बेवारिसे झोलामा १० लाख नगद र पेस्तोल

११ श्रावण ,२०७३ /  दार्चुलाको घुसा गाविस वडा नम्बर ८ धनबोरा ठाउमा मंगलबार एक थान पेस्तोल सहित वेवारिसे सामान फेला परेको छ । खण्डेश्वरीका स्थानीय कमल रोकायले वेवारिसे अवस्थामा २ झोला देखेपछि प्रहरीलाई खबर गरेको हो । 

खण्डेश्वरी प्रहरी चौकीले उक्त जानकारी पाएपछि वेवारिसे अवस्थामा झोला रहेको स्थानमा असई कैलाश दत्त भट्ट नेतृत्वमा प्रहरी टोली पुगी वेवारिसे अवस्थामा भेटिएका २ झोलामा १ थान अवैध पेस्तोल सहित ९ लाख ९९ हजार नगद रुपैया र अन्य सामान फेला परेको प्रहरीले जनाएको छ ।

प्रहरीका अनुसार पेस्तोलमा लाग्ने ५ राउन गोली, १ थान चक्कु, एक तोला यार्सागुम्बा, १ किलोग्राम सतुवा, यार्सागुम्बा जोक्ने तराजु, ४ थान ढक, सिक्का ४ थान, क्याल्कुलेटर, पेन, छाता, एक पोका औषधी र यार्सागुम्बा संकलन परिचय पत्र समेत फेला परेको छ । 

आफ्गानिस्तानमा सुरक्षा कारवाहीमा आईएस उच्च नेतासहित १२० मारिए

११ श्रावण, २०७३ /  अफ्गानिस्तानमा सुरक्षाफौजको कारावाहीमा इस्लामिक अतिवादी संगठन आईएसका उच्च नेतासहित १ सय २० लडाकुको मृत्यु भएको छ । 

अफ्गानिस्तानको नान्गार्हारमा भएको कार्बाहिका क्रममा आईएसको अफ्गानिस्तान–पाकिस्तान क्षेत्र हेर्ने प्रमुख साद ईमारतीसहित १ सय २० जना मारिएका हुन् । अफ्गानिस्तान र पाकिस्तानमा सक्रिय आईएसका संस्थापक मध्ये एक ईमारतीको अगुवाईमा सरकार तथा तालेवान बिद्रोही विरुद्ध थुप्रै आक्रमण भएको थियो । काबुलमा केहि दिन अघि आईएसले गराएको बम आक्रमणमा ८० जनाको मृत्यु भएपछि अफ्गान सुरक्षाफौजले कारवाही अभियान तीब्र बनाएको छ ।

अबिरल वर्षापछिको बाढी पहिरोले २६ जनाको मृत्यु

११ श्रावण, २०७३ /  अबिरल वर्षापछिको बाढी पहिरोले मुलुकका बिभिन्न स्थानमा जनधनको ठुलो क्षति पुगेको छ । बाढी पहिरोका कारण गएराति यता कम्तिमा २६ जनाको मृत्यु भएको छ । करिब १ दर्जन बेपत्ता भएका छन् । थुप्रै राजमार्ग अवरुद्ध भएका छन् । 

गएरातिदेखिको अवरिल वर्षाका कारण विभिन्न नदीमा आएको बाढी तथा पहिरोका कारण प्यूठानमा मात्र ९ जनाको मृत्यु भएको छ । त्यहा पहिरोले पुरिएर ४ जना बेपत्ता छन् । पुजा गाविस १ मा पहिरो गइ घर भत्कदा स्थानीय ४५ वर्षीय सुपारी मल्न र उनका १० वर्षीय छोरा मुकेशको मृत्यु भएको छ । प्रहरी चौकी पुजा लिवासेबाट गएको टोलीले पहिरोबाट उनीहरुको शव निकालेको जिल्ला प्रहरी प्रमुख डिएसपी रञ्जीतसिंह राठौरले जानकारी दिनुभयो । यस्तै, खबाङ ३ सुत्लाबाङमा पहिरोले पुरिएर घर भत्किदा दविले विक र उनकी श्रीमती दोवन्तीको मृत्यु भएको छ । 

उनीहरुको शव पहिरोबाट निकालिएपनि सँगै पहिरोमा परेका एक बालक भने बेपत्ता रहेको स्थानीयले बताएका छन् । पहिरोका कारण खबाङका १९ परिवार बिस्थापित भएका छन् । प्यूठानकै झिमरुक खोलाले बगाएर पाँच जनाको मृत्यु भएको छ । उनीहरुको सनाखत हुन सकेको छैन । यस्तै, लुङ–६ बाहानेमा घर भत्किदा पुरिएर स्थानीय शोभा रिजाल बेपत्ता भएकी छन् । बाहानेकै सिमलबुटामा बसन्ता केसीको घर भत्कदा डेरा गरि बस्ने २५ वर्षीय कालि परियार र  ११ वर्षीय  किरण थापा पुरीएर वेपत्ता भएका छन् । 

यस्तै विजुवारमा निर्माणाधिन प्यूठान नगरपालिका भवन नजिक एक शव खोलाले बगाएर ल्याएको छ । अन्दाजी ४५ वर्षीय पुरुषको परिचय खुलेको छैन । त्यस्तै प्यूठानकै बाग्दुला पुल नजिक झिमरुक खोला किनारमा २ बालबालिका तथा रम्दी खोला किनारमा २ महिलाको शव फेला परेको प्रहरीले जनाएको छ । उनीहरुको सनाखत भएको छैन ।  पाल्पाको गोठादी र दोभान गाविसमा पहिरोले पुरिएर ४ जनाको मृत्यु भएको छ । गोठादी ५ मा मध्यराती खसेको पहिरोले घर पुर्दा एकै परिवारका ताम बहादुर कनौजे, खगीसरा कनौजे र यशोदा कनौजेको मृत्यु भएको प्रहरीले जनाएको छ । 

दोभान गाविसको झुम्सामा घर पुरिदा १६ वर्षिया अस्मि विकको मृत्यु भएको छ । झुम्सामा पहिरोका कारण घरभित्रै ३ जना पुरिएको स्थानीयलाइ उद्यृत गर्दै सहकर्मी माधव अर्यालले जनाएका छन् । पाल्पाको दोभान र अर्गली गाविसको रिडीमा १ दर्जनभन्दा वढी घर पुरिएका छन । झुम्सा पानी मिल नजिकै खसेको पहिरोले सिद्दार्थ राजमार्ग समेत अवरुद्ध भएको छ ।  यस्तै, गुल्मीका दुई स्थानमा गएको पहिरोमा पुरिएर ५ जनाको मृत्यु भएको छ । ५ घर र ३ झोलुङ्गे पुल बाढीले बगाएको छ । 

जिल्ला प्रहरी कार्यालयले दिएको जानकारी अनुसार हस्तिचौर गाविस १ मल्दीमा आज विहान गएको पहिरोले भिमबहादुर दर्जीको घर बगाउँदा उनकी ६२ वर्षिया दिदी कालिका, ४९ वर्षिया श्रीमती तुलसी र १९ वर्षिया बुहारी अस्मिताको मृत्यु भएको हो । यस्तै बिशुखर्क ९ पदमपानीमा गएको पहिरोले स्थानीय गोपाल बहादुर रानाको घर बगाउँदा उनका ९ वर्षिय छोरा सुजन र ७ वर्षिया छोरी सिमानाको मृत्यु भएको छ ।  यस्तै, मकवानपुरको भिमफेदी ५ सोलाभञ्याङमा पहिरो खस्दा एकै परिबारका ३ जनाको मृत्यु भएको छ । पहिरोले २७ बर्षिय तेजबहादुर रुम्बा, उनकी पत्नी पार्बती र ६ बर्षिय छोरा बिकासको मृत्यु भएको प्रहरीले जनाएको छ ।  खोलाले बगाएर तथा पानीमा डुबेर उदयपुरमा दुई जनाको मृत्यु भएको छ । 

उदयपुरको रामपुर २ स्थित गुहे खोलाले बगाउँदा स्थानीय कालीमाया राईको मृत्यु भएको हो । यसैगरी तपेश्वरी १ का मानबहादुर प्रधानका १३ वर्षीय छोरा ऋतु प्रधानको घरनजिकै जमेको खोल्साको पानीमा डुबेर मृत्यु भएको छ । मोरङको टंकीसिनवारी ३ का १८ वर्षीय कृष्ण खड्काको पौडी खेल्ने क्रममा सिंघिया खोलामा डुबेर मृत्यु भएको छ । बाग्लुङको राजकुत ७ मा बर्षाले घर भत्किदा ८ बर्षीया बालिका दुही तामाङको मृत्यु भएको छ । उनकी आमा शुशिला गम्भिर घाईते भएको प्रहरीले जनाएको छ ।  

अर्घाखाँचीको ठाडा गाविस–५ मैदानमा पहिरोले घर पुरि‘दा १७ वर्षीय शारदा घर्तीको मृत्यु भएको छ । उनकी १६ वर्षीय बहिनी बालकुमारी घर्ती गंभिर घाइते भएकी छिन ।  लगातारको बर्षापछि खसेको पहिरोले रामेछापको भुजि गाविस–२ मा ३ घर पुरिएका छन्  । पहिरोका कारण दर्जन भन्दा बढी घर जोखिममा परेका छन् । भूकम्पले कमजोर भएका पहाडबाट खसेको पहिरोले रामेछापको दुरागाउं, भुजी , पुरानोगाँउ र कुभुुकास्थली गाविस पहिरोको उच्च जोखिममा परेको स्थानिय प्रशासनले जनाएको छ । पहिरोले बाटो समेत अवरुद्ध भएपछि घटनास्थलमा उद्धारका लागि जान समस्या परेको छ ।  

कास्कीको हेम्जामा पहिरो खसेपछि पोखरा बागलुङ सडकखण्ड गएरातिदेखि अवरुद्ध बनेको छ । यस्तै सेती नदीमा आएको बाढीका कारण पोखरा १ कसेरीका ३० र रामघटका १० परिवार विस्थापित भएका छन् । सेतीनदी किनारका सुकुम्वासी वस्तीका बासिन्दा भने राती नै सुरक्षित स्थानमा सरेको सहकर्मी लालप्रसाद शर्माले जनाएका छन् ।  यस्तै कालिगण्डकी नदीमा आएको बाढीका कारण स्याङजाको सेतीवेडीका १५ घर डुवानमा परेका छन् । बाढीका कारण १ सय ४० मेगावाटको कालिगण्डकी जलविद्युत आयोजना पनि जोखिममा परेको छ । बुटवलको तिनाउ नदीमा आएको बाढीले कम्तीमा १५ घर बगाएको छ । २ सय बढी घर डुवानमा परेका छन् । बाढीले बुटलस्थित तिनाउ नदिको झोलुंगे पुल पनि बगाएको छ । 

 पहिरोका कारण सुर्खेत नेपालगञ्जको रत्न राजमार्ग अवरुद्ध भएको छ । सडक खण्डका बिभिन्न स्थानमा पहिरो खसेपछि दाङ तुलसीपुर सडक खण्डपनि पुर्णरुपमा अबरुद्ध भएको हाम्रा सहकर्मीले जनाएका छन् । बर्दिया गुलरियास्थित रानीपुर नगरपालिकामा बाढीले १ दर्जन वढी घर डुवानमा परेका छन । दाङका बिभिन्न खोलामा बाढी आएपछि घोराही–तुलसीपुर सडक खण्ड अबरुद्ध भएको छ । 

सुनसरीका बिभिन्न गाविसका सयौ घर डुवानमा परेका छन्  यस्तै स्थानीय खोलामा पानीको बहाव बढेसंगै सडक छिरेको पानीका कारण  लमजुङ सदरमुकाम बेसीसहरदेखि तनहुँको डुम्रेसम्मको मुख्य सडक अवरुद्ध बनेको छ । सडक अवरुद्ध भएपछि आज बिहानैदेखि सवारी साधन संचालन हुन सकेका छैनन् ।

सौर्य उर्जाबाट सञ्चालित पहिलो विमान सफल अवतरण

११ श्रावण, २०७३ /  सौर्य उर्जाबाट सञ्चालित पहिलो विमानले पृथ्वीको परिक्रमा पुरा गरेको छ । गत बर्षको मार्च ९ तारिख युनाइटेड अरब इमिरेट्सको अबुधाबीबाट आफ्नो उडान थालेको विमानले पुनस् अबुधाबीमा अवरतण गरेपछि यात्रा पुरा गरेको हो । 

पृथ्वीको परिक्रमाका क्रममा विमानले ४ वटा महादेश, ३ वटा समुन्द्र र २ वटा महासागर गरी ३५ हजार किलोमिटरको दुरी पार गरेको छ । कारको जत्रो तौल भएको सो विमानमा बोइङ ठद्धठ को पंखा जडान गरिएको थियो । विमानमा १७ हजार सौर्य ब्याट्रि प्रयोग गरिएको थियो ।   

डा. केसी र सरकारबीच सम्झौता, आज अन्सन तोड्ने

१० श्रावण,२०७३,काठमाडौं / अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीलाई महाभियोगसहित चारबुँदे माग राखेर १६ दिनदेखि आमरण अनशनमा रहेका डा. गोविन्द केसी र सरकारबीच आइतबार सम्झौता भएको छ।

आइतबार राति सम्झौतापत्रमा हस्ताक्षरपछि डा. गोविन्द केसी। 

लामो समयदेखि विवादमा रहेको मनमोहन मेडिकल कलेज सरकारले किन्ने सम्झौता गरेका दुवै पक्ष अख्तियारको विषय संसद्मा प्रवेश गरिसकेको भन्दै अन्य महत्वपूर्णमा विषयमा सहमतिमा पुगेका हुन्। केसीले आइतबार बेलुकी १० बजेर २० मिनेटमा टिचिङ अस्पतालको अनशनकक्षमा सम्झौतापत्रमा हस्ताक्षर गरे। सरकारका तर्फबाट वार्ता टोली संयोजक डा. सेनेन्द्रराज उप्रेतीसहित निमित्त शिक्षा सचिव लवदेव अवस्थी र प्रधानमन्त्री कार्यालयका सचिव केदारबहादुर अधिकारीले हस्ताक्षर गरेका छन्।

सम्झौताबारे समर्थक र विद्यार्थीलार्ई व्याख्या गरेर सोमबार मध्याह्न अनशन तोड्ने केसीको तयारी छ। त्यसअघि 'सोलिडारिटी फर डा. केसी' अभियानअन्तर्गत अख्तियार कार्यालयअगाडि एक घन्टा प्रदर्शन गर्ने कार्यक्रम छ।

 

के–के छ सम्झौतामा

 

– प्रस्तावित मनमोहन मेडिकल कलेजको सम्पत्ति वीर अस्पतालका लागि किन्ने

 

– एक प्रदेशमा एक मेडिकल कलेज खोल्ने

 

– महाभियोग विषय संसद्मा प्रवेश गरिसकेकाले सरकारले केही गर्नुनपर्ने

 

– आगामी दस वर्षसम्म उपत्यकामा नयाँ सम्बन्धन नदिने र मनशायपत्र नवीकरण नगर्ने

 

– चिकित्सा शिक्षा विधेयकमा छुटेका विषय थप्ने

 

– शुल्क  र अधिकतम सिट संख्यासम्बन्धी पुरानो सम्झौता कार्यान्वयन गर्ने

 

– यस वर्षदेखि नै केन्द्रीय प्रवेश परीक्षा गर्ने जिम्मा चिकित्सा शिक्षा आयोगलाई दिने

सम्झौताअघि दुवैतर्फका वार्ताटोली र मध्यस्थकर्ताबीच विभिन्न चरणमा छलफल भएको थियो। दुवै पक्षबीच सहमति जुटेपछि सरकारी वार्ता टोलीप्रमुख उप्रेतीले सम्झौताको प्रति वाचन गर्दै केसीलाई अनशन तोड्न आग्रह गरेका थिए। चिकित्सकले केसीलाई स्वास्थ्य निकै नाजुक भइसकेकाले राति नै जुस खाएर आइसियु सर्न आग्रह गरे पनि उनले समर्थक र विद्यार्थीसँग सल्लाह लिएर उनीहरूकै उपस्थितिमा सोमबार बिहान अनशन तोड्ने इच्छा दर्साए।

सम्झौतापछि केसीले सरकारसँग केही बुँदामा सम्झौता भएको र महत्वपूर्ण मागमा लडाइँ जारी रहेको बताए। 'अहिले भोकै बसेर लड्ने लडाइँको सम्झौता भयो, खाएर गरिने लडाइँ जारी छ,' उनले नागरिकसँग भने, 'अब नयाँ चरणमा प्रवेश गर्छ।' केसीले  चिकित्सा क्षेत्र सुधारमा मधेस, हिमाल, पहाड डुलेर युवालाई जागरूक गराउने र नेपालमा सुशासन र बलियो लोकतन्त्र स्थापित गरिछाड्ने अठोट दर्साए।

लामो प्रयासपछि चिकित्सा शिक्षा सुधारमा अर्को चरणको उपलब्धि हुने गरी नयाँ सम्झौता भएको डा.केसीका तर्फबाट वार्ता टोली संयोजक डा. रञ्जन सापकोटाले बताए।

सम्झौताको तेस्रो बुँदामा सरकारले नेपाल स्वास्थ्यसेवा सहकारी संस्था लिमिटेडद्वारा प्रस्तावित स्वास्थ्य विज्ञान प्रतिष्ठानअन्तर्गत स्वयम्भूस्थित अस्पताल भवन र दहचोकस्थित बेसिक साइन्स भवन मनमोहन अधिकारीका नाममा सञ्चालन हुने गरी विज्ञ टोलीको मूल्यांकनका आधारमा कानुनसम्मत तरिकाले चिकित्सा विज्ञान राष्ट्रिय प्रतिष्ठानका लागि खरिद गर्ने उल्लेख  छ।

संसदीय कार्यक्षेत्रभित्र पर्ने अख्तियारसम्बन्धी मागको विषय संसद प्रवेश गरिसकेकाले सरकारले केही गर्न नपर्ने सम्झौतामा उल्लेख छ।

त्यसै गरी प्रस्तावित चिकित्सा शिक्षा विधेयकमा विभिन्न सुधारसम्बन्धी बुँदा थप्ने सहमति भएको छ। यसअनुसार सरकारी मेडिकल कलेजमा चिकित्साशास्त्र विषय अध्ययनका लािग कम्तीमा पचास प्रतिशत सिट संख्या निःशुल्क गर्ने र त्यसलाई बढाउँदै ७५ प्रतिशतसम्म पुर्‍याउने सम्झौता छ।

सबै प्रदेशमा कम्तीमा एउटा सरकारी मेडिकल कलेज पुर्‍याउने विषय विधेयकमा समावेश गरिने भएको छ। विगत सम्झौताको भवनाअनुसार काठमाडौं उपत्यकाभित्र दस वर्षसम्म मेडिकल, डेन्टल र नर्सिङमा नयाँ सम्बन्धन नदिने, जारी भइसकेका मनशायपत्र नवीकरण नगर्ने सहमति जुटेको छ। नवीकरणका हकमा सरकार र डा. केसीबीच २०७२ साल भदौ १९ मा भएको सम्झौतालाई आधार बनाइएको छ।

त्यसैगरी सम्झौतामा चिकित्सा शिक्षामा शुल्क र सिट निर्धारणको आधार चिकित्सा शिक्षा आयोगको क्षेत्राधिकारभित्र राखेर आयोगले निर्धारण गरेबमोजिम हुने उल्लेख छ। यस्तो निर्धारण गर्दा यसअघि भएका सम्झौतासमेत नियमावलीमा समेट्ने सहमति छ। यसअघि एमबिबिएस शुल्क प्रत्येक दुई वर्षमा पुनरवलोकन हुने गरी ३५ लाख र सिट संख्या अधिकतम १ सयमा झार्ने सहमति थियो।

त्यसै गरी आगामी शैक्षिक सत्रदेखि नै केन्द्रीय प्रवेश परीक्षा लिने व्यवस्था गर्नसमेत सरकार सहमत भएको छ। यसअनुसार सबै विश्वविद्यालय र स्वास्थ्यविज्ञान प्रतिष्ठानमा रहेको कानुनी व्यवस्था सम्बोधन गरी केन्द्रीय प्रवेशपरीक्षा लिने व्यवस्थासम्बन्धी विषय प्रस्तावित चिकित्सा शिक्षा विधेयकमा समावेश गरेर पारित गरिनेछ। प्रस्तावित विधेयकमा परीक्षा सञ्चालन निर्देशनालयको नियमावली तर्जुमा गर्दा हालका परीक्षा लिने सबै विश्वविद्यालय र स्वास्थ्य विज्ञान प्रतिष्ठानका विज्ञतालाई उपयोग गर्ने निर्णयसमेत भएको छ।

नयाँ मागसँगै यसअघि भएका सम्झौता कार्यान्वयन गर्ने प्रतिबद्धता सरकारी टोलीले देखाएको छ जसअनुसार चिकित्सा शास्त्र अध्ययन संस्थानमा रिक्त डिन तत्काल नियुक्तिका लागि त्रिवि उपकुलपतिलाई निर्देशन दिइने भएको छ।

यसअघि प्रतिबद्धता जनाइए पनि कार्यान्वयन हुन नसकेको मेरिटका आधारमा भर्ना र तोकिएको मापदण्डअनुसारको शुल्क लिने व्यवस्था गर्न विगतमा भएको परिपत्रको स्मरण गराउँदै शिक्षा मन्त्रालय र स्वास्थ्य मन्त्रालयले सम्बद्ध विश्वविद्यालय र स्वास्थ्य विज्ञान प्रतिष्ठानलाई निर्देशन दिने सम्झौता भएको छ। यसको प्रगति समयसमयमा सम्बन्धित मन्त्रालयलाई उपलब्ध गराउने पत्रमा उल्लेख छ।

त्यसै गरी सरकारी शिक्षण संस्थाहरूमा निःशुल्क स्नातकोत्तर गर्ने चिकित्सकका लागि अध्ययनपछि अनिवार्य करार अवधिसमेत दुई वर्ष मात्रै हुने गरी प्रस्तावित विधेयकमा राख्न दुवै पक्ष सहमत छन्।

केसीले उठाएका अनियमितता र भ्रष्टाचारमा मुछिएका आइओएम र त्रिविका पूर्व पदाधिकारीमाथि कारबाहीका लागि शिक्षा मन्त्रालयबाट सम्बन्धित निकायमा लेखिपठाइसकिएको सम्झौतापत्रमा जनाइएको छ।

केसीले १५ दिनअघि चारबुँदे माग राखेर अनशन थाले पनि सरकारले १२औं दिन मात्रै वार्ता टोली बनाएको थियो। सुरुमा सरकारी टोली मनमोहन विधेयक फिर्ता र अख्तियारप्रमुखलाई महाभियोगको मागमा केही गर्न नसकिने अडानमा थियो। केसीले आफूले पटकपटकका अनशनमा उपत्यकाभित्र थप मेडिकल कलेज वा प्रतिष्ठान खोल्न नदिने गरी सम्झौता नै गरिसकेको भन्दै कुनै हालतमा नछाड्ने अडान लिएका थिए।

सरकारका तर्फबाट वार्तामा सहभागी सचिवहरूसमेत मनमोहन विधेयकको विषय संसद्मा विचाराधीन रहेको भन्दै छलफलबाटै पन्छिएका थिए। यसमा दुवै पक्ष टसमस नभएपछि केसी र एमालेनिकट केही चिकित्सकको पहलमा मध्यमार्गी प्रस्तावका रूपमा मनमोहनको नाम नहराउने र लगानीकर्ताको लगानीसमेत फिर्ता हुने गरी पुनः छलफल भएको थियो। त्यसमा पनि सरकारी वार्ता टोली सदस्य सचिव अधिकारी पूरै नकारात्मक रूपमा प्रस्तुत भएका थिए।

तीन दिनदेखि विभिन्न चरणमा भएका वार्तापछि मनमोहन प्रतिष्ठानसम्बन्धी विधेयकमा अड्किएपछि पूर्व मुख्य सचिव लीलामणि पौडेलको पहलमा राजनीतिक र प्रशासनिक नेतृत्वसँग सभावित विकल्पबारे छलफल भएको थियो। त्यस क्रममा अर्थमन्त्री विष्णु पौडेलले सरकारले पैसा दिने प्रतिबद्धता गर्दै सरकारी वार्ताटोलीलाई सहमतिको बाटो खोज्न निर्देशन दिएपछि न्याम्सले किन्ने गरी प्रस्ताव अघि बढेको थियो।

स्वास्थ्य मन्त्रालयमा सम्झौताको मस्यौदा बनेपछि त्रिवि पूर्वउपकुलपति केदारभक्त माथेमा, वरिष्ठ चिकित्सक रमेशकान्त अधिकारी, पूर्व मुख्य सचिव लीलामणि पौडेल, चिकित्सक संघ अध्यक्ष डा.अञ्जनीकुमार झालगायतले केसीलाई मनाउने प्रयास गरेका थिए। सुरुमा केसीले मस्यौदामा परिमार्जन खोजेपछि सरकारी टोलीले सम्बन्धन र मनशायपत्र नवीकरणबाट पछि हट्ने संकेत गरेको थियो। तर, केसीका तर्फबाट वार्तामा बसेका चिकित्सक र विज्ञले कार्यान्वयनको सम्भावनाबारे बुझाएपछि सहमति भएको थियो।

सरकारसँग भएका सम्झौता कार्यान्वयनका लागि प्रमुख प्रतिपक्ष दल नेपाली कांग्र्रेस र माओवादी केन्द्रका नेताहरूलाई समेत सहमत गराइएको छ। उनीहरूले सम्झौता कार्यान्वयनमा कसर नराख्ने अनौपचारिक प्रतिबद्धता जनाएपछि केसी आश्वस्त भएका हुन्।

चिकित्सा शिक्षा ऐनको मस्यौदामा माथेमा प्रतिवेदनको भावनाअनुसार छुटेका विषय थप्नुपर्ने, अख्तियार प्रमुखलाई महाभियोग लगाउनुपर्र्ने, संसद्मा विचाराधीन विधेयक फिर्ता लिनुपर्नेलगायत माग राखेर केसीले असार २६ गतेदेखि अनशन थालेका थिए।

अख्तियार प्रमुखको विषय जोडिएलगत्तै केसीलाई सुरुमा अनशन बस्नै नदिन अवरोध गरिएको थियोे। अनशनपछि पनि उपचारबाटै वञ्चित गर्न सरकारी संयन्त्र प्रयोग गरिएको थियो। मानवअधिकारकर्मी र केही सभासद्ले सुरु गरेको समर्थन आमनागरिक तहमा पुगेपछि सरकारले उपचार प्रबन्ध गरेको थियो। त्यसलगतै सभासद् गगन थापालगायतले संसद्मा सार्वजनिक महत्वको प्रस्तावसमेत दर्ता गराएपछि सरकारलाई दबाब बढ्दै गएको थियो।

प्रधानमन्त्रीको राजीनामा स्वीकृत, सरकार कामचलाउ

काठमाडौं— प्रधानमन्त्री केपी शर्मा ओलीले  राष्ट्रपति विद्यादेवी भण्डारी समक्ष दिएको राजीनामा स्वीकृत भएको छ। संविधानको धारा २९८ उपधारा ८ को खण्ड क बमोजिम ओलीले दिएको लिखित राजीनामा राष्ट्रपतिले स्वीकृत गरेकी हुन्।

 

संविधानको धारा १९८ को उपधारा १० बमोजिम अर्को मन्त्रिपरिषद गठन नहुञ्जेलसम्मका यही मन्त्रिपरिषदले कार्य सञ्चालन गर्ने राष्ट्रपति कार्यालयले जनाएको छ।

संविधानको धारा १९८ को उपधारा १० बमोजिम अर्को मन्त्रिपरिषद गठन नहुञ्जेलसम्मका यही मन्त्रिपरिषदले कार्य सञ्चालन गर्ने राष्ट्रपति कार्यालयले जनाएको छ।

मन्त्रिपरिषदले आफ्नो कार्यकालमा सम्पादन गरेका कार्यहरुका लागि प्रधानमन्त्री तथा मन्त्रीहरुलाई राष्ट्रपतिले धन्यावद दिएको राष्ट्रपति कार्यालयका सहायक प्रवक्ताले जारी गरेको विज्ञप्तिमा उल्लेख छ।

दाहालले ओलीलाई भने, ‘राजनेताको परिचय दिनुभयो’

९ श्रावण, २०७३ /   माओवादी केन्द्रका अध्यक्ष पुष्पकमल दाहालले आइतबारदेखि नै कामचलाउ भएका प्रधानमन्त्री केपी शर्मा ओलीले राजनेताको परिचय दिएको प्रतिक्रिया दिएका छन् ।

संसद बैठकमा सम्बोधनसँगै राजीनामा दिएका ओलीलाई संसद भवनस्थित प्रधानमन्त्रीको च्याम्बरमा पुगेर आगामी दिनमा पनि सहकार्य हुने अपेक्षा गरेको बताए । ‘तपाईंले असल राजनेताको परिचय दिनुभएको छ,’ दाहालको भनाइ उद्धृत गर्दै प्रधानमन्त्रीका सञ्चार विज्ञ चेतन अधिकारीले भने, ‘आगामी दिनमा पनि सहकार्य हुने नै छ ।’

जवाफमा प्रधानमन्त्रीले ‘तपाईंलाई पनि आगामी कार्यकालको शुभकामना’ भनेका छन् । दुई नेताले त्यसपछि फोटो खिचाएका थिए । दाहालसँगै प्रधानमन्त्रीको च्याम्बरमा राजीनामा दिएका माओवादी मन्त्रीहरु पुगेका थिए । उनीहरुले पनि प्रधानमन्त्रीसँग तस्बिर खिचाए ।

यसैबीच राप्रपा नेपालका अध्यक्ष एवं उपप्रधानमन्त्री कमल थापाले ओलीलाई ‘असल’ प्रधानमन्त्रीकोरुपमा चित्रण गरेका छन् । ‘देशलाई माया गर्ने असल प्रधानमन्त्रीकोरुपमा केपी ओलीको सम्झना सँधै रहनेछ, तपाईंसँग काम गर्न पाएकोमा खुसी छु । कुनै पछुतो छैन ।’