नेपाली राष्ट्रिय क्रिकेट टोलीले आज ऐतिहासिक मेरी लिवोनसंग खेल्दै

४ श्रावण, २०७३ /  आगामी बल्र्ड क्रिकेट लिग च्याम्पियनसिपको तयारीका क्रममा बेलायतमा रहेको नेपाली राष्ट्रिय क्रिकेट टोलीले आज ऐतिहासिक मेरी लिवोन क्रिकेट क्लबसंग अभ्यास खेल खेल्दैछ । एक सातादेखी बेलायतमा अभ्यासरत नेपाली टोली, आज बिश्वकै पुरानो क्रिकेट क्लब एमसीसीबिरुद्ध लर्डस्मा उत्रन लागेको हो ।

खेल एमसीसीको घरेलु मैदान लर्डसमा नेपाली समयानुसार अपरान्ह सवा ३ बजे सुरु हुनेछ । नेपाली टोलीले यसअघि ४ स्थानिय क्लबसँग अभ्यास खेल खेलेको थियो । सबै अभ्यास खेलमा नेपाली टोली बिजयी बनेको छ । पछिल्लो समय बलिङ र ब्याटिङमा उल्लेख्य सुधार गरेको नेपाली टोलीले ऐतिहासिक क्लब बिरुद्ध बिश्वकै सर्वाधिक चर्चित मैदानमा प्रतिस्पर्धा गर्न लागेको हो ।  

नेपाली टोली भोली बेलायत–नेपाल दौत्य सम्बन्ध स्थापनाको दुई सय बर्ष पुगेको अबसरमा आयोजना हुने एक बिशेष कार्यक्रममा सहभागी भई पर्सी स्बदेश फर्कनेछ । नेदरल्याण्ड्सबिरुद्धको बल्र्ड क्रिकेट लिगको तयारीमा रहेको नेपाली टोली केहि दिनको घरेलु अभ्यासपछि यसै महिना नेदरल्याण्ड्स पुग्नेछ । बल्र्ड च्याम्पियन्सीप अन्तरगतको खेल भने आगामी साउन २९ र ३१ गते नेदरल्याण्ड्सको घरेलु मैदानमा हुदैछ ।  

संसदीय मान्यता अनुसार बैठक सञ्चालन गर्न सभामुखलाई ओलीको आग्रह

४ श्रावण, २०७३ /  प्रधानमन्त्री केपी शर्मा ओलीले संसदीय मान्यताअनुसार बैठक सञ्चालन गर्न सभामुख ओनसरी घर्तीलाई आग्रह गर्नुभएको छ । बजेटसँग सम्बन्धित विधेयक पारितको प्रमुख एजेण्डा भएपनि गत शुक्रवारका लागि बोलाएको संसद बैठक सूचना टासेर पर्सि बिहीवारसम्मका लागि लागि भएको थियो । 

सरकारसँग छलफल नै नगरी सभामुख घर्तीले संसद बैठक स्थगित गरेको आरोप लागेपछि प्रधानमन्त्री ओलीले संसदीय अभ्यास भन्दा बाहिर नजान सभामुख घर्तीको ध्यानाकर्षण गराउनुभएको हो । संसद सचिवालयले पर्सि बिहीवारबाट तीन दिन सरकारबिरुद्धको अविश्वासको प्रस्तावमाथि छलफल गर्ने कार्यसूचि तय गरिसकेको छ ।

प्रधानमन्त्री निवास वालुवाटारमा भएको भेटमा एमाले अध्यक्ष समेत रहेका ओलीले बजेटसँग सम्बन्धित सम्पूर्ण विधेयक पारित गर्न सभामुखलाई आग्रह गर्नुभएको प्रधानमन्त्रीका प्रेस संयोजक चेतन अधिकारीले जानकारी दिनुभयो ।  जवाफमा सभामुख घर्तीले अन्य दलका शीर्ष नेताहरुसँग छलफल गरेर आवश्यक निर्णय लिने बताउनुभएको थियो । 

कांग्रेस केन्द्रिय समिति बैठक सुरु

४ श्रावण , २०७३ /  नेपाली कांग्रेसको केन्द्रिय समिति बैठक केहीबेरअघि सुरु भएको छ । नेकपा माओवादी केन्द्रसँग मिलेर सरकार बिरुद्ध व्यवस्थापिका संसदमा अविश्वास प्रस्ताव दर्ता गराएको कांग्रेसले समसामायिक बिषयमा छलफल गर्न केन्द्रीय कार्यसमिति बैठक बोलाएको हो । 

ललितपुरको सानेपास्थित पार्टी मूख्यालयमा सुरु बैठकमा अहिले सभापति शेरबहादुर देउवाले समसामयीक बिषयमा आफ्नो धारणा राखिरहनु भएको छ ।  बैठकले पर्सि बिहीवारबाट सुरु हुने अविश्वास प्रस्तावमाथिको छलफलमा पार्टीगत धारणा तय गर्नेछ । प्रधानमन्त्री केपि ओली बिरुद्ध संसदमा दर्ता गरिएको अविश्वासको प्रस्ताव पारित गराउने बिषयमा बैठक केन्द्रित हुने केन्द्रीय सदस्य बिमलेन्द्र निधीले जानकारी दिनुभयो ।

सरकार परिवर्तनमा पार्टी भित्र देखिएको विवाद अन्त्यका लागि समेत बैठकमा छलफल हुनेछ ।    यस्तै बैठकमा भावी सरकारमा सहभागीता सम्बन्धमा पनि छलफल हुने छ । नेता निधीले प्रधानमन्त्रीको निर्वाचन तथा अब अवलम्वन गर्ने रणनिति लगायत अन्य समसामायिक राजनीतिक बिषयबारे समेत बैठकमा छलफल हुने उहाँले बताउनुभयो ।  अर्का केन्द्रीय सदस्य गगन थापाले भने बैठकमा १० दिनदेखि आमरण अनशनमा बसेका प्रा।डा। गोबिन्द केसीको माग सम्बोधनका लागि गंभिर बन्न आवाज उठाउने जानकारी दिनुभयो । 

गोविन्द केसीले उठाएका माग तत्काल पूरा गर्न संसदको सामाजिक न्याय तथा मानवअधिकार समितिको सरकारलाई निर्देशन

३ श्रावण ,२०७३ काठमाडौं / ९ दिनदेखि अनसनरत डा.गोविन्द केसीले उठाएका माग तत्काल पूरा गर्न संसदको सामाजिक न्याय तथा मानवअधिकार समितिले सरकारलाई निर्देशन दिएको छ।

समितिको टोली त्रिवि शिक्षण अस्पतालमा अनसनरत केसीको अवस्था बुझ्न आज बिहान त्रिवि शिक्षण अस्पताल पुगेको थियो। डा.केसीसँग पहिला अनसन बस्दा तीन पटक भएका सम्झौता तत्काल कार्यान्वयन गर्न र अहिले उठाएका मागलाई तत्काल सम्बोधन गर्न समितिले निर्देशन दिएको हो।

 उहाँले उठाएका माग जायज छन्। ती मागहरुमा सरकारले विगतमा पनि सम्झौता गरेको छ। त्यसैले यो हामी सबै नेपाली जनताको विषय हो। यसलाई हामी सेलाएर जान दिँदैनौं

समिति सभापति सुशील श्रेष्ठ सहित ७ सांसदको टोलीले केसीका माग र स्वास्थ्य अवस्थाबारे जानकारी लिएको थियो। तत्काल सरकारले पहल नगरे सम्बन्धित व्यक्तिहरुलाई समितिमा बोलाएर छलफल गर्ने तथा संसदमा पनि यो विषयामा कुरा उठाउने उनले बताए।

‘उहाँले उठाएका माग जायज छन्। ती मागहरुमा सरकारले विगतमा पनि सम्झौता गरेको छ। त्यसैले यो हामी सबै नेपाली जनताको विषय हो। सभापति श्रेष्ठले भने यसलाई हामी सेलाएर जान दिँदैनौं ’,। डा.केसीले समग्र राष्ट्रका लागि माग उठाइरहेकाले ती कुरा सम्बोधन गराएर अनसन तोडाउन आफूले पहल गर्ने उनले बताए।

अनसनको ९ औं दिन अनसनस्थल त्रिवि शिक्षण अस्पताल पुगेका सांसदहरुलाई उपस्थित चिकित्साशास्त्र अध्ययन संस्थानका विद्याथीले नारा लगाएर व्यंग्य कसेका थिए। ‘सांसदको चिल्लो कार, कति गर्छौ भ्रष्ट्राचार तथा ‘सांसदज्यू ढिलो भएन’ भन्ने नारा सुनेका सांसदहरुले डा।केसीको पक्षमा उभिने प्रतिबद्धता जनाएर फर्किए।

पृथ्वी राजमार्गको मौवा खोलामा पहिरो, सवारी साधनमा क्षति

३ साउन २०७३,चितवन / पृथ्वी राजमार्गको मौवा खोलामा आज बिहान छ बजे पहिरो खस्दा पाँचवटा गाडीमा क्षति पुगेको छ। एकजना चालक घाइते भएका छन्। चितवन र धादिङको सीमाना मौवा खोलामा गएको पहिरोले लगभग ९० मिटर लामो टहराहरुमा पनि क्षति पुर्याएको इलाका प्रहरी कार्यालय मुग्लिनले जानकारी दिएको छ । घटनास्थल मुग्लिन बजारदेखि १७ किलो मिटर पूर्व धादिङतर्फ दोरेचोक–९ मा पर्छ ।

पहिरोमा परेर ना ५ ख ४११३ नम्बरको ट्रक क्षतिग्रस्त भएको छ। सो ट्रकका चालक नवलपरासी मध्यविन्दु नगरपालिका–४ घर भएका २४ वर्षीय मोहन चौधरी घाइते भएको मुग्लिन प्रहरीले जानकारी दिएको छ। त्यस्तै लु १ ख ८६१४ नम्बरको ट्रक र ना ४ ख ९०९१ नम्बरको तरकारी बोक्ने मिनी ट्रकपनि पहिरोमा आएको ढुंगाले लागेर क्षतिग्रस्त भएका छन्।

पहिरोले ना ५ ख ४८४५ नम्बरको यात्रु बसमा पनि सामान्य क्षति पुगेको इलाका प्रहरी कार्यालय मुग्लिनले जानकारी दिएको छ । प्रहरीका अनुसार ट्रकहरु सोही ठाउँ रोकेर बसी रहेका थिए भने बस गुड्दै गरेको अवस्थामा पहिरोमा परेको थियो। पहिरोले गाडीहरुमा क्षति पुगे पनि यातायात आवागमनमा भने समस्या नपुर्याएको इलाका प्रहरी कार्यालय मुग्लिनको भनाइ छ ।

ताप्लेजुङको तापेथोक र लेलेपमा भीषण पहिरो , २१ जना अलपत्र

२ श्रावण , २०७३ /  लगातारको बर्षापछि ताप्लेजुङको तापेथोक र लेलेप गाविसमा भीषण पहिरो खस्दा २१ जना अलपत्र परेका छन् । तापेथोक गाबिसको चारैतिर पहिरो खसेपछि बीचमा रहेको बस्तीका ६ परिवारका २१ जना फसेका हुन् । 

उनीहरुको उद्धारका लागि लेलेप र तापाथोक चौकीबाट गएको प्रहरी टोली अझै सो स्थानमा पुग्न सकेको छैन । सञ्चारसम्पर्क समेत हुन नसकेको प्रहरी नायव उपरिक्षक रामवहादुर केसीले बताउनुभयो । ती गाविसमा पुग्ने अधिकांश बाटो पहिरोले बगाएकाले समस्या भएको छ । 

उद्धारका लागी छिमेकी लेलेप गाविसवाट बिभिन्न बाटो हुँदै दर्जन बढी युवा त्यसतर्फ लागेका छन् । चारैतिरै पहिरो गएको तथा बीचमा पर्ने घुन्सा नदीको पुल समेत भत्काएकाले सो क्षेत्रमा जान नसकिएको लेलेपका व्यापारी ग्यावु शेर्पाले बताउनुभयो ।

माओवादी हेडक्वार्टर बैठक बस्दै, प्रधानमन्त्री कानूनविद्सँग परामर्शमा

२ श्रावण , २०७३ /  पछिल्लो राजनीतिक अवस्थाको समिक्षा गर्न नेकपा माओवादी केन्द्रको हेडक्वार्टर बैठक आज बस्दैछ । अपरान्ह ३ बजे लाजिम्पाटस्थित अध्यक्ष पुष्पकमल दाहालको निवासमा बस्ने बैठकमा नयाँ सरकार गठनमा देखिएका अड्चनबारे छलफल हुने बताइएको छ । 

मुलुकको समसामियीक अवस्थाको समिक्षाका साथै केही सांगठनिक बिषयमा समेत छलफल गर्न बैठक बोलाइएको माओबादी केन्द्रका प्रवक्ता पम्फा भुषालले जानकारी दिनुभयो । पछिल्लो पटक कंग्रेससँग गठबन्धन बनाएको माओबादी केन्द्रले प्रधानमन्त्री ओलीलाइ तत्काल राजिनामा दिन आग्रह गरिरहेको छ । प्रधानमन्त्री पनि परामर्शमा नयाँ सरकार गठनका लागि संवैधानिक व्यवस्था पालना गर्दै मार्गप्रशस्त गर्न कंग्रेस र माओवादी केन्द्रले आग्रह गरेपछि प्रधानमन्त्री केपी ओलीले आज कानुनविज्ञहरुसँग छलफल गर्दै हुनुहुन्छ ।

नयाँ सरकार गठनका लागि संवैधानिक बाटो नभएको बताउनुभएका ओलीले कसरी अघि बढ्ने भन्ने विषयमा आज अपरान्ह कानुनविद्सँग परामर्श गर्न लागेको उहाँको सचिवालयले जनाएको छ  । कंग्रेस र माओवादी केन्द्रले हिजो कानुनविदहरुसँग परामर्श गरी नया सरकार गठनका लागि संवैधानिक जटिलता नरहेको निष्कर्ष निकालेका थिए । उनीहरुले  अनावश्यक भ्रम सिर्जना नगर्न प्रधानमन्त्रीलाई आग्रह गरेका थिए ।