१० कार्तिक, २०७३ । संयुक्त लोकतान्त्रिक मधेसी मोर्चाले अख्तियार प्रमुख लोकमानसिंह कार्कीविरुद्धको महाअभियोगवारे भोली आधिकारिक धारणा तय गर्ने भएको छ ।
मोर्चाका नेताहरु राजधानी बाहिर भएका कारण मोर्चाले कार्कीविरुद्ध संसदमा दर्ता भएको महाअभियोगको प्रस्तावका बिषयमा अहिलेसम्म औपचारिक धारणा सार्वजनिक गरेको छैन । मोर्चाका सबै नेताहरु आज साँझसम्म राजधानी आइपुग्ने र भोली बैठक बसेर पछिल्लो राजनीतिक घटनाक्रमका बिषयमा साझा धारणा तय गरिने मोर्चामा आबद्ध मधेसी जनअधिकार फोरम गणतान्त्रिकका अध्यक्ष राजकिशोर यादवले जानकारी दिनुभयो । उहाँले कार्कीबिरुद्धको महाअभियोग भन्दा पनि त्यसका कारण मधेसको मुद्धा सम्वोधनमा भइरहेको ढिलाईवारे मोर्चाले धारणा बनाउने बताउनुभयो ।
निलम्बित अख्तियार प्रमुख कार्कीको महाअभियोगको बिषयले मोर्चाको मागलाई बिषयान्तार गरेको भन्दै अध्यक्ष यादवले माग सम्वोधनका लागी छठपछि आन्दोलन गर्ने बिषयमा समेत भोलीको बैठकमा छलफल हुने बताउनुभयो । मोर्चाका केही नेताहरुले आफ्ना माग सम्वोधनमा सरकारले उदासिनता देखाएको भन्दै बर्तमान गठबन्धन सरकारलाई दवाव दिन समर्थन फिर्ता लिनेसम्मको निर्णय गर्नुपर्नेमा जोड दिन थालेका छन् ।
