नयाँ शक्ति पार्टीका संयोजक बाबुराम भट्टराई सहितका नेता प्रहरी हिरासतमा

निर्वाचन आयोगमा धर्ना दिन गएका बेला पक्राउ परेका नयाँ शक्ति पार्टीका संयोजक बाबुराम भट्टराई सहितका नेताले प्रहरी हिरासत मै धर्ना शुरु गरेका छन् । निर्वाचन आयोगको कार्यालय अगाडी शान्तिपुर्ण धर्ना दिने क्रममा पुर्व–प्रधानमन्त्री भट्टराई सहितका नेता कार्यकर्तालाई प्रहरीले नियन्त्रणमा लिएर पुलिस क्लवमा राखेको छ ।

प्रहरीले छोडेपनि संयोजक भट्टराईले निस्कन अश्विकार गर्दै हिरासत मै धर्ना शुरु गरेको स्वकिय सचिव विश्वदिप पाण्डेले जानकारी दिनुभयो । भट्टराई सहित प्रहरीले सांसद गंगा चौधरी, क्रान्तिकारी माओवादीका नेता सिपी गजुरेल, पुर्व-गृह राज्यमन्त्री रिजवान अन्सारी, हिसिला यमी, परशुराम तामाङ लगायतलाई नियन्त्रणमा लिएर महाराजगन्जस्थित २ नम्बर गणमा केहिवेर राखेर नेपाल पुलिस क्लबमा ल्याएको थियो ।

नेकपा क्रान्तिकारी माओवादीका अध्यक्ष मोहन वैद्यले पुलिस क्लबमा गएर भट्टराई लगायतका नेतासँग भेट गर्नुभएको छ । नयाँशक्ति लगायतका पार्टीले स्थानीय तह निर्वाचनमा चुनाव चिन्ह माग गरेका छन् । निर्वाचन आयोगमा विधिवत दर्ता भएका पार्टीलाई चिन्ह नदिइएपछि ति दलले संघर्षका क्रममा आज धर्ना दिएका हुन् ।

यसअघि प्रधानमन्त्री पुष्पकमल दाहाल, प्रमुख निर्वाचन आयुक्त अयोधीप्रसाद यादवलाई ज्ञापनपत्र बुझाए पनि सुनुवाई नभएको भन्दै ती दलले आज विहान ९ देखि ११ बजेसम्म निर्वाचन आयोगमा धर्ना दिने कार्यक्रम तय गरेको थिए । २० चैत्र, २०७३

मार्चाले निर्वाचनमा भाग नलिने संकेत देखाएको पौडेलको आरोप

नेपाली कंग्रेसका वरिष्ठ नेता रामचन्द्र पौडेलले संयुक्त लोकतान्त्रिक मधेशी मार्चाले एक पछि अर्को वखेडा झिकेर स्थानीय तह निर्वाचनमा भाग नलिने संकेत देखाएको आरोप लगाउनुभएको छ ।

सहमति हुनै लाग्दा स्थानीय तहको संख्या र मतदाता थप्ने प्रस्तावले निर्वाचन हुन नदिने चलखेल बढेको पैडेलको भनाई छ । वरिष्ठ नेता पौडेलले आन्दोलनरत मधेशी मोर्चालाई सहमतिमा ल्याउन अधिकतम पहल गर्ने र सम्भव नभए मोर्चाबिनानै निर्वाचनमा जानुको विकल्प नभएको बताउनुभयो ।

 

मुलुक अव निर्वाचनमा होमिसकेकाले फर्कने आधार नरहेको पौडेलको भनाई छ । वरिष्ठ नेता पौडेलले निर्वाचन मार्फत जनमत वुझ्न समेत मोर्चालाई आग्रह गर्नुभयो । २० चैत्र, २०७३

आयरल्याण्ड ३ विकेटले विजयी

अफगानिस्तान विरुद्धको चौथो वण्डेमा आयरल्याण्ड ३ विकेटले विजयी भएको छ । अफगानिस्तानले प्रस्तुत गरेको  २ सय २१ रनको लक्ष्य उसले खेल सकिन १९ बल अगावै पुरा गर्यो ।

ओपनर ब्याट्समेन पउल स्टर्लिङ्गलाई  २८, एड जोयसलाई २४ तथा कप्तान विलियम पोटरफिल्डलाई  ६ रनमा गुमाउँदा ३ विकेटको क्ष्यतिमा आयरल्याण्डले मात्र  ५९  रन जोडेको थियो । त्यसपछि दबाबमा रहेको उसले एक सय  ३० रन जोड्दा  ६ विकेट  गुमाएर पराजयतर्फ  धकेलिएको उसका लागी विकेट किपर  गेरी विल्सल  र  केबिन ओब्रेनले  ६६ रनको साझेदारी गरेपछि टोली जितको नजिक पुगेको थियो । ६७ बलको सामना गरेका विल्सन  ३ चौकाको सहायतामा  ४१  रनमा आउट भए ।

त्यसपछि  क्रिजमा आएका जर्ज डकरेल  र ओब्रेनले टिमलाई जीत दिलाए । अविजित यात्रा तय गरेका डकरेलले १० बलको सामनामा ५ तथा ६० बलको सामना गरेका ओब्रेनले विष्फोटक ब्याटिङ्ग गर्दै ८ चौका र २ छक्काको सहायतामा ७२ रन जोडे । उनले ४७ औं ओभरको पाँचौ बलमा चौका प्रहार गरेसँगै आयरल्याण्डले २ सय २४ रन बनाएको थियो । ओब्रेन नै म्यान अफ दि म्याच घोषित भए । बलिङ्गतर्फ मोहम्मद नाबीले ४ तथा रसिद खानले २ विकेट लिए ।

यसअघि इण्डीयाको नोयडामा टस जितेर ब्याटिङ्ग गरेको अफगानिस्तानले आफ्ना आक्रामक र भरोसादार खेलाडीलाई सस्तैमा गुमाएपछि अफगानिस्तान एक सय २० रनमा समेटिएको थियो ।

उसले खेल सकिन एक बल अगाबै सबै विकेट गुमायो । अफगानिस्तानले आफ्ना ६ ब्याट्समेनलाई दोहोरो अंकको रन जोड्न नपाउँदै गुमायो । ओपनर मोहम्मद सहजाद एक रनमा आउट हुँदा उस्मान घानी तीन रनमा पेवेलियन फर्किए । त्यसपछि अर्का आक्राम ब्याट्समेन राहत शाहले खाता खोल्नै भ्याएनन् । ११ रन जोड्दा ३ विकेट गुमाएको उसले ८३ रन जोड्दा थप ४ विकेट गुमाएको थियो । त्यसपछि १४२ रन जोड्दा आठौं विकेट गुमाएको थियो । 

उसका लागी सफिकउल्लाहले सर्बाधिक ४२ तथा मोहम्मद नाबी र दौलत जद्रानले समान ४१ रनको योगदान दिए । जद्रान अविजित रहेका थिए । कप्तान अस्घर तनिकजाइले ३५ रनको योगदान दिएका थिए । अफगानिस्तानलाई सस्तैमा समेट्ने क्रममा केविन ओब्रेनले ४, जाकोब मुल्डरले ३ र एण्डी म्याकब्रेनले २ विकेट लिए ।

 

जितसँगै पाँच म्याचको श्रृंखला २–२ को बराबरीमा पुगेको छ । पाँचौ तथा अन्तिम म्याच पर्सी शुक्रबार नोयडामा हुनेछ ।

९ चैत्र, २०७३

राष्ट्रिय दल बन्न ३ प्रतिशत थ्रेसहोल्ड र १ सिट जित्नै पर्ने

काठमाडौं।  संसदको राज्य व्यवस्था समितिले ३ प्रतिशत थ्रेसहोल्डको प्रावधान सहित राजनीतिक दलसम्बन्धी विधेयक पारित गरेको छ । समितिको आज बसेको बैठकले उपसमितिको प्रस्ताव अनुसार बिधेयक पारित गर्दै संसद बैठकमा लैजाने निर्णय गरेको हो । बिधेयकमा राष्ट्रिय दलको मान्यता पाउन प्रतिनिधि सभा निर्वाचनमा समानुपातिक तर्फ तीन प्रतिशत मत र प्रत्यक्ष तर्फ कम्तीमा एक सिट जित्नु पर्ने प्रावधान राखिएको समिति सदस्य राजेन्द्र फुयांलले जानकारी दिनुभयो ।

बैठकमा नेकपा माले, मजदुर किसान पार्टी, जनमुक्ति पार्टी र जनजागरण पार्टीका सांसदले थ्रेसहोल्डको प्रावधानमा असन्तुष्टि जनाउदै बैठक बहिष्कार गरेका थिए । समितिले पारित गरेको बिधेयक आजै अपरान्ह बस्ने संसद बैठकमा पेश हुनेछ । 

नयाँ प्रावधान अनुसार कुनैपनि दलले राष्ट्रिय मान्यता प्राप्त गर्न कुल मतको ३ प्रतिशत र प्रत्यक्षतर्फ एक सिट जित्नैपर्ने वाध्यता भएको छ । प्रत्यक्षमा सिट जित्ने तर ३ प्रतिशत मत प्राप्त नगरेको दलका सांसदले स्वतन्त्रको हैसियतमा संसदमा प्रतिनिधित्व गर्ने समिति सदस्य रामकृष्ण यादवले जानकारी दिनुभयो ।

प्रत्यक्षतर्फ सिट नजितेको तर ३ प्रतिशत वा बढी मत प्राप्त गरेको दलले पनि समानुपातिकमा स्वतन्त्रको हैसियतले प्रतिनिधत्व गर्न पाउने यादवको भनाइ छ । सिंहदरवारमा आज बिहान बसेको समिति बैठकमा मजदुर किसान पार्टीका प्रेम सुवाल, नेकपा मालेका अइन्द्रसुन्दर नेम्बाङ, जनजागरण पार्टीका लोकमणी ढकाल र जनमुक्तिका शिवलाल थापाले असहमति राख्दै सभापतिलाइ ज्ञापनपत्र बुझाएर बहिष्कार गरेका थिए । एमाले सांसद फुयालले नयाँ प्रावधान संघीय लोकतान्त्रिक गणतन्त्र संस्थागत गर्दै जनताको चाहाना पुरा गर्न कोषे ढुंगा सावित हुने दावी गर्नुभयो ।

कांग्रेस सांसद आनन्दप्रसाद ढुंगाना संयोजकत्वको उपसमितिले बिहान लामो समयको छलफलपछि थ्रेसहोल्डको ब्यवस्थासहितको प्रतिवेदन तयार पारेको थियो । सरकारले प्रस्तुत गरेका निर्वाचनसँग सम्बन्धित अन्य चार वटा विधेयक यसअघि नै पारित गरेपनि दलहरुबीच सहमति हुन नसक्दा राजनीतिक दलसम्बन्धी विधेयक भने राज्य ब्यवस्था समितिमै अड्किएको थियो ।

९ चैत्र, २०७३

मन्त्रिपरिषद् वैठकले प्रधानमन्त्रीको चीन भ्रमणको कार्यतालिका तय गर्ने

काठमाडौं।   प्रधानमन्त्रीको आसन्न चीन भ्रमणको कार्यतालिका तय गर्न मन्त्रिपरिषद्को वैठक आज बस्दैछ । भोलीदेखि सुरु हुने प्रधानमन्त्री पुष्पकमल दाहालको साताव्यापी चीन भ्रमणका क्रममा उठाईने एजेण्डा तथा दुई पक्षीय भेटवार्तालाई अन्तिम रुप दिन मन्त्रिपरिषद् वैठक बस्न लागेको भौतिक पूर्वाधार तथा यातायात मन्त्री रमेश लेखकले जानकारी दिनुभयो ।

वैठक सिंहदरवारमा अपरान्ह ५ वजेपछि बस्दैछ । प्रधानमन्त्रीको भ्रमणका क्रममा आधा दर्जन एजेण्डामा छलफल हुने भनिएपनि कुनै सम्झौता भने नहुने मन्त्रिपरिषद् श्रोतले जानकारी दिएको छ । आगामी शनिवार बोवाओ फोरमलाई सम्वोधन गर्न जान लागेका प्रधानमन्त्री दाहालले १४ गते सोमबार वेइजिङस्थित ग्रेट हल अफ द पिपलमा चिनियाँ राष्ट्रपति सि जिनपिङसंग औपचारिक भेटवार्ता गर्दैहुनुहुन्छ । राष्ट्रपति जिनपिङसंग १५ मिनेटको भेटको समय मिलाईएको मन्त्रिपरिषद् श्रोतले जनाएको छ ।

यसैबीच प्रधानमन्त्री दाहाल चीन भ्रमणबाट फर्किएपछि मात्रै प्रहरी महानिरिक्षक नियुिक्त प्रक्रिया सुरु हुने भएको छ । प्रधानमन्त्रीको भ्रमणका क्रममा गृहमन्त्रालयले कार्य मूल्याङ्कन प्रतिवेदनलाई अन्तिम रुप दिने र उहाँ फर्किएपछि नियुिक्त प्रक्रियाले अन्तिम रुप लिने मन्त्री लेखकले जानकारी दिनुभयो । 

यद्यपी गृहमन्त्रालयले भने सर्वोच्च अदालतको परमादेशपछि नयाँ आईजीपी नियुक्तीका लागि आजैबाट प्रक्रिया सुरु गर्दैछ । सर्वोच्चले कार्यसम्पादन र वरिष्ठताका आधारमा आईजीपी नियुक्ती गर्न आदेश दिएपछि गृहले ४ डिआईजीबारे कार्यसम्पादन मूल्याङ्कन सुरु गर्न लागेको गृहमन्त्रालय श्रोतले जनाएको छ ।

९ चैत्र, २०७३

प्रधानमन्त्रीको चीन भ्रमणका क्रममा सन्धि सम्झौतामा हस्ताक्षर नहुने

काठमाडौं।  प्रधानमन्त्री पुष्पकमल दाहालले भोलिबाट गर्ने चीन भ्रमणका कुनै पनि सन्धि सम्झौता र समझदारीमा हस्ताक्षर नहुने भएको छ । परराष्ट्र मन्त्रालयले आज पत्रकार सम्मेलन गरी भ्रमणका क्रममा द्विपक्षीय सम्बन्ध र सहायतामा सम्झौता गर्न नेपालले आवश्यक तयारी पूरा गरेको र निकट भविष्यमा हुने अन्य भ्रमणमा सहमति भई हस्ताक्षर हुने विश्वास व्यक्त गरेको छ ।

चीन भ्रमणका क्रममा प्रधानमन्त्री दाहालले चीनका राष्ट्रपति सि जिनपिङसँग शिष्टाचार भेट गर्ने पक्का भएको परराष्ट्रले जनाएको छ । यद्यपि भेटको मिति भने परराष्ट्रले जारी गरेको विज्ञप्तिमा उल्लेख छैन । प्रधानमन्त्री दाहालले बोआओ मञ्चको उद्घाटन समारोहलाई सम्बोधन गर्ने कार्यक्रम रहेको छ ।

त्यस्तै चैत १३ गते प्रधानमन्त्री दाहालले बेइजिङ फरेन स्टडिज युनिभर्सिटी मा व्यवसायी, शिक्षाविद् र विद्यार्थीहरुलाई सम्बोधन गर्नुहुने भएको छ । त्यसपछि चीनको तिब्बत स्वशासित क्षेत्रको भ्रमण गरी दाहाल चैत १६ गते स्वदेश फर्किने कार्यक्रम छ । प्रधानमन्त्रीको टोलीमा परराष्ट्र मन्त्री, परराष्ट्रका सचिव र प्रधानमन्त्री कार्यालय र परराष्ट्रका अन्य उच्च अधिकारीहरु समेत सम्मिलित हुनु हुनेछ ।

९ चैत्र, २०७३

१२ मुलुकमा सिफारिस राजदुतको नाम अनुमोदन

 काठमाडौं।  संसदीय सुनुवाइ विशेष समितिले विभिन्न १२ वटा मुलुकमा सिफारिस राजदुतको नाम अनुमोदन गरेको छ । सिंहदरबारमा आज बसेको समितिको बैठकले सुनुवाइ सकेपछि १२ जनाकै नाम अनुमोदन गरेको हो ।

समितिले लगातार तीन दिन सुनुवाई गरेको थियो । समितिले बंगलादेशका लागि प्रस्तावित चोपलाल भुषाल, बहराईनका लागि प्रस्तावित पदम सुन्दास, म्यानमारका लागि प्रस्तवित भीमकृष्ण उदास, श्रीलंकाका लागि प्रस्तावित विश्वम्भर प्याकुरेल र साउदी अरेबियाका लागि प्रस्तावित महेन्द्रप्रसाद सिंह राजपुतको आज सुनुवाई गरेको हो ।

 

समितिले हिजो ओमानका लागि प्रस्तावित शर्मिला पराजुली ढकाल, इजरायलका लागि प्रस्तावित निरञ्जनकुमार थापासँग सोधपुछ गरेको थियो । यस्तै कतारका लागि प्रस्तावित रमेश कोईराला, गणतन्त्र कोरियाका लागि प्रस्तावित अर्जुन जंगबहादुर सिंह, डेनमार्कका लागि प्रस्तावित युवराज लम्साल र जापानका लागि प्रस्तावित प्रतिभा राणाको पनि सुनुवाइ गरेको थियो । अस्ती सोमबार पहिलो दिन अष्ट्रेलियाका लागि प्रस्तावित राजदूत लक्की शेर्पाको सुनुवाई भएको थियो ।

 

अनुमोदन भएका १२ जनाले नै आफ्नो कार्यकाल सफल बनाउन योग्यता र क्षमताले भ्याएसम्मका प्रयास जारी राख्ने बताएका थिए । संसदीय समितिबाट अनुमोदन भएपछि राष्ट्रपतिले राजदुत नियुक्त गर्ने संवैधानिक व्यवस्था छ ।

९ चैत्र, २०७३