एसीसी अण्डर १९ क्रिकेटमा नेपाल श्रीलंकासंग १ रनले पराजित

३० मंसिर , २०७३ ।    एसीसी अण्डर १९ एसिया कप क्रिकेटमा नेपाल श्रीलंकासंग १ रनले पराजित भएको छ । जितको नजिक पुगेको नेपाल अन्तिम समयमा सम्हालिन नसक्दा पहिलो खेलमै पराजित भएको हो ।

२ सय २८ रनको लक्ष्य पछ्याएको नेपाल ३ बल बाँकी छँदै २ सय २६ रनमा अलआउट हुन पुग्यो । दिपेन्द्र सिंह ऐरीले ९० रन बनाएपछि जितको नजिक पुगेको नेपालले ३० रन जोड्न पछिल्ला ५ विकेट गुमायो । ३२ रनमा ३ विकेट गुमाएर दबाबमा आएको नेपालको इनिङ्स दिपेन्द्रले सम्हाले । ९९ बल खेल्दै उनले ९ चौका र १ छक्का प्रहार गरे । 

नेपालका अविनाश कर्णले ४०, अदिल खानले ३९ र प्रकाश केसीले १४ रन बनाए ।  ओपनरद्धय सन्दिप सुनार २ तथा आशिफ शेख १ रनमा पवोलियन फर्किएको खेलमा भिम सार्की ८, कमल सिंह ९, सन्दिप लामिछाने १ र पवन सर्राफ शुन्य रनमा आउट भए । श्रीलंकाका कामिन्डु मन्डिसले सर्वाधिक ३ विकेट लिए । आईसीसीको प्रतिबन्धपछि घरेलु क्रिकेट शुन्य रहेको अवस्थामा देशका विभिन्न सहरबाट प्रतिभावान खेलाडी छान्दै नेपालले राष्ट्रिय टोली गठन बनाएको थियो ।

मात्र १५ दिनको बन्द प्रशिक्षणबाट नेपाली टोली प्रतियोगिता खेल्न श्रीलंका गएको थियो ।  यसअघि कोलम्बोमा नेपालले टस जितेर फिल्डिङ रोजेपछि ब्याटिङमा उत्रिएको घरेलु टोली श्रीलंकाले निर्धारित ५० ओभरमा ८ विकेट गुमाएर २ सय २७ रन जोड्यो । श्रीलंकाका हसिथा बोयागोदाले १२ चौकाको मदतले सर्वाधिक ८३ रन बनाए । 

नेपालका कमल सिहले ३, पवन सर्राफले २ तथा दिपेन्द्र सिंह ऐरीले १ विकेट लिए ।  हारपछि नेपालको अघिल्लो चरणको सम्भावना कठिन बनेको छ । नेपाल रहेको समुह ए अन्र्तगत आजै भएको अर्को खेलमा डिफेन्डिङ च्याम्पियन इन्डियाले मलेसियालाई २ सय ३५ रनले हराएको छ ।

समुह चरणबाट समान एक जित निकाल्दै शिर्ष स्थानको इन्डिया र दोस्रो स्थानको श्रीलंकाले समान ३ अंक जोडेका छन । नेपालले समुह चरणको दोस्रो खेलमा भोली डिफेन्डिङ च्याम्पियन इन्डियासंग प्रतिस्पर्धा गर्नेछ । 

‘रुसका राष्ट्रपति पुटिन लगातार चौथो वर्ष विश्वकै शक्तिशाली व्यक्ति

३० मंसिर , २०७३  ।   रुसका राष्ट्रपति भ्लादिमिर पुटिन लगातार चौथो वर्ष विश्वको शक्तिशाली व्यक्तिको सूचीमा शीर्ष स्थानमा पर्नुभएको छ ।

अमेरिकी म्यागजिन फोर्बस्ले सार्वजनिक गरेको सन् २०१६ का शक्तिशाली व्यक्तिको सूचीमा अमेरिकी नवनिर्वाचित राष्ट्रपति डोनाल्ड ट्रम्पलाई पछि पार्दै रुसी राष्ट्रपति पुटिन शक्तिशाली ब्यक्तिको सूचीमा शीर्ष स्थान रहनु भएको हो । 

भारतीय प्रधानमन्त्री नरेन्द्र मोदीलाई फोब्र्सले नवौं स्थानमा राखेको छ । सो सूचीमा विश्वका शक्तिशाली ७४ व्यक्ति अटाएका छन् । सार्वजनिक सूचीअनुसार तेस्रो स्थानमा जर्मन चान्सलर एन्गेला मर्केल, चौथो स्थानमा चीनका राष्ट्रपति सि जिनपिङ, पाँचौं स्थानमा पोप फ्रान्सिस, अमेरिकाकी जानेट यलिन छैटौं, विल गेट्स सातौं, लरी पेज आठौं तथा फेसबुकका संस्थापक मार्क जुकरबर्ग दशौं स्थानमा  परेका छन् ।

‘नारायणगढ-मुग्लिन सडक दैनिक ४ घण्टा बन्द हुने

३० मंसिर , २०७३ ।   निर्माणधिन नारायणगढ–मुग्लिन सडकखण्ड आउँदो पुष ७ गतेबाट दैनिक ४ घण्टा बन्द हुने भएको छ ।

निर्माणमा कठिनाई भएको भन्दै निश्चित समय बन्द गर्न लागेको नारायणगढ-मुग्लिन सडक आयोजनाले जनाएको छ । अर्को सुचना जारी नभए सम्म विहान ११ देखि अपरान्ह ३ बजे सम्म सडक बन्द हुने आयोजनाले जारी गरेको सूचनामा उल्लेख छ । 

सडक बन्द हुने भएपछि आयोजनाले सवारी चालकलाई बैकल्पिक मार्ग प्रयोग गर्न आग्रह गरेको छ ।   आयोजनाका इन्जिनियर शिव खनालका अनुसार अहिले सम्म ३२ प्रतिशत मात्र निर्माणको काम भएको छ । सन् २०१७ अगस्टमा सक्नु पर्ने लक्ष्य भएपनि आधा काम पनि हुन सकेको छैन । 

‘बरु प्रस्ताव फेल होस, फिर्ता हुँदैन - देउवा

३० मंसिर , २०७३ ।  नेपाली  कंग्रेसका सभापति शेरबहादुर देउवाले संसदमा दर्ता भएको संविधान संशोधन प्रस्ताव अस्विकृत हुने अवस्था आएपनि फिर्ता नहुने दोहोर्‍याउनुभएको छ ।

प्रमुख तीन दलबीच प्रस्तावलाई निष्क्रिय बनाएर स्थानीय निकाय निर्वाचनमा जाने सैद्धान्तिक सहमति भएको समाचार बाहिर आइरहेका बेला सभापति देउवाको सो भनाई आएको हो । चितवन कांग्रेसको २ महिने जागरण अभियानको आज भरतपुरमा उदघाटन गर्दै उहांले भन्नु भयो, ‘बरु प्रस्ताव फेल होस, फिर्ता हुंदैन ।  पुर्वप्रधानमन्त्री देउवाले संसद अवरुद्ध गरेर विपक्षी एमालेले संसदीय अभ्यासलाई असहयोग गरेको आरोप लगाउनु भयो । उहांले भन्नुभयो, ‘एमालेले कति दिनसम्म संसद चल्न दिदैन हेरौं ।

संसोधन प्रस्ताव पास गर्न एमालेले सघाउनु पर्छ, असहयोग गरे उसैलाई घाटा पुग्छ ।’  संसोधन प्रस्तावमा अवरोध पुर्‍याएर एमालेले मधेशी–पहाडी झगडा गराउन खोजेको आरोप देउवाको छ । नागरिक बीच दुरी बढाउनु राष्ट्र बिरोधी कदम भएको भन्दै उहाँले आगामी स्थानीय, प्रान्त र संघीय निर्वाचनमा कांग्रेस एक नम्बरको नभई बहुमतको पार्टी हुनु पर्नेमा जोड दिनु भयो ।

पुर्वाञ्चलबाट बुद्धिचालका खेलाडी छनौट,झापा टिम च्याम्पियन

उत्तम रिजाल, 

२९ मंसिर, फिदिम / सातौ राष्ट्रिय खेलकुद प्रतियोगिताका लागि पुर्वाञ्चलबाट बुद्धिचालका खेलाडी छनोट भएका छन् ।

पाँचथरको फिदिममा सम्पन्न छनोट प्रतियोगिताबाट पुरुषतर्फ सात र महिलातर्फ पाँच गरी बाह्र खेलाडी छनोट भएका छन् । छनोट प्रतियोगितामा झापाले दब्दबा कायम गरेको छ ।

झापाका सहभागी पाँचै खेलाडी छनोट भएका छन् । झापाले सबै खेलाडी छनोट भएसँगै टिम च्पयाम्पियनको पनि उपाधी जितेको छ ।  

प्रतियोगितामा पुरुष र महिला दुबै इभेन्टमा झापाका खेलाडी प्रथम भए । पुरुषतर्फ झापाका प्रकाश नेपाल अपराजित रहदै सात राउण्डको खेलमा ६ अंकका साथ प्रथम भए ।

उनले सातौ तथा अन्तिम राउण्डमा पाँचथरका हेम बहादुर जबेगुलाई चित ख्वाएका थिए । उनीसँगै सुनसरीका प्रज्वल घिमिरे, धनकुटाका सुमन श्रेष्ठ, भोजपुरका सुमन राई, सप्तरीका सिंहेश्वर दास,झापाका राजन सुबेदी र उदयपुरका पर्शुराम राई क्रमश दोस्रो देखी सातौ हुदै धनकुटामा हुने राष्ट्रिय प्रतियोगिताको लागी छनोट भएका छन् ।  

उता महिलातर्फ झापाकी कृपा अधिकारीले प्रथम स्थान हासिल गर्दा झापाकै पुनम प्रसाई दोस्रो भइन् । त्यस्तै ताप्लेजुङ्गकी शुशिला गुरुङ्ग तेस्रो हुदा झापाकै खुस्बु थापा चौथो र मोरङ्गकी आस्मा थापा पाँचौ हुदै राष्ट्रिय प्रतियोगिताका लागी छनोट भएका छन् । प्रतियोगिता आगामी पुस आठ गतेबाट शुरुहुदैछ ।  

राष्ट्रिय प्रतियोगिताका लागि बुद्धिचालका खेलाडी छनौट शुरु

उत्तम रिजाल, 

२६ मंसिर, फिदिम/  सातौ राष्ट्रिय खेलकुद प्रतियोगिताका लागि बुद्धिचालका खेलाडी छनोट शुरु भएको छ । पाँचथरको फिदिममा शुरु भएको छनोट प्रतियोगितामा पहिलो राउण्डमा २० खेलाडी विजयी भएका छन् ।

जसमा महिला तर्पm सात खेलाडी विजयी भएका छन् । महिलातर्फ झापा र मोरङ्गका खेलाडीले सत प्रतिशत नतिजा निकालेका छन् । महिलातर्फकी टप रेटेड मोरङ्गकी खुसी मुखिया सँगै आस्मा थापा र ममता सहनीले जित हात पारे । झापाकी पुनम प्रसाई,खुस्बु थापा र कृपा अधिकारी विजयी हुदा ताप्लेजुङ्गकी शुशिला गुरुङ्गले पनि जित दर्ता गरिन् । 

उता पुरुष तर्फ भने पहिलो बोर्डमा अप्रत्यासित नतिजा निकाली उदयपुरका अन रेटेड महेशकुमार बस्नेतले शनशनी मच्चाए । उनले पुरुषतर्फका टप रेटेड  १९४७ रेटेड सप्तरीका सिंहेश्वर दासलाई चित ख्वाएका हुन् । अन्यखेलमा झापाका प्रकाश नेपाल र राजन सुवेदी, मोरङ्गका राजकुमार वान्तवा, इलामका सुरेन्द्र कुमार राई र याम प्रसाद लिम्बु,पाँचथरका रमेश केरुङ्ग र एलिन राई , धनकुटाका सुमन श्रेष्ठ,शुनसरीका राजनकुमार पोख्रेल र प्रज्वल घिमिरे र उदयपुरका पर्शुराम राई विजयी भएका छन् । आज थप दुई राउण्ड खेल हुने चिफ आरविटर विजय कुमार थापाले जानकारी दिनु भयो । छनोटमा पुर्वाञ्चलका १६ जिल्लाका ४४ खेलाडीको सहभागिता रहेको छ ।

पुरानै संरचनामा भएपनि निर्वाचन हुन्छ - दाहाल

काठमाडौं, २३ मंसिर , २०७३ ।   प्रधानमन्त्री पुष्पकमल दाहालले संबिधान संशोधन नभए पुरानै संरचनामा स्थानीय निर्वाचन हुने भन्दै त्यसको तयारीमा जुट्न कार्यकर्तालाइ निर्देशन दिनुभएको छ ।

माओवादी केन्द्रको सात नम्वर प्रदेशका अगुवा कार्यकर्ताको भेलालाई धनगढीमा आज सम्बोधन गर्दै प्रधानमन्त्री दाहालले पुरानै संरचनामा भएपनि निर्वाचन हुने बताउनुभएको हो । प्रधानमन्त्री दाहालले भन्नुभयो, ‘सवै कुरा छोडेर स्थानीय निर्वाचनको तयारीमा लाग्नुस्, सकभर नयाँ संरचना अनुसार हुन्छ त्यो सम्भव नभए पुरानै संरचना अनुसार पनि निर्वाचन हुन्छ ।’ गणतन्त्र संस्थागत गर्न र संबिधान कार्यान्वयनका लागि निर्वाचन अपरिहार्य भएको भन्दै उहाँले सरकार जुनसुकै हालतमा पनि निर्वाचन गराउन कटीवद्ध रहेको उल्लेख गर्नुभयो । प्रधानमन्त्री दाहालले संबिधान संशोधन प्रस्ताव फिर्ता नहुने समेत दोहोर्‍याउनुभएको छ । 

यसैबीच, प्रधानमन्त्रीको भ्रमण विरोध गर्ने आफ्ना कार्यकर्तामाथि दमन गरेको भन्दै एमालेले आज कैलाली बन्दको आव्हान गरेको थियो । हिजो प्रहरीले प्रधानमन्त्रीको कार्यक्रममा अवरोध गर्न खोजेको भन्दै एमालेका ३९ जना कार्यकर्तालाई नियन्त्रणमा लिएर छाडेको थियो । संविधान संशोधन प्रस्तावमार्फत पाँच नम्बर प्रदेश अलग्याउन खोजिएको भन्दै एमाले लगायतका राजनीतिक दलका स्थानीय नेताले जिल्लामा बिरोध प्रदर्शन गर्दै आएका छन् ।