प्रधानमन्त्री ओलीद्वारा राजीनामाको तयारी

९ श्रावण, २०७३ /  प्रधानमन्त्री केपी शर्मा ओलीले अविश्वास प्रस्तावमा मतदान अघि राजीनामा दिने तयारी गर्नुभएको छ । अविश्वास प्रस्तावमा आफु विरुद्ध उठेका प्रश्नको जवाफ दिएलगत्तै प्रधानमन्त्री ओलीले राजीनामा दिने तयारी गर्नुभएको उहाँ निकट स्रोतले जनाएको छ ।  

प्रधानमन्त्रीले राजीनामा दिए अविश्वास प्रस्ताव संसदमा निर्णयार्थ पेश हुने छैन । यसअघि व्यवस्थापिका–संसदमा दर्ता भएको अविश्वास प्रस्तावमाथि आज मतदान गर्ने कार्यसुची तय गरिएको थियो । आजै बसेको मन्त्रिपरिषद बैठकले नयाँ सरकार गठनका लागि धारा २ सय ९८ अपुरो रहेको भन्दै वाधा अडकाउ फुकाउन राष्ट्रपति समक्ष सिफारिस गर्ने निर्णय गरेको छ । निर्णय अनुसार प्रधानमन्त्री ओली सिफारिस लिएर राष्ट्रपतिलाइ भेटन शितल निवास पुग्नुभएको थियो । 

अल्पमतमा परेपछि पनि राजीनामा नदिएको भन्दै बिरोधी दलले प्रधानमन्त्रीको आलोचना गर्दै आएका छन् । संसद बैठक अविश्वास प्रस्तावमा छलफलपछि आज पौने ५ बजेसम्मका लागि स्थगित भएको थियो । अबको बैठकको शुरुमा कंग्रेस सभापति शेरवहादुर देउवाले बोल्नु हुनेछ । त्यसलगत्तै प्रधानमन्त्री ओलीले आफुमाथी परेको अविश्वास प्रस्तावमा उठेका प्रश्नको जवाफ दिनुहुनेछ ।

अन्दुवा खोलाको बाढीले विर्तामोड बजार आसपारका करिब २ सय घर डुबानमा

९ श्रावण ,२०७३ /   झापाको विर्तामोड नगरपालिकास्थित अन्दुवा खोलाको बाढीले विर्तामोड बजार आसपारका करिब २ सय घर डुबानमा परेका छन् । बाढीका कारण पूर्वपश्चिम राजमार्गमा  यातायात समेत अवरुद्ध बनेको छ । अबिरल बर्षापछि खोलाको सतह बढेर राजमार्गसम्म आई पुगेको जिल्ला प्रहरी कार्यालयले जनाएको छ ।

यस्तै, रतुवा खोलामा आएको बाढीले तटबन्धन भत्काउदा लखनपुर २ र गौरादहका केही गाउँ डुवेको छ । दक्षिण झापाको कुमरखोद ३ र ४ मा कन्काईको बाढी पसेपछि मिलन वस्ती डुबाएको छ । बाढीबाट विस्थापित आधा दर्जन स्थानीयलाई सुरक्षित स्थानमा राखिएको नेपाल रेडक्रस सोसाइटिको झापा शाखाले जनाएको छ ।  कन्काई नदीमा पानीको सतह वढेपछि सतासीधाम, सुरुङ्गा, शिवगञ्ज, सरणामति, पाँचगाछी, कुमरखोड, कोरोवाडी र महाभारा आसपासका बासिन्दालाई उच्च सतर्कता अपनाउन बाढी पूर्वानुमान शाखाले आग्रह गरेको छ ।

पूर्वका मेची, निन्दा, रतुवा र त्रियुगा  नदीमा समेत पानीको बहाव बढेकाले सर्तकता अपनाउन जल तथा मौसम विभाग अन्र्तगतको बाढी पुर्वानुमान शाखाले सर्वसाधरणमा अपिल जारी गरेको छ । नदीको तटीय क्षेत्र र आसपासका स्थानीयलाई मोबाइल एसएमएस मार्फत सुरक्षित रहन पूर्वसूचना गराइएको जलबिद् बिनोद पराजुलीले जानकारी दिनुभयो । मनुसन सक्रिय भएका कारण केही दिनसम्म बर्षा जारी रहने भएकाले सम्भावित खतराबाट सावधान रहन आवश्यक शाखाले आग्रह गरेको छ ।  

प्रधानमन्त्री विरुद्धको अविश्वासको प्रस्ताव आज निर्णयार्थ प्रस्तुत हुदै

९ श्रावण ,२०७३ /  प्रधानमन्त्री केपी शर्मा ओलीविरुद्ध व्यवस्थापिका–संसदमा दर्ता भएको अविश्वासको प्रस्ताव आजको बैठकमा निर्णयार्थ प्रस्तुत हुदैछ ।  

व्यवस्थापिका–संसदको आजकै पहिलो बैठकमा अविश्वासको प्रस्तावमाथिको छलफल सकिएपछि दोस्रो बैठकको प्रारम्भमा प्रधानमन्त्री ओलीले उनी विरुद्ध लगाइएका आक्षेपहरुको जवाफ दिने छन् । त्यसपछि अविश्वासका प्रस्तावमा मतदान हुनेछ । 

अविश्वासको प्रस्तावमाथि शुक्रबारबाट सदनमा छलफल हुँदै आएको छ । वर्तमान गठबन्धन सरकारको ठूलो दल नेकपा ९माओवादी केन्द्र०ले सरकारलाई दिएको समर्थन फिर्ता लिएसँगै ओली सरकार संकटमा परेको हो । 

प्रधानमन्त्री ओलीको दम्भ र अहंकारका कारण आफूले समर्थन फिर्ता लिएर उनीविरुद्ध अविश्वासको प्रस्ताव दर्ता गराएको माओवादी केन्द्रका अध्यक्ष पुष्पकमल दाहालले बताउँदै आएका छन् । 

व्यवस्थापिका–संसद्को प्रमुख प्रतिपक्ष दल नेपाली कांग्रेससहितका २८१ जना सांसदको हस्ताक्षर गरेर उक्त प्रस्ताव संसद्मात पेश गरिएको हो । 

माओवादीले समर्थन फिर्ता लिएसँगै मधेसी जनअधिकार फोरम लोकतान्त्रिक र राप्रपाले पनि समर्थन फिर्ता लिएर अविश्वासको पक्षमा मतदान गर्ने निर्णय गरिसकेका छन् । 

नेपालको संविधान जारी भएसँगै व्यवस्थापिका–संसद्माक प्रतितिनिधित्व गर्ने अधिक राजनीतिक दलको समर्थनमा नेतृत्व सम्हाल्न पुगेका प्रधानमन्त्री ओली सरकार नौ महिनाको अवधि पार गर्दा नगर्दै संकटमा परेको हो । प्रधानमन्त्री ओलीलाई सहमतीय राजनीतिलाई बेवास्ता गर्दै एकलौटी ढंगले अघि बढ्न खोजेको आरोप छ ।

दाहालको आरोपबारे प्रधानमन्त्रीको जवाफ, 'म राजतन्त्रविरुद्ध संघर्ष गर्दा कुन स्कुल पढ्दै हुनुहुन्थ्यो ?'

९ श्रावण, २०७३ / प्रधानमन्त्री केपी शर्मा ओलीले माओवादी अध्यक्ष पुष्पकमल दाहालले शुक्रबार संसदमा लगाएका आरोपप्रति असन्तुष्टि जनाएका छन् ।

नेपाल टेलिभिजनको सीधा कुरा प्रधानमन्त्रीसँगमा उनले दाहालले आफूविरुद्ध लाञ्छानापूर्ण अभिव्यक्ति दिएको बताए । राजतन्त्रविरुद्ध संघर्ष गर्दा उहाँ कुन स्कुल पढ्दै हुनुहुन्थ्यो, राजतन्त्रविरुद्ध संघर्ष गरेकै कारण जेल जाँदा कुन स्कुल पढ्दै हुनुहुन्थ्यो भन्दै जबाफ दिएका छन् । , उनले आफू वादविवाद गर्न नचाहेको बताउँदै भने, मैले राजासँग कार्यगत एकता गरिन, उहाँसग पनि सम्झौता अन्तर्गत चलेको हो, तर सम्झौता अरु आस्थागत विषय होइन, परिस्थितिगत विषय हो ।

अविश्वासको प्रस्ताव पेस गर्दै दाहालले शुक्रबार संसदमा प्रधानमन्त्री गणतन्त्र र संघीयताविरोधी रहेको आरोप लगाएका थिए । उनले इतिहासको यो नै अन्तिम घडी नभएको बताउँदै पछि आफैले खण्डन गर्ने दिन आउने बताए । म आधा शताब्दीभन्दा बढी संघर्ष गरेको व्यक्ति हो, २९ वर्षदेखि खुल्ला छु, मलाई लाखौंले भेटेका छन्, तथ्य र प्रमाणबाट पुष्टि गरे हुन्थ्यो, पछि काट्नुपर्दा असुविधा हुन्छ कि भन्ने हेक्का राखे राम्रो, उनले भने ।

प्रधानमन्त्रीले आफूलाई धेरै ठूलो योजना र प्रयासपछि हटाइएको दाबी गरे । सरकारले ऐतिहासिक काम गरेको छ, जति पनि काम भएको छ, त्यसलाई मन नपराउनेहरु, स्वाभिमानको लहर जो सिर्जना भयो, देश परनिर्भरताबाट आत्मनिर्भरतारित लाग्यो, त्यसलाई मन नपराउनेहरु सक्रिय भए, उनले भने ।

प्रधानमन्त्रीले आफूविरुद्ध माओवादीले धोका दिने पूर्वजानकारीमा रहेको बताए । चैतदेखि नै डिलिङ भएको थियो, सबैले सबैतिर कुरा गरिरहेका थिए, उनले भने, असार लागेपछि म्याचुअर्ड भयो ।

वैशाख २२ गते सभामुख ओनसरी घर्तीको निवासमा कांग्रेससँग माओवादीको ७ बुँदे सहमति भएको प्रधानमन्त्रीको भनाइ थियो । उनले आफूले सुरु गरेका कतिपय कामलाई नयाँ सरकारले पनि असफल पार्न नसकने बताए । जसरी जम्मा गरेर सरकार बनाएको थिएँ, मौका पाएकाबेला अप्ठ्यारो बेला, सहकार्य कसरी गरेको छु हिजो देखियो नि, उनले भने, कतिवटा मेट्न सक्दैन, हुती छैन, कतिपय मेट्नेछ ।

प्रधानमन्त्रीले मुलुकलाई अनुमान नगरिएको परिस्थितितर्फ जाने प्रयास भएको बताउँदै त्यतातर्फ जान नदिन सहजीकरण गर्ने उल्लेख गरे । उनले अहिले राष्ट्रवादी र अर्को पक्षधर समूहबीच ध्रुविकरण रहेको बताए ।प्रधानमन्त्रीले आफूलाई पदमोह नभएको बताउँदै तर संवैधानिक र कानुनी बाटो सहज बनाएरमात्रै नयाँ सरकार गठन टुंगो लाग्ने बताए ।

प्रधानमन्त्रीले संसदमा कांग्रेस सांसदले आफ्नो मानसिक अवस्थामाथि गरेको प्रश्न टिप्पणी गर्न लायक विषय नभएको बताए । कुनै जन्तुले खुट्टा टोक्छ, तर त्यसमा आक्रोसित भएर त्यसको खुट्टा टोक्न गइँदैन, त्यो दल र त्यसका सांसदले विचार गर्नुपर्ने हो, खुदै व्यक्तिले विचार गर्नुपर्ने हो, पढाइलेखाइ त छ होला, विषयगत ज्ञान त होला, तर सभ्यता सिकिंदो रहनेछ, उनको भनाइ थियो ।

कुनै आश्चर्य नभए एमाले १२ वर्षपछि सत्ताबाहिर पुग्ने

८ श्रावण,२०७३,काठमाडौं /  कुनै आश्चर्य नभए नेपाली कांग्रेस, नेकपा माओवादी केन्द्रसहित विभिन्न दलले प्रधानमन्त्री केपी शर्मा ओलीविरुद्ध शुक्रबार संसद्मा पेस गरेको अविश्वास पारित हुने देखिन्छ। एमाले संसद्मा प्रमुख प्रतिपक्षी रहनेछ।  

यससँगै ०६१ मा प्रधानमन्त्री शेरबहादुर देउवा नेतृत्व सरकारयता प्रत्येक दलीय सरकारमा सहभागी रहेको एमाले १२ वर्षपछि सत्ताबाहिर पुग्नेछ।

यसबीच डा. बाबुराम भट्टराई नेतृत्व सरकारमा भने एमाले १३ दिन मात्र रह्यो।

२०६२/६३ को जनआन्दोलनपछि बनेको गिरिजाप्रसाद कोइराला नेतृत्वमा बनेको सात राजनीतिक दलको सरकारमा एमाले वरिष्ठ नेतृ सहाना प्रधान नेतृत्वमा सरकारमा सहभागी भएको थियो भने पछि नेकपा माओवादी पनि सरकारमा आएपछि केपी शर्मा ओली नेृतत्वमा सरकारमा रह्यो।

संविधानसभाको पहिलो निर्वाचनमा एमाले नराम्रोसँग पराजित भएर तेस्रो दल बन्यो। त्यसलगत्तै बनेको एकीकृत नेकपा माओवादी अध्यक्ष पुष्पकमल दाहाल नेतृत्व सरकारमा वामदेव गौतम नेतृत्वमा सहभागी भयो।

प्रधानसेनापति रुक्मांगत कटवाल काण्डपछि माधवकुमार नेपाल नेतृत्वमा सरकार बन्यो।

२०५१ सालमा उपनिर्वाचनपछि मनमोहन अधिकारी नेतृत्वको एकमना सरकारपछि एमाले नेतृत्वमा बनेको दोस्रो सरकार यही थियो। नेपाली कांग्रेस, विभिन्न मधेसवादी दलसँगको गठबन्धन सरकार संवैधानिक जटिलताका कारण सात महिना कामचलाउ रुपमा रह्यो।

त्यसपछि नेकपा माओवादीसँग गठबन्धन गर्र्दै तत्कालीन एमाले अध्यक्ष झलनाथ खनाल नेतृत्वमा नयाँ सरकार बन्यो र ६ महिना मात्र चल्यो। त्यसपछि माओवादी नेता बाबुराम भट्टराई नेतृत्वमा बनेको सरकारमा महासचिव ईश्वर पोखरेल नेतृत्वमा १३ दिन सरकारमा सहभागी भएको थियो एमाले।

दलहरुबीच संविधान निर्माणको विषयमा भएको सहमतिबाट सरकारको नेतृत्व गर्दै तत्कालीन एकीकृत नेकपा माओवादीले दलहरुबीच भएको सहमतिबाट पछि हटेको भन्दै कांग्रेस र एमाले सरकारबाट बाहिरिएका थिए। संवैधानिक रिक्तताका कारण दलहरुबीच दोस्रो संविधानसभा निर्वाचनका लागि बनेको तत्कालीन प्रधानन्यायाधीश खिलराज रेग्मी सरकारमा अन्य दलसँगै एमालेले दुई प्रतिनिधि पठाएको थियो।

२०७० मंसिरमा भएको निर्वाचनबाट संसद्मा पहिलो दल बनेको नेपाली कांग्रेस र दोस्रो एमाले गठबन्धनको सरकार गठन भयो। त्यसमा एमालेका तर्फबाट उपाध्यक्ष वामदेव गौतमले मन्त्रिपरिषदमा नेतृत्व गरे। दलहरुले निर्धारण गरेको समयभन्दा केही ढिलो गरी संविधान जारी भयो।

लगत्तै संविधानको संक्रमणकालीन व्यवस्थाअनुसार एमाले अध्यक्ष केपी शर्मा ओली नेतृत्वमा नयाँ सरकार गठन भएको थियो। त्यही सरकार अहिले अविश्वासको प्रस्तावको सामना गरिरहेको छ।अहिलेसम्मको संसदीय गणित हेर्दा सरकार अल्पमतमा परेको छ।

प्रधानमन्त्रीको म्युजिकल चियरमा रुमल्लिएर देश बन्दैन् – नेपाल

८ श्रावण,२०७३, काठमाडौं /  नेकपा एमाले नेता तथा पूर्वप्रधामन्त्री माधव नेपालले सँधै प्रधानमन्त्रीको म्युजिकल चियरमा रुमल्लिएर देश नबन्ने बताएका छन्। 

संसदमा सरकारको अविस्वासको प्रस्तावको छलफलमा भाग लिँदै नेता नेपालले नेपाली नेता तथा दलमा समग्र राष्ट्रलाई कसरी अगाडि लाने भन्दा पनि आफ्नो दलगत तथा व्यक्तिगत स्वार्थबाट अगाडि बढ्न नसकेको बताए। उनले भने, ‘संविधानसभाका उपलब्धिलाई समाप्त पार्दै देशमा एक जटिल अवस्थामा लाने खेल भैरहेको छ। २०७४ माघ ७ सम्ममा संविधानलाई कार्यान्वयन नगर्ने षड्यन्त्र भैरहेको छ। देशलाई आर्थिक गती दिन र संविधान  कार्यान्वयनकालागि सबैमा आपसी सहमतिको खाँचो रहेको छ।’

उनले माओवादी केन्द्रले सरकारलाई दिएको समर्थन फिर्ता लिने निर्णय हतास र दुर्भाग्यपूर्ण भएको बताए। उनले अरुलाई आरोप प्रत्यारोप लगानु भन्दा पनि सबैले आफ्नो  कमी कमजोरीको आत्म समिक्षा गर्न जरुरी रहेको बताए। उनले भने, ‘अहिलेको सरकारले केही गरेन भन्नु भन्दा पनि सरकारमा रहेर पनि हामीले केही गर्न सकेनौं भनेर आत्म समिक्षा गर्नुपर्छ। बजेट ,सरकारको नीति तथा कार्यक्रम देशको हितमा भएपनि दलगत स्वार्थका कारण असफल बनाइएको छ।’

उनले अविस्वासको प्रस्ताव आश्रित विधेयक पछिपनि ल्याउन सक्ने भन्दै माओवादीले गल्ती गरेको आरोप लगाए। उनले राजनीतिक अस्थिरता भएपनि विकासका योजना तथा परराष्ट्र नीतिमा सबै दलको एक धारणा हुनुपर्ने बताए। नेपालले राम्रो कामको सकारात्मक समिक्षा गर्नु पर्ने र गलत कुरालाई आलोचना गर्न सक्नु पर्ने बताए।

जर्मनीको म्युनिखमा अन्धाधुन्ध गोली प्रहार ९ जनाको मृत्यु

८ श्रावण, २०७३ /  जर्मनीको बभेरिया राज्यस्थित म्युनिख शहरमा अन्धाधुन्ध गोली प्रहारबाट ९ जनाको मृत्यु भएको छ । २० जना घाइते भएका छन् ।

स्थानीय समय अनुसार शुक्रबार साँझ ६ बजेतिर ओलम्पिया शपिङ सेन्टरननजिकै १८ बर्षीय इरानी मूलका एक किशोरले अन्धाधुन्ध गोली प्रहार गरेको त्यहाँको प्रहरीले जनाएको छ । घटनापछि  एक हमलाकारीले आफूलाई समेत  गोली हानेको स्थानीय प्रहरीलाई उद्धृत गर्दै अन्तराष्ट्रिय सञ्चारमाध्यमले जनाएका छन् । घटनालगत्तै गम्भीर आतंककारी परिस्थिति भन्दै संकटकाल घोषणा गरिएको छ । 

सर्वसाधारणलाई घरभित्रै बस्न र सार्वजनिक स्थानमा नजान अपिल जारी गरिएको छ । सो क्षेत्रमा हाल उच्च सुरक्षा सर्तकता अपनाएको छ । घटनापछि जर्मन चान्सलर एङ्गेला मर्कलले सुरक्षा परिषद्को आपतकालिन बैठक आव्हान गर्नुभएको छ ।