७१ प्रतिशत मत खस्यो : निर्वाचन आयोग

पहिलो चरणअन्तर्गत आज सम्पन्न भएको मतदानमा ७१ प्रतिशत मत खसेको निर्वाचन आयोगले जनाएको छ । ३४ जिल्लाका २ सय ८१ मतदानस्थलबाट प्राप्त प्रारम्भिक विवरणअनुसार कम्तिमा ७१ प्रतिशत मत खसेको प्रमुख निर्वाचन आयुक्त अयोधीप्रसाद यादवले जानकारी दिनुभयो । 

मतदान सकिएपछि निर्वाचन आयोगमा आज साँझ आयोजित पत्रकार सम्मेलनमा प्रमुख निर्वाचन आयुक्त यादवले तनावका कारण ३ वटा केन्द्रमा मतदान स्थगित भएको जानकारी दिनुभयो । काभ्रेको नमोबुद्ध नगरपालिका वडा नम्बर ४, कालिकोटको कालिका गाउँपालिकाको बालाचौर आधारभूत बिद्यालयमा रहेको केन्द्र र दोलखाको मेलुङ गाउँपालिकाको सत्येशवर माविमा रहेको केन्द्रमा मतदान स्थगित भएको आयोगले जनाएको छ । 

ती केन्द्रमा आयोगले पुनस् मिति तोकी मतदान गरिने प्रमुख निर्वाचन आयुक्त यादवले जानकारी दिनुभयो । उहाँका अनुसार मतदान सकिएपछि मतपेटिका सम्बन्धित मुख्य निर्वाचन अधिकृत र निर्वाचन अधिकृतको कार्यालयमा संकलन गर्ने कार्य भइरहेको जानकारी दिनुभयो । मतपेटिका संकलन कार्य सकिएपछि मतगणना शुरु गरिने आयोगले जनाएको छ ।

वैशाख ३१, २०७४