७ असार/ विश्व खाद्य कार्यक्रमले गोरखाको लाप्राकका भूकम्प पीडितलाई बाँडेको कुहिएको चामलका कारण त्यहाँ महामारी फैलने सम्भावना बढेको छ । चामलको अवस्थाबारे बुझ्न‘कुहिएको चामल एउटा पालभित्र राखिएको रहेछ’ सभासद गुरुङले भनिन् ‘पाल खोलेर भित्र पस्नासाथ ज्यादै अमिलो दुर्गन्ध फैलियो ।’ खाद्य प्रविधि तथा गुण नियन्त्रण र वाणिज्य विभागका प्रतिनिधिहरु सहित त्यहाँ पुगेको विशेष समितिले चामलको नमुना समेत ल्याएको छ । नमुनाको वैज्ञानिक परीक्षणपछि प्रतिवेदन तयार गरिने सभासद गुरुङले बताइ । लाप्राकमा कुहिएको चामल बाँडिएको समाचार सार्वजनिक भएपछि राष्ट्रिय विपद व्यवस्थापन अनुगमन तथा निर्देशन विशेष समिति अन्तर्गत सभासद भानुभक्त ढकाल नेतृत्वको टोली लाप्राक पुगेको हो । ढकाल र गुरुङ सहित संसदीय टोलीमा सभासद दलबहादुर श्रीपाली पनि रहेका छन् । आज गोरखाको मझुवा देउरालीस्थित विश्व खाद्य कार्यक्रमले चामल भण्डारण गरेको ठाउँको अध्ययन गरी सदरमुकाममा सर्वपक्षीय छलफल गरिने कार्यक्रम रहेको छ ।
त्यहाँ पुगेको राष्ट्रिय विपद व्यवस्थापन अनुगमन तथा निर्देशन विशेष समितिले एक दुई दिनभित्र कुहिएको चामलका कारण त्यहाँ महामारी फैलन सक्ने आशंका गरेको हो । त्रिपालभित्र भण्डारण गरेर राखिएको चामलमा झिंगा भन्किरहेको र निकै परसम्म दुर्गन्ध फैलिएको सभासद उषा गुरुङले जानकारी दिइन् । भूकम्प पीडितलाई बाँड्नका लागि त्यहाँ र्पुयाइएको ४ सय ५७ बोरा चामलमध्ये १ सय २० बोरा चामल पूर्ण रुपमा कुहिएको पाइएको छ । राम्रो चामल भने सर्वदलीय सहमतिमा स्थानीय बासिन्दालाई वितरण गरिएको छ ।
