अदालत जाने श्रेष्ठले चेतावनी दिए । उनले  भने, ‘पार्टी खोल्ने र बैचारिक स्वतन्त्रताको संवैधानिक अधिकार हामीलाई छ । यदि आयोगले त्यस्तो निर्णय गरेको भए हामी कोर्टमा जान बाध्य हुन्छौं ।’

 चैत्र ४, २०७३

विद्यालयलाई प्रविधिमय बनाउन ईजी एजुकेशन

चैत्र ४, दमक /   नयाँ शैक्षिक सत्रसंगै शैक्षिक जगतका लागि उपयोगी हुने प्रविधि सफ्टवेयर बनेको छ । युनिभर्सल टेक्निकल (यूनिटेक) गु्रपले मोबाईलमा समेत प्रयोग हुन सक्ने इजी एजुकेशन नामक शैक्षिक सफ्टवेयर बजारमा ल्याएको हो । सो सफ्टवेयर जडानसंगै तीन वटा मोवाइल एप्स प्रयोग गर्न सकिने र यसले विद्यालय तथा कलेजका शिक्षक, विद्यार्थी र तिनका अभिभावकका बिचमा कम्युनिकेशन हुने युनिभर्सल टेक्निकलका प्रवन्ध निर्देशक भिष्म अधिकारीले जानकारी दिए । 
 

सफ्टवेयर जडान गरेका विद्यालय र कलेजहरुले यो सफ्टवेयरको प्रयोग सहज रुपमा गर्न सक्ने छन भने प्रविधिमा एक फड्को मार्ने बिश्वास लिईएको छ, किनकी यस सेवाले विद्यालयका हरेका क्रियाकलापहरुलाई कम्प्यूटराइज त गर्छ नै विद्यालय र विद्याथीका हरेक क्रियाकलापलाई पनि अविभावक समक्ष जानकार गराउने हुँदा यो अतिनै उपयोगी हुने र शैक्षिक गुणस्तरका लागि शिक्षक, विद्यार्थी र अभिभावकबिचको त्रिपक्षीय समन्वय जरुरी हुने भएका कारण यि तीन वटै पक्षबिच समन्वयमा सहज बनाउने उदेश्यले तीन बटा एप्सको अवधारणा ल्याइएको प्रवन्ध निर्देशक अधिकारीले बताए । 

 

अभिभावकहरुले आफ्नो छोरा छोरी स्कूल कलेजमा हाजिर भए नभएको, परीक्षाको प्राप्ताङक लगायत सबै शैक्षिक गतिबिधी बारे घरमै बसि बसि मोवाइलमै प्राप्त गर्न सक्ने छन् । 

 

विद्यार्थीले विद्यालयमा प्रवेश गरेपछि वा बाहिर निस्कने बखत विद्यालयको गेटमा राखिएको फेस डिटेक्टरमा आफुलाई स्क्यान गराउनु पर्ने नियम राखिने छ र उक्त मेसिनले स्क्यान गरेको डाटा विद्यालयको आफ्ने सफ्टेवेयरमा रजिस्टर हुन्छ र सर्भर बाट ईन्टरनेटको माध्यमबाट म्यासेज वा नोटिफाई गर्दछ । यसका लागी विद्यार्थीले अरु सफेटवेयरमा अतिरिक्त कार्डको आवश्यक्ता नरहेको जनाईएको छ ।

 

यस प्रविधिको प्रयोगका लागी विद्यार्थीले म्यासेज शुल्क स्वरुप रु.८०० प्र्रति बर्ष तिर्नु  पर्ने हुन्छ । जसमा विद्यार्थी र अविभावक दुबैले यस प्रविधिको प्रयोगका लागी एउटा पर्सनल एकाउन्ट सहितको मोवाईल एप्स प्राप्त गर्नेछन् ।

 

सफ्टवेयर बिराटनगरको कान्तिपूर कलेज र दमकको प्रजिता एजुकेशन एकाडेमीले प्रयोगमा ल्याइसकेका र अन्य विद्यालयले समेत जडानका लागि कम्पनीसंग समन्वय गरिरहेका यूनिटेकले जनाएको छ भने बाजारमा विधिवत रुपमा बैशाखको देस्रो हप्ताबाट ल्याईदैछ ।

गोविन्द गौतमलाई लागेको गोली एसएसबीकै भएको पुष्टि

काठमाडौं ।   नेपाल प्रहरीको फरेन्सिक रिपोर्टले कञ्चनपुरमा मारिएका गोविन्द गौतमलाई लागेको गोली भारतीय सीमा सुरक्षा बल (एसएसबी) कै भएको देखाएको छ । यो रिपोर्ट गृह मन्त्रालयले परराष्ट्र मन्त्रालयमार्फत काठमाडौंस्थित भारतीय दूताबासलाई दिएको छ ।

 भारतीय हस्तक्षेपविरुद्ध उत्रिएका नेपालीहरुमाथि फागुन २६ मा एसएसबीले चलाएको गोली लागेर गौतमको निधन भएको थियो । यो घटनामा भारतीय सुरक्षाकर्मी दोषी रहेको भन्दै भारतले नेपाल र नेपाली जनतासामू माफी माग्नु पर्ने नेपालका प्रमुख राजनीतिक दलहरुको माग छ ।

यसबारे नेपाल सरकारका उच्च अधिकारीहरुले भारतीय पक्षलाई पटकपटक ध्यानाकर्षण गराएका छन् । तर, भारतले यसबारे छानविन गर्ने भन्दै फरेन्सिक रिपोर्ट दिन माग गर्दै आएको थियो । गृह मन्त्रालय स्रोतका अनुसार नेपाल प्रहरीको ल्याबबाट गरिएको परीक्षणमा गौतमलाई लागेको गोली एसएसबीकै भएको पुष्टि भएको छ ।

गृह स्रोतले भन्यो- गौतमको शरीरमा भेटिएको गोली नेपालका कुनै पनि सुरक्षा निकायमा लाग्ने हातहतियारमा प्रयोग हुने नगरेकाले गोली एसएसबीले हानेको ठहरसहितको रिपोर्ट दिइएको छ ।

२०७३ चैत ३

शहीद गौतमका परिवारलाई एमालेले दियो ५ लाख

कञ्चनपुर /  भारतीय एसएसबीले गोली हानी एक साताअघि हत्या गरेको कञ्चनपुर पुनर्वास नगरपालिका आनन्दबजारका गोविन्द गौतमको परिवारलाई नेकपा एमालेले ५ लाख सहयोग उपलब्ध गराएको छ ।

एमालेको मेची–महाकाली अभियानका क्रममा आज कञ्चनपुरको महेन्द्रनगरमा आयोजित सभालाई सम्बोधन गर्दै अध्यक्ष केपी शर्मा ओलीले शहीद गोविन्द गौतमको परिवारलाई ५ लाखको चेक एमालेका तर्फबाट उपलब्ध गराए । अध्यक्ष केपी ओलीले सो चेक एमाले कञ्चनपुरका अध्यक्ष तारा लामालाई प्रदान गरेका छन् । उनले एसएसबीको यस हर्कतप्रति निन्दा गर्दै यस घटनाबारे भारतले नेपाल र नेपाली जनतासमक्ष माफी माग्नुपर्ने माग गरे । यसबारे आफूले प्रधानमन्त्री प्रचण्डसँग पनि कुरा गरिसकेको एमाले अध्यक्ष ओलीले बताए ।

सरकारले शहीद गौतमका छोराछोरीलाई उच्चशिक्षासम्म निःशुल्क अध्ययनको व्यवस्था गर्ने प्रतिबद्धता व्यक्त गरेकोबारे ओलीले शहीदका छोराछोरीलाई कसैले नहेरे एमालेले हेर्ने दावी गरे । सीमा विवाद उत्कर्षमा पुग्दा गत बिहीबार भएको झडपमा भारतीय एसएसबीले गोली प्रहार गर्दा गोविन्द गौतमको मृत्यु भएको थियो । उनलाई सरकारले शहीद घोषणा गर्दै राष्ट्रिय सम्मानका साथ अन्त्येष्टि गरेको थियो ।

 चैत ३ ,२०७३

एनसेलको लाभकर उठ्न नसकेको बारे लेखा समितिले प्रधानमन्त्रीसँग छलफल गर्ने

व्यबस्थापिका संसदको सार्वजनिक लेखा समितिले दुरसञ्चार प्रदायक कम्पनी ऐनसेलको खरिद बिक्रिका क्रममा पुँजीगत लाभकर उठन नसकेकोबारे प्रधानमन्त्रीसँग छलफल गर्ने भएको छ । समितिको आज बसेको बैठकले लाभकर असुलीमा सरकार उदासिन भएको ठहर गर्दै प्रधानमन्त्रीलाई छलफलका लागी बोलाउने निर्णय गरेको हो ।

सिंहदरवारमा बसेको लेखा समितिको बैठकमा समिति सदस्यले लाभकर असुल गर्न सरकारी निकायले प्रयास नगरेको भन्दै असन्तुष्टि जनाएका थिए । बैठकमा उपप्रधान तथा अर्थमन्त्री कृष्ण बहादुर महराले मन्त्रिपरिषदले कम्पनीलाई कर मिनाहा गर्ने निर्णय नगरेको भन्दै बाहिर आएका कुरा भ्रम भएको दावी गर्नुभयो । प्रधानमन्त्री दाहालले प्रस्ताव गरेकाले मन्त्रिपरिषदमा छलफल भएको भन्दै अर्थमन्त्री महराले एनसेललाई कर मिनाहा नहुने उल्लेख गर्नुभयो ।

प्रधानमन्त्री कार्यलयमा एनसेल कर असुलिको विषयमा निवेदन परेकाले मन्त्रिपरिषदमा छलफल भएपनि कुनै निर्णय भने नभएको मन्त्री महराको भनाई थियो । समिति बैठकमा राजस्व सचिव राजन खनालले एक महिना भित्र लाभकर असुल्ने काम सम्पन्न गर्ने प्रतिवद्धता व्यक्त गर्नुभयो । समिति सदस्य रामहरि खतिवडाले एनसेल खरिद बिक्रि सम्झौताको विवरण समितिमा पेस गर्नुपर्ने माग गर्नुभयो ।

चैत्र ३, २०७३

बन्द हडतालको बिकल्प खोज्छौं : महतो

 चितवन/ सदभावना पार्टीका अध्यक्ष राजेन्द्र महतोले अवको आन्दोलनमा बन्दहड्तालको बिकल्प खोजिने बताउनुभएको छ । चितवनको भरतपुर बिमानस्थलमा सञ्चारकर्मीसंग महतोले बिगतका आन्दोलनले जनताले निकै कष्ट भोग्नु परेकाले अव जनतालाई पिडा नहुने गरी आन्दोलका कार्यक्रम सार्वजनिक गर्ने बताउनुभयो ।

मुलुकको अर्थतन्त्रमा असर नपुग्ने र बालबालिकाको पढाई अवरोध नहुने किसिमको आन्दोलनको रणनीति तयार गरिएको महतोको भनाई छ । उहाँले भन्नुभयो, आन्दोलनबाट हामी धेरै सचेत छौं । अवको आन्दोलनबाट सरकारलाई कसरी दवाव दिन सकिन्छ भन्नेमा छलफल हुँदैछ ।’ बिगतमा बन्द हडतालको पक्षमा रहने अध्यक्ष महतो बन्दहडतालको बिकल्पमा देखिनुभएको हो । परिमार्जन सहितको सविधान संशोधनमा सरकार चुकेको भन्दै उहाँले संसोधन नभएसम्म कुनै पनि निर्वाचनमा सहभागी नहुने र हुन पनि नदिने चेतावनी दिनुभएको छ ।

बिगतका त्रुटी नसच्याए सम्म मुलुक अगाडी बढ्न र कुनै पनि निर्वाचन हुन नसक्ने उहाँले बताउनुभयो । बिगतमा मधेशी मोर्चाको नेतृत्व तह राजधानी केन्द्रित रहेकाले अवको आन्दोलनमा सबै नेता तराई मधेशमै बसेर जनताको माझमा रहेर संघर्षमा साथ दिने उहाँले बताउनुभयो । तराई मधेशमा मोर्चाको निषेधको राजनिति गर्ने कुनै योजना नरहेको भन्दै महतोले भन्नुभयो ‘हामीले कुनै पनि दललाई निषेध गरेका छैनौ । एमाले मधेश बिरोधी भएकाले जनताले निषेध गरेको हो हामीले होइन ।’

चैत्र ३, २०७३

माध्यमिक शिक्षा परीक्षा एसईई आजदेखि सुरु

यसवर्षको माध्यमिक शिक्षा परीक्षा एसईई आजदेखि सुरु भएको छ । परीक्षाको पहिलो दिन अहिले अनिवार्य अंग्रेजी विषयको परीक्षा भइरहेको छ । परीक्षामा कुल ५ लाख ३८ हजार १ सय ८२ परीक्षार्थी सहभागी छन् । जसमध्ये नियमिततर्फ २ लाख ३५ हजार ३ सय २ छात्रा र २ लाख ३३ हजार ९८ छात्र छन् । 

परीक्षाका निम्ति देशभरि १ हजार ९ सय २३ केन्द्र, त्यत्ति नै संख्यामा केन्द्राध्यक्ष, २ हजार ६ सय ४६ सहायक केन्द्राध्यक्ष, २२ हजार ४ सय ६१ निरीक्षक, सहयोगी र सुरक्षाकर्मीसहित ६७ हजार ५ सय ९१ जनशक्ति खटाइएको परीक्षा नियन्त्रण कार्यालय सानोठिमीका परीक्षा नियन्त्रक अम्बिका रेग्मीले बताउनुभयो । परीक्षामा अमर्यादित कार्य वा नियम उल्लंघन गरेमा कडा कारबाही गरिने परिक्षा नियन्त्रण कार्यालयले जनाएको छ ।

परीक्षा अनुगमनका निम्ति मन्त्रालयले सहसचिवको नेतृत्वमा १८ वटा अनुगमन टोली खटाएको छ । क्षेत्रीय शिक्षा निर्देशनालय र जिल्लामा माध्यमिक शिक्षा उत्तीर्ण परीक्षा समन्वय समितिको अनुगमन टोली खटिएको जनाइएको छ । यसैबीच माध्यमिक शिक्षा परीक्षा अवधिभर देशरभर लोडसेडिङ नगर्ने भएको छ ।

विद्यार्थीको परीक्षालाई लक्षित गर्दै मुलुकभर लोडसेडिङ अन्त्य गरिएको प्राधिकरणले जनाएको छ । नदीहरुमा पानीको सतह बढेकाले लोडसेडिङ अन्त्य गर्न सकिएको प्राधिकरणका प्रवक्ता प्रबल अधिकारीले बताउनुभयो । परीक्षा अवधिभर विद्युत खपत कम हुने सामाग्री प्रयोग गर्न प्राधिकरणले सम्बन्धित सबैलाई आग्रह गरेको छ ।

चैत्र ३, २०७३

विकास कानुन संहिताको मस्यौदा संसदमा दर्ता गर्न सरकारलाई विकास समितिको निर्देशन

व्यवस्थापिका संसदको विकास समितिले राष्ट्रिय गौरवका आयोजनालाई दु्रतमार्गबाट समयमै सम्पन्न गर्न आवश्यक पर्ने विकास कानुन संहिता मस्यौदा गर्न सरकारलाई निर्देशन दिएको छ । सिंहदरवारमा आज बसेको समिति बैठकले राष्ट्रिय योजना आयोगसँगको छलफलपछि सरकारलाई यस्तो निर्देशन दिएको हो । समितिले कानुन संहिताको मस्यौदा एक महिनाभित्र संसदमा दर्ता गराई सक्न सरकार, प्रधानमन्त्री तथा मन्त्रिपरिषद्को कार्यालय र आयोगलाई समितिले निर्देशन दिएको हो ।

राष्ट्रिय गौरवका आयोजनाको कार्य प्रगतिप्रति असन्तुष्टि जनाउँदै समिति सदस्यहरुले यथाशिघ्र कार्यान्वयमा जोड दिएका थिए । समितिका सभापति रविन्द्र अधिकारीले विस्तृत आयोजना प्रतिवेदन (डीपीआर) बिना नै आयोजनाहरु अघि बढाउँदा समस्या भइरहेको बताउनुभयो । 

समितिले योजना आयोगलाई योजना बैंक (प्रोजेक्ट बैंक) को रुपमा काम गर्न निर्देशन दिएको छ । स्थानीय तहको पुनसंरचना भइसकेको अवस्थामा अब बनाइने योजनाहरु संघीयता मैत्री हुनु पर्नेमा समिति बैठकले जोड दिएको छ । स्थानीय तहको संरचनामा भएको परिवर्तनले हालको परियोजना चक्रमा केही परिवर्तन गर्नु पर्ने देखिएकाले सो सम्बन्धमा स्पष्ट अवधारणा तयार गर्न समितिले आयोगलाई निर्देशन दिएको छ ।

योजना आयोगका उपाध्यक्ष मिनबहादुर श्रेष्ठले निर्वाचनलाई आधार मानेरै आगामी आर्थिक वर्षको बजेट जेठ १५ मा आएलगतै १६ गतेबाट स्वत अख्तियारी हुने र असोजभित्रमा सबै आयोजनाका टेन्डरहरु भइसक्ने गरी तयारी भइरहेको जानकारी दिनुभयो । आयोगका सदस्य डा. स्वर्णीम वाग्लेले राष्ट्रिय गौरवका आयोजनाको निर्धारण र कार्यान्वयन सम्बन्धी प्रारम्भिक मस्यौदा तयार भएको जानकारी दिनुभयो ।

चैत्र २, २०७३

श्रीलंकाको खराब प्रदर्शन

उत्तम रिजाल,  बंगलादेश विरुद्धको दोस्रो टेष्टको पहिलो इनिङ्गमा श्रीलंकाले खराब प्रदर्शन गरेको छ । कोलम्बोमा टस जितेर ब्याटिङ्ग गरेको घरेलु टोलिले पहिलो दिनको खेल सकिंदा सम्म ८३.१ ओभर खेल्दै ७ विकेटको क्ष्यतिमा २ सय ३८ रन बनाएको छ । क्रिजमा दिनेश चण्डीमाल सर्बाधिक ८६ रनमा अविजित छन् ।

उनले २ सय १० बलको सामनामा ४ चौकाको सहायताले सो रन बनाएका हुन् । उनलाई कप्तान रंगना हेराथले ६३ बलमा २ चौकाको सहायताले १८ रनमा साथ दिइरहेका छन् । यसअघि ओपनर दिमुथ करुनारत्नेलाई पहिलो विकेट स्वरुप ७ रनमा गुमाएको श्रीलंकाले कुशल मेण्डिसलाई दोस्रो विकेट स्वरुप ५ रनमा गुमाएको थियो ।

त्यसपछि अर्का ओपनर उपल थारंगा ११ तथा गनारत्ने १३ रनमा आउट हुँदा धनन्जय डे शिल्भा र निरोशन डिकवेलले समान ३४ रनको योगदान दिए । त्यसपछि दिलरुवान परेराले ९ रनमा चित्त बुझाए । बलिङ्गतर्फ मुस्तफिजुर रहमान र मेहेदि हसनमिराजले २/२ तथा सुबाशिस रोय, तैजुल स्लाम र सकिब अल हसनले समान एक विकेट लिए ।

भोलि दोस्रो दिनको खेल शुरुहुँदा घरेलु टोलिले ७ विकेटको क्ष्यतिमा २ सय ३८ रनबाट खेल्न शुरु गर्नेछ ।

२ चैत्र,२०७३

दोस्रो खेलमा नेपाल ७ विकेटले विजयी

उत्तम रिजाल,   आइसिसि वल्ड क्रिकेट लिग च्याम्पियनसिपको केन्या विरुद्धको दोस्रो खेलमा नेपाल विजयी भएको छ । नेपाल आज ७ विकेटले विजयी भएको हो । पहिलो खेलमा पराजय भोगेर दवावमा रहेको नेपालले आजको जितसँगै केहि आशा भने जगाएको छ । 

किर्तिपुर स्थित त्रिवि मैदानमा टस हारेर ब्याटिङ्ग गरेको पाहुना टोली केन्याले प्रस्तुत गरेको एक सय ५६ रनको लक्ष्य नेपालले खेल सकिन एक सय १८ बल अगावै पुरा गरेको थियो । नेपालका लागि कप्तान तथा ओपनर ज्ञानेन्द्र मल्लले सर्बाधिक अविजित ६४ तथा दिपेन्द्रसिंह ऐरीले ६२ रनको योगदान दिए । ९३ बलको सामना गरेका मल्लले ८ चौका र एक छक्का प्रहार गरे । उता सिनियर टोलीबाट दोस्रो अन्तराष्ट्रिय प्रतियोगिता खेलेका ऐरीले ६६ बलमा ८ चौका र एक छक्का प्रहार गरेका थिए । उनको अन्तराष्ट्रिय प्रतियोगिताको दोस्रो सर्वाधिक रन हो ।

 यस अघि गत बर्ष मात्र अन्डर नाइन्टिन एशिया कपको समुह चरणको खेलमा श्रीलंका विरुद्ध ९० रन बनाएका थिए । सो खेलमा उनी एलबीडब्लु धरापमा परेसँगै नेपाल एक रनले पराजित भएको थियो । त्यस्तै आज शरद भेष्वाकरले आफ्नो आक्रामक खेल देखाए । ११ बल मात्र खेलेका उनी ४ चौका र एक छक्का प्रहार गर्दै २४ रनमा अविजित रहे । उनले ३१ औं ओभरको दोस्रो बलमा छक्का प्रहार गर्दा नेपालले एक सय ६० रन जोड्यो । अर्का ओपनर सुनिल धमला एक तथा सागर पुन ५ रनमा पेवेलियन फर्किए ।

 केन्याले एक वाइ,दुई लेगवाई र एक वाइड गरी चार रन अतिरिक्त दिएको थियो । यसअघि पहिले ब्याटिङ्ग गरेको केन्या ४६ दशमलव एक ओभरमा एक सय ५५ मा समेटिएको थियो । उसका लागि कोलिन्स ओमोन्दी ओवुयाले सर्बाधिक ४८ तथा ओपनर इर्फान करिमले ३८ र कप्तान राकेप पटेलले २१ रन जोड्न बाहेक अन्यले खासै प्रदर्शन गर्न सकेनन् । केन्यालाई सस्तैमा समेट्ने क्रममा अलराउण्डर शरद भेष्वाकरले ४, मेहबुब आलम र बसन्त रेग्मीले दुई/दुई तथा संदिप लामिछाने र सागर पुनले एक/एक विकेट लिएका थिए । जितसँगै नेपालको अघिल्लो चरण पुग्ने सम्भावना कायमै रहेको छ ।

३० फागुन,२०७३

रङहरुको पर्व होली पहाडी जिल्लामा उत्साहका साथ मनाइयो

रङहरुको पर्व होली उपत्यका सहित पहाडी जिल्लामा आज आपसी सद्भाव, उत्साह र हर्सोल्लासका साथ मनाइएको छ । असत्यमाथि सत्यको जितको प्रतिकका रुपमा यो पर्ब मनाउने गरिन्छ । राजधानीका विभिन्न स्थानमा सामुहिक कार्यक्रम आयोजना गरेर होली खेलिएको छ । 

पहाडी जिल्लामा आज मनाइएको होली तराईमा भने भोली मनाइदैछ । सरकारले पहाडी जिल्लामा आज र तराई मधेसमा भोली सार्वजनिक बिदा दिएको छ । होलीका क्रममा अहिलेसम्म कुनै अपृय घटना नभएको प्रहरीले जनाएको छ । 

काठमाण्डौको बसन्तपुरमा एक साता अघि विधिपूर्वक चिर ठड्याएपछि होली पर्व शुरुवात भएको थियो । असत्यमाथि सत्यको जीतको सुचकका रुपमा ठड्याइएको चीरलाई आज टुँडीखेलमा विर्सजन गर्ने चलन छ । 

यसैबीच होलीको अवसरमा शुभकामना दिंदै राष्ट्रपति विद्यादेवी भण्डारीले सबै नेपालीमा खुसीका रङहरु छर्दै हर्षोल्लास र शान्तिको सन्देश फैलाउन सकोस् भन्ने कामना गर्नुभएको छ । होलीले नेपालीबीचको एकता, सद्भाव र सहिष्णुतालाई अक्षुण्ण राख्दै सबै संस्कृति एवम् परम्पराको संरक्षण र संवद्र्धन गर्ने प्रेरणा प्रदान गरोस् भन्ने कामना पनि राष्ट्रपतिले गर्नुभएको छ ।
२९ फागुन,२०७३