सञ्चारमन्त्री बस्नेत आफैंले काटे अव्यवस्थित तार

काठमाडौं।  सडकका खम्बामा अव्यवस्थितरूपमा टाँगिएका केबल र टेलिफोनका तारलाई व्यवस्थित गर्न नेपाल दूरसञ्चार प्राधिकरणले तार काट्न शुरु गरेको छ ।

सञ्चारमन्त्री मोहनबहादुर बस्नेतले माइतीघरस्थित खम्बामा टाँगिएका अव्यवस्थित तार काटेर त्यसको शुरुवात गरे । बस्नेतले भने, ‘एशियन डेभलभमेन्ट बैंकको सहयोगमा ऊर्जा मन्त्रालयले जमिनमुनि तार विछ्याउने प्रयास अगाडि बढाइरहेको छ र सडक फराकिलो बनाउनेबारे पनि छलफल भइरहेको छ ।’

यसअघि सञ्चार मन्त्रालयले सम्बन्धित निकायलाई बोलाएर तार पहिचान गर्न र व्यवस्थित गर्न भने पनि व्यवस्थित भएको थिएन । वैधानिकताको दायराभित्र नआएसम्म तार काट्ने अभियानलाई देशैभरि सञ्चालन गर्ने मन्त्री बस्नेतको भनाइ छ ।

नेपाल दूरसञ्चार प्राधिकरणका अध्यक्ष दिगम्बर झाले तार एकै ठाउँमा गन्जागोल हुँदा धेरै ठाउँमा असुरक्षा हुने, बाटोमा मोटरसाइकल तथा गाडी हिँड्दा बेरिएर दुर्घटना हुने भएकाले पनि केबल र टेलिफोनका तार हटाउनुपरेको बताए ।

तार काटेर एकै ठाउँमा व्यवस्थित गर्ने र भविष्यमा त्यसलाई जमिनमुनिबाट व्यवस्थित गर्ने प्राधिकरणको योजना रहेको छ ।     

                                                                                      रासस

२०७४ भदौ १८

चीनको ३६ अर्ब लगानीमा नेपालमा सिमेन्ट उद्योग खुल्दै

काठमाडौं।   नेपालको सिमेन्ट उत्पादनमा चीनको एक निजी कम्पनीले ३६ अर्ब रुपैयाँ लगानी गर्ने भएको छ । चीनको होक्सी नामक कम्पनीले नेपालको शिवम् सिमेन्टसँगको संयुक्त लगानीमा नवलपरासिमा सिमेन्ट उद्योग खोल्न लागेको हो ।

 

९ सय मेगावट क्षेमताका अरुण तेस्रो र माथिल्लो कर्णालीमा आएको वैदेशिक लगानीपछिको तेस्रो ठूलो लगानीको प्रतिवद्धता आएको लगानीवोर्डले जनाएको छ । लगानीसम्वन्धी सम्झौता पीआईएमा बोर्डका कार्यकारी प्रमुख सिईओ महाप्रसाद अधिकारी र चिनियाँ कम्पनी होक्सीका निर्देशक लाई वेङले आज हस्ताक्षर गर्ने कार्यक्रम छ । 

 

नवलपरासीमा उत्पादन गर्ने भनिएको सिमेन्टका लागि आवश्यक ढुङ्गा भने पाल्पाको ज्यामिरेबाट निकालिने सम्झौतामा उल्लेख गरिएको छ । सन २०१८ को पहिलो ३ महिना देखि नै सिमेन्ट उत्पादन शूरु गर्ने भनिएको सो उद्योगबाट दैनिक ६ हजार मेट्रिक टन सिमेन्ट उत्पादन गर्ने लक्ष्य राखिएको छ । 

 

उद्योगबाट १ हजार भन्दा वढी नेपालीले प्रत्यक्ष रोजगारी पाउनेछन् । विदेशी लगानी भित्र्याउने नाममा वढी सहुलियत दिएको भन्दै सिमेन्ट उत्पादन गर्दै आएका नेपाली उद्योगीले भने लगानीवोर्डको आलोचना गरेका छन् ।

२०७४ भदौ १८

प्रतिबन्धित भारु ६८ लाख सहित २ जना पक्राउ

काठमाडौं।  महानगरीय प्रहरी अपराध महाशाखा टेकुले एक हजार र पाँच सय दरका प्रतिबन्धित भारतीय रुपैयाँ सहित दुई जनालाई पक्राउ गरेको छ । 

 

काठमाडौं महानगरपालिका १५ अन्नपूर्ण चोक क्षेत्रमा अवैध भारु बोकेर हिँडिरहेका बाँकेका कृष्णकुमारी शर्मा र गोरखाका अर्जुन भण्डारीलाई हिजो पक्राउ गरिएको हो । महानगरीय प्रहरी अपराध महाशाखा टेकुले आज पत्रकार सम्मेलन गर्दै उनीहरुलाई सार्वजनिक गरेको हो ।

 

उनीहरुको साथबाट अवैध भारु ६८ लाख २० हजार रुपैयाँ बरामद गरेको महाशाखाले जनाएको छ । सर्वसाधारणलाई ठगी गर्ने उद्देश्यले हिडिरहेको सूचनाका आधारमा उनीहरुलाई पक्राउ गरिएको प्रहरीले जनाएको छ ।

२०७४ भदौ १८

बकर ईद हर्षोल्लासपूर्वक मनाइँदै, आज सार्वजनिक बिदा

काठमाडौं।   मुस्लिम धर्मावलम्बीले महान् पर्व बकर ईद आज हर्षोल्लासपूर्वक मनाउँदैछन् । इदुल फित्र अर्थात् रमजान पर्वको ७० औँ दिनमा बकर इद मनाउने धार्मिक विश्वास छ । 

 

मुस्लिम धर्मावलम्वीले बिहानै स्नान गरी नजिकैको मस्जिद वा इदगाहमा गई सामूहिक नमाज पढ्ने र एक आपसमा अंकमाल गर्दै शुभकामना आदान प्रदान गर्ने चलन छ । पर्वको अवसरमा दरबारमार्गस्थित नेपाली जामे मस्जिद, काश्मिरी मस्जिद लगायत देशभरका मस्जिद र इदगाहमा मुस्लिम धर्मावलम्बीको भीड लागेको छ । बकर ईदका अवसरमा सरकारले आज सार्वजनिक बिदा समेत दिएको छ । 

 

यसैबीच बकर इदको अवसरमा राष्ट्रपति विद्यादेवी भण्डारीले शुभकामना दिंदै आफ्नो सभ्यता, सम्पन्नता र विविधतालाई जोगाउन आ–आफ्नो स्थानबाट सङ्कल्प, सद्भाव र सत्कर्मलाई नछोडी धार्मिक सहिष्णुता एवम् सद्भावलाई अक्षुण्ण राखी राष्ट्रिय एकता कायम गनुपर्नेमा जोड दिनुभएको छ ।

 

यस्तै उपराष्ट्रपति नन्दबहादुर पुनले शुभकामना दिंदै पर्वको माध्यमबाट विभिन्न समुदायबीच आपसी सद्भाव, सहिष्णुता र भाइचाराको अभिवृद्धि गरी सबै नेपालीको प्रमुख कार्यभार संविधान कार्यान्वयन, आर्थिक, सामाजिक रुपान्तरण सहितको समृद्ध राष्ट्र निर्माण र बलियो राष्ट्रिय एकताका लागि सहमति, सहयोग र सहकार्यको बाटोमा अगाडि बढ्न आह्वान गर्नुभयो । 

 

प्रधानमन्त्री शेरबहादुर देउवाले शुभकामना दिंदै सबै जातजाती मिलेर एकताको सन्देश प्रवाह गरी राष्ट्र विकासमा सहकार्य गर्न आह्वाहान गर्नुभएको छ । 

 

भाद्र १८, २०७४

मंसिरपछि हाम्रो देशमा ८८४ सांसद

काठमाडौं। पहिलो र दोस्रो संविधानसभामा ६०१ सांसद थिए । सानो देशमा धेरै सांसद भएको भनेर आलोचना पनि भएको थियो । तर, अव देशमा यो भन्दा पनि बढी सख्याँमा संसद हुँदैछन् ।

क्षेत्र निर्धारण आयोगले दिएको प्रतिवेदन अनुसार मंसिर १० र २१ मा प्रदेश र संघीय संसदका लागि चुनाव हुँदैछ । चुनावपपछि देशमा झन्डै नौ सय सांसद हुनेछन् । देश संघीय संरचनामा प्रवेश गरेपछि पहिलो पटक संसद र प्रदेशको चुनावका लागि मिति घोषणा भएको छ ।

अहिलेकै कार्यतालिका अनुसार प्रदेश, प्रतिनिधिसभा र राष्ट्रिय सभाको निर्वाचन सम्पन्न भए मंसिर तेस्रो सातापछि मुलुकमा ८८४ जना सांसद हुने भएका छन् । प्रतिनिधिसभा, प्रदेशसभा र राष्ट्रियसभा सदस्यको समेत निर्वाचन भइसकेपछिको संख्या जोड्दा देशमा सांसदहरुको संख्या ८८४ पुग्ने छ ।

नयाँ संविधान अनुसार निर्वाचन क्षेत्र निर्धारण आयोगले निर्धारण गरेको निर्वाचन क्षेत्रका आधारमा सरकारले घोषणा गरेको मंसिर १० र २१ मा प्रदेशसभा र प्रतिनिधिसभाको निर्वाचन हुँदैछ । यो निर्वाचन भएपछि प्रदेशसभामा प्रत्यक्षतर्फ जम्मा ३३० र त्यसको ४० प्रतिशतका आधारमा समानुपातिक २२० सांसद हुनेछन् । र सात प्रदेशमा कुल सांसद  ५५० रहनेछन् ।

त्यस्तै केन्द्रीय प्रतिनिधिसभातर्फ प्रत्यक्षतर्फबाट १६५ र समानुपातिकतर्फ ११० सांसद आउनेछन् । यसरी प्रतिनीधिसभा २७५ सदस्यीय हुनेछन् ।

यसबाहेक राष्ट्रिय सभामा ५९ जना सांसद चुनिने व्यवस्था छ । राष्ट्रिय सभाको निर्वाचनमा उम्मेदवार जोसुकै भएपनि मत भने स्थानीय निकायमा निर्वाचित जनप्रतिनिधिलेमात्र हाल्न पाउनेछन ।

राष्ट्रियसभाको निर्वाचन भने प्रदेशसभा र प्रतिनिधिसभाको निर्वाचनपछि मात्र हुनेछ । यो निर्वाचन पनि २०७४ माघ ७ भित्रै हुनेछ ।

२०७४ भदौ, १६

दमकको ओम सत्य साई ट्रेडसमा भिषण आगलागी, २ करोड भन्दा बढीको लत्ता कपडा जले

झापाको दमक ६ स्थित वेलडाँगी रोडको ओम सत्य साईराम ट्रेडसमा भिषण आगलागी हुँदा २ करोड भन्दा बढीको लत्ता कपडा जलेर नष्ट भएको जनाइएको छ । रेनुका पराजुली प्रबन्ध निर्देशक रहेको यस ट्रेडर्समा २ करोड भन्दा बढीका सामान जलेको संचालक गणेश पराजुलीले बताउनु भयो ।

विद्युत सर्टभई आगो लागेको हुन सक्ने जनाइएको छ । ढेड घण्टाको प्रयासमा आगोलाई स्थानीयवासी, प्रहरी र दमक नगरपालिकाको दुईवटा दमकलले नियन्त्रणमा लिएको छ । प्रहरीले भने यसको विवरण संकलन गर्ने कार्य जारीरहेको जनाएको छ । 

२०७४ भदौ, १६

मुस्ताङमा मतगणना तीब्र, केही वडामा एमाले बिजयी

मुस्ताङमा स्थानीय तह निर्वाचनको मतगणना आज बिहानैदेखि भइरहेको छ । ५ वटै गाउँपालिकामा धमाधम गणना कार्य चलिरहेको प्रमुख निर्बाचन अधिकृत बलराम त्रिपाठीले जानकारी दिनुभयो । 

पछिल्लो मत परिणाम अनुसार, काग्रेसबाट बागी उम्मेदवार बनेकाहरु आधिकारिक कांग्रेस उम्मेदवारलाइ उछिनेका छन् । कांग्रेसलाइ आफ्नै बागी उम्मेदवारका कारण मत परिणाममा असर पर्ने धेरैको अनुमान छ ।  स्वतन्त्र भनिएका उम्मेदवार कांग्रेसका बागी हुन् ।

कांग्रेसको मत बिभाजनका कारण यहांका केहि गाउँपालिका वडामा एमाले बिजयी भएको छ । बाह्गाउँ मुक्तिक्षेत्रको ५ नं वडाका अध्यक्ष सहित ४ जना सदस्य एमाले बिजयी भएको निर्बाचन अधिकृत बन्धु बांस्तोलाले बताउनुभयो । 

२ बजेसम्मको मतपरिणाम अनुसार, ५ गाउँपालिका मध्ये तिनवटामा एमालेका अध्यक्षले अग्रता लिएका छन् । थासाङ गाउँपालिकामा एमाले, घरपझोङमा एमाले, बाह्गाउँ मुक्तिक्षेत्रमा एमाले, दालोमे गाउँपालिकामा स्वतन्त्र र लोमान्थाङ गाउँपालिकामा एमाले अगाडी देखिएको छ । 

जेष्ठ १, २०७४