१० प्रतिशत निशुल्क स्वास्थ्य सेवा प्रक्रिया आजबाट शुरु

पुस १, २०७३ ।    निजी स्वास्थ्य संस्थाहरुले बिपन्न, असहाय र वेवारिसे नागरिकलाई कुल शैयाको १० प्रतिशत निशुल्क स्वाथ्य सेवा दिने प्रक्रिया आजबाट शुरु गरेका छन् । सरकारले स्वास्थ्य निर्देशिकामा रहेको बिपन्न, असाहय र असक्त बर्गलाई निशुल्क सेवा दिने सम्बन्धी व्यवस्थालाई आजबाट अनिवार्य रुपमा कार्यान्वयन गराउन निर्देशन दिइसकेको छ ।

निशुल्क स्वास्थ्य सेवा लिनका लागि गाविस वा नगरपालिका, जिल्ला प्रशासन कार्यालय, जिल्ला जनस्वास्थ्य कार्यालय, स्वास्थ्य मन्त्रालय र काठमाडांैको हकमा बीर अस्पतालको सिफारिस अनिवार्य चहिनेछ । त्यसरी सिफारिस लिएर आएकाहरुलाई निजी अस्पतालहरुले कुल शैयाको १० प्रतिशत निशुल्क उपलव्ध गराउनेछन् । निशुल्क उपचार सेवा अन्र्तगत बिरामीले चिकित्सकको परामर्श, ल्याव परीक्षण नर्सिङ, शैया अस्पतालमा उपलव्ध डाइग्नोष्टिक र अक्सिजनका लागी पैशा तिर्नुपर्ने छैन । 

स्वास्थ्यमन्त्री गगन थापाले १० प्रतिशत निशुल्कको व्यवस्था कार्यान्वयनमा निजी अस्पतालहरुलाई परिपत्र भइसकेकाले आजदेखी बिपन्न, असक्त र असहाय बिरामीले केही राहत पाउने बताउनुभयो । यद्यपी यो व्यवस्था कार्यान्वयनमा केही जटिलता आउन सक्ने निजी अस्पतालका संचालकहरुले बताएका छन् । 

निजी अस्पतालहरुको छाता संगठन अफिनका बरिष्ठ उपाध्यक्ष कुमार थापाले सरकारले तोकेका शिर्षकमा निशुल्क गर्दा बिरामी थप गम्भिर भई आइसियूमा जाने अवस्था आए के गर्ने भन्ने स्पष्ट भइनसकेको बताउनुभयो । स्वास्थ्य मन्त्री थापाले तत्काल सरकारले निशुल्क गर्न भनेको शिर्षकमा सेवा दिन आग्रह गर्दै मन्त्रालयले केही दिनमा थप स्पष्ट नीति तय गर्ने बताउनुभयो । 

एलेप्पोबाट बालबालिकासहित ३ हजार बढी अन्यत्र स्थानान्तरण

पुस १, २०७३ ।  सिरियाको द्वन्द्वग्रस्त क्षेत्र एलेप्पोबाट बालबालिकासहित ३ हजार बढी घाइते  तथा गैरसैनिकलाई स्थानान्तरण गरिएको छ ।  

गत बुधबार बिद्रोहीले अघि सारेको नयाँ सम्झौता लागू भएसंगै त्यहाँबाट ४० बढी घाइते र बालबालिकासहित ३ हजार बढीलाई अन्यत्र स्थानान्तरण गरिएको अन्तर्राष्ट्रिय रेड क्रसले जनाएको हो  ।  हजारौं सिरियाली विद्रोही तथा तिनका परिवारलाई पनि इड्लिब र एलेप्पो प्रान्तकै अन्य विद्रोही नियन्त्रित क्षेत्रमा स्थानान्तरण गरिदैछ । इन्टरनेशनल कमिटि अफ रेड क्रसले बिद्रोही नियन्त्रित क्षेत्रबाट मानवीय स्थानान्तरण गर्न अझै केही दिन लाग्ने जनाएको छ । 

चार बर्षे  गृहयुद्धपछि सरकारी सेनाले एलेप्पोमा विद्रोहीले नियन्त्रणमा लिएका अधिकांश भाग पुनस् कब्जा गरेपछि कमजोर बनेका बिद्रोहीले गत बुधबार नयाँ सम्झौता गरी मानवीय सहायताका लागि तयार भएका थिए ।   सम्झौताका लागि मध्यस्थता गरेको रुसले, स्थानान्तरण प्रकृया  छिटो र प्रभावकारी बनाई घाइते तथा अन्य सबैको सुरक्षाको प्रत्याभुती गराउने र कुनै समस्यामा पर्न नदिइने संयुक्त राष्ट्र संघलाई बताएको छ ।   राष्ट्रपति बसर अल असदले भने यसलाई महत्वपूर्ण जीतका रुपमा हेरिएको बताएका छन् ।

इण्डीयासँगको पराजयसँगै नेपाल बाहिरीयो

उत्तम रिजाल, १ पुस, २०७३ ।   श्रीलंकामा जारी अण्डर नाइन्टीन एशिया कप क्रिकेटमा नेपाल इण्डीयासँग पराजित भएको छ । इण्डीयासँगको पराजयसँगै नेपाल प्रतियोगिताबाट पनि बाहिरीएको छ ।

समुह चरणको पहिलो खेलमा आयोजक श्रीलंकासँग एक रनले पराजित भएपछि बाँकी दुबै खेल जित्नु पर्ने दबाबमा रहेको नेपाल आज इण्डीयासँग ६ विकेटले पराजित भएको हो । कोलम्बोमा टस जितेर ब्याटिङ्ग गरेको नेपालले प्रस्तुत गरेको एक सय ७३ रनको लक्ष्य इण्डीयाले खेल सकिन ९९ बल अगाबै पुरा गरेको थियो । ओपनर  पृथ्वी सावलाई ५ रनमै नेपालका कप्तान तथा स्पिनर संदिप लामिछानेले पेवेलियनको बाटो देखाउँदै विकेट लिएर जित निकाल्न सक्ने संकेत देखाएपछि त्यसपछि सहत विकेट लिन नसक्दा पराजय भोगेको थियो ।

दोस्रो विकेटका लागी नेपालले १९ औं ओभर सम्म पर्खिनु परेको थियो । अर्का ओपनर हिमांसु राना दोस्रो विकेट स्वरुप १९ औं ओभरको अन्तिम बलमा विकेट किपर प्रकाश केसीद्धारा समातिएका थिए । उनी पवन सराफको बलमा केसीद्धारा समातिदा ६१ बलमा ५ चौका सहित ५१ रनमा थिए । टिमका लागि अर्का आक्रामक ब्याट्समेन सुबमन गिलले ५७ रनको योगदान दिएका थिए । बलिङ्गतर्फ पवन सराफले तीन तथा सन्दिप लामिछानेले एक विकेट लिए ।

यसअघि नेपालले रोहित कुमार पौडेलको अविजित ६८,दिपेन्द्रसिंह ऐरीको ३४,आसिफ सेखको १८,प्रकाश केसीको १३ तथा कप्तान सन्दिप लामिछानेको ७ रनको मद्दतमा निर्धारीत ५० ओभरमा ९ विकेट गुमाइ एक सय ७२ रन जोडेको थियो । नेपालले अब समुह चरणको अन्तिम खेलमा मलेशियाको सामना गर्नेछ । 

‘कक्षा ११ को परीक्षाफल प्रकाशित, ५१.७ प्रतिशत विद्यार्थी उत्तिर्ण

३० मंसिर, २०७३,काठमाडौं।   राष्ट्रिय परिक्षा बोर्डले कक्षा ११ को यसवर्षको परीक्षाफल प्रकाशित गरेको छ ।

पौष मसान्तमा भएको परीक्षामा ५१ दशमलव ७ प्रतिशत अर्थात् १ लाख ३७ हजार ६ सय ५ विद्यार्थी उत्तिर्ण भएको परीक्षा नियन्त्रक सन्तोष अर्यालले जानकारी दिनुभयो । जम्मा २ लाख ६६ हजार १ सय ३ विद्यार्थी सहभागी भएको परीक्षामा १ लाख २८ हजार ४ सय ९८ विद्यार्थी अनुत्तिर्ण भएका छन् । एउटा विषयमा मात्र अनुर्तिण भएका विद्यार्थीले माघ ८ गते मौका परिक्षा दिन पाउने  छन् । 

८ वर्षिय बालकको अपहरण पछि हत्या, आरोपीत ३ पक्राउ

 ३० मंसिर , २०७३ ।  सप्तरीमा ८ वर्षिय बालकको अपहरणपछि हत्या भएको छ । गत मंसिर ११ गते अपहरणमा परेका हरिपुर ३ का ८ बर्षीय दुर्गानन्द साहको हत्या भएको प्रहरीले जनाएको छ ।

हत्या भएको २० दिनपछि प्रहरीले बालकको शब शौचालयको सेफ्टी टयाङकीवाट बरामद गरेको छ भने अपहरण र हत्यामा संलग्न भएको आरोपमा ३ जनालाई नियन्त्रणमा लिएको छ । हरिपुर ३ का चुडामणी ठाकुर, हरिपुर १ का सामबाबु गुप्ता र देउरी गाबिस २ का कपिलदेब दासलाई प्रहरीले नियन्त्रणमा लिएको हो । सप्तरी प्रहरीले आज अपरान्ह पत्रकार सम्मेलन गरी पक्राउ परेकालाई सार्वजनिक गरेको छ ।

प्रहरी उपरिक्षक दिवेश लोहनीका अनुसार साहका छिमेकी ठाकुरले गत मंसिर ११ गते साँझ ६ वजे खरायो देखाईदिने भन्दै बालकलाई अपहरण गरि आफनो घर लगेको अनुसन्धानले देखाएको छ । ठाकुरले गुप्ता र दासको सहयोगमा दुर्गानन्दलाई सोही दिन राती मुख थुनेर हत्या गरि छिमेकी पन्नेलाल साहको शौचालयको सेफटी टयाङ्कीमा लुकाएका थिए । अपहरण र हत्या गरेको ६ दिन पछि ठाकुरले वालक दुर्गानन्दकी आमा ममतादेबीलाई मोवाईलमा म्यासेज पठाई पाँच लाख रुपैयाँ फिरौती मागेको पाइएको प्रहरीले जनाएको छ । 

मंसिर ११ गते वालक हराएपछि अनुसन्धानमा जुटेको प्रहरीले कल डिटेल र आधुनिक प्रबिधी प्रयोग गरी आरोपीतलाई पक्राउ गरेको हो । शव पोष्टमार्टमका लागि विपी कोईराला स्वास्थ्य बिज्ञान प्रतिष्ठान धरान पठाएको डिएसपी दानवहादुर कार्कीले जानकारी दिनुभयो ।

एसीसी अण्डर १९ क्रिकेटमा नेपाल श्रीलंकासंग १ रनले पराजित

३० मंसिर , २०७३ ।    एसीसी अण्डर १९ एसिया कप क्रिकेटमा नेपाल श्रीलंकासंग १ रनले पराजित भएको छ । जितको नजिक पुगेको नेपाल अन्तिम समयमा सम्हालिन नसक्दा पहिलो खेलमै पराजित भएको हो ।

२ सय २८ रनको लक्ष्य पछ्याएको नेपाल ३ बल बाँकी छँदै २ सय २६ रनमा अलआउट हुन पुग्यो । दिपेन्द्र सिंह ऐरीले ९० रन बनाएपछि जितको नजिक पुगेको नेपालले ३० रन जोड्न पछिल्ला ५ विकेट गुमायो । ३२ रनमा ३ विकेट गुमाएर दबाबमा आएको नेपालको इनिङ्स दिपेन्द्रले सम्हाले । ९९ बल खेल्दै उनले ९ चौका र १ छक्का प्रहार गरे । 

नेपालका अविनाश कर्णले ४०, अदिल खानले ३९ र प्रकाश केसीले १४ रन बनाए ।  ओपनरद्धय सन्दिप सुनार २ तथा आशिफ शेख १ रनमा पवोलियन फर्किएको खेलमा भिम सार्की ८, कमल सिंह ९, सन्दिप लामिछाने १ र पवन सर्राफ शुन्य रनमा आउट भए । श्रीलंकाका कामिन्डु मन्डिसले सर्वाधिक ३ विकेट लिए । आईसीसीको प्रतिबन्धपछि घरेलु क्रिकेट शुन्य रहेको अवस्थामा देशका विभिन्न सहरबाट प्रतिभावान खेलाडी छान्दै नेपालले राष्ट्रिय टोली गठन बनाएको थियो ।

मात्र १५ दिनको बन्द प्रशिक्षणबाट नेपाली टोली प्रतियोगिता खेल्न श्रीलंका गएको थियो ।  यसअघि कोलम्बोमा नेपालले टस जितेर फिल्डिङ रोजेपछि ब्याटिङमा उत्रिएको घरेलु टोली श्रीलंकाले निर्धारित ५० ओभरमा ८ विकेट गुमाएर २ सय २७ रन जोड्यो । श्रीलंकाका हसिथा बोयागोदाले १२ चौकाको मदतले सर्वाधिक ८३ रन बनाए । 

नेपालका कमल सिहले ३, पवन सर्राफले २ तथा दिपेन्द्र सिंह ऐरीले १ विकेट लिए ।  हारपछि नेपालको अघिल्लो चरणको सम्भावना कठिन बनेको छ । नेपाल रहेको समुह ए अन्र्तगत आजै भएको अर्को खेलमा डिफेन्डिङ च्याम्पियन इन्डियाले मलेसियालाई २ सय ३५ रनले हराएको छ ।

समुह चरणबाट समान एक जित निकाल्दै शिर्ष स्थानको इन्डिया र दोस्रो स्थानको श्रीलंकाले समान ३ अंक जोडेका छन । नेपालले समुह चरणको दोस्रो खेलमा भोली डिफेन्डिङ च्याम्पियन इन्डियासंग प्रतिस्पर्धा गर्नेछ । 

‘रुसका राष्ट्रपति पुटिन लगातार चौथो वर्ष विश्वकै शक्तिशाली व्यक्ति

३० मंसिर , २०७३  ।   रुसका राष्ट्रपति भ्लादिमिर पुटिन लगातार चौथो वर्ष विश्वको शक्तिशाली व्यक्तिको सूचीमा शीर्ष स्थानमा पर्नुभएको छ ।

अमेरिकी म्यागजिन फोर्बस्ले सार्वजनिक गरेको सन् २०१६ का शक्तिशाली व्यक्तिको सूचीमा अमेरिकी नवनिर्वाचित राष्ट्रपति डोनाल्ड ट्रम्पलाई पछि पार्दै रुसी राष्ट्रपति पुटिन शक्तिशाली ब्यक्तिको सूचीमा शीर्ष स्थान रहनु भएको हो । 

भारतीय प्रधानमन्त्री नरेन्द्र मोदीलाई फोब्र्सले नवौं स्थानमा राखेको छ । सो सूचीमा विश्वका शक्तिशाली ७४ व्यक्ति अटाएका छन् । सार्वजनिक सूचीअनुसार तेस्रो स्थानमा जर्मन चान्सलर एन्गेला मर्केल, चौथो स्थानमा चीनका राष्ट्रपति सि जिनपिङ, पाँचौं स्थानमा पोप फ्रान्सिस, अमेरिकाकी जानेट यलिन छैटौं, विल गेट्स सातौं, लरी पेज आठौं तथा फेसबुकका संस्थापक मार्क जुकरबर्ग दशौं स्थानमा  परेका छन् ।