सनसाइन कपको उपाधी भण्डारीलाई

२९ जेठ,दमक /  मोरङ्गको उर्लाबारी – ६ मंगलबारेमा सम्पन्न दोस्रो सनसाइन कप अन्तर विद्यालय बुद्धिचालको उपाधी आयोजक सनसाइन बोर्डिङ्ग स्कुलका सक्षम भण्डारीले जितेका छन् ।

शनिबार सातौ तथा अन्तिम राउण्डमा झापा दमकको एभरेष्ट बोर्डिङ्गकी कृपा अधिकारीलाई चित ख्वाएसँगै उनले उपाधी हात पारेका हुन् । भण्डारीलाई कडा चुनौति दिएपनि क्विन पिनमा परेको नदेख्दा उनी पराजित भएकी थिइन् । पहिलो बोर्डमा ह्वाइटबाट खेलेका भण्डारीले अपराजित रहदै प्रतियोगितामा ६.५ अंक जोडे । पराजित अधिकारीको भने ५ अंक थियो । त्यस्तै प्रतियोगिताको दोस्रो भएकी आयोजककै खुसी मुखियाले दोस्रो बोर्डमा खेलेका आयोजककै आदेश दाहाललाई चित ख्वाएकी थिइन् । दाहालले बराबरी गर्न गरेको अफर अस्वीकार गरेकी उनले अन्ततः दाहाललाई घुँडा टेकाउँदै दोस्रो स्थान हासिल गरेकी हुन् । पराजित भएपनि दाहाल तेस्रो भए । मुखियाको ६ र दाहालको ५.५ अंक थियो ।

प्रतियोगितामा आयोजक सनसाइनका सैलेस दुलाल चौथो,झापा मोडल दमकका संदेश खड्का पाँचौ र समान ५.५ अंक नै भएपनि प्रोग्रेसिव प्वाइनटका आधारमा आयोजकका श्रृजन खड्का छैटौ भए । समान पाँच अंक जोडेका सुनगाभा उर्लाबारी मोरङ्गका दिपेन्द्र खनाल ,आयोजकका आषिस पाण्डे,एभरेष्ट दमकका प्रशान्त शाहा र आयोजकका सौरभ दुलाल क्रमशः सातौ देखि दशौं भए ।

गल्सतर्फको उपाधी भने झापा दमकको एभरेष्ट बोर्डिङ्गकी कृपा अधिकारीले जितिन् । उनले प्रतियोगितामा पाँच खेल जितेकी थिइन् । गल्सतर्फ आयोजककी आष्मा थापा हुँदा एभरेष्टकै खुस्बु थापा तेस्रो भइन् । खुस्बुले झापा मोडल दमकका प्रज्वल खतिवडासँग सातौ राउण्डमा बराबरी खेलेकी थिइन् । झापा मोडलकी स्मिता सुब्बा चौथो,झापा मोडलकै रिया कार्की पाँचौ,एभरेष्टकी अस्मिता दाहाल छैटौ र झापा मोडलकी निष्मा संकर सातौ भइन् । 

प्रतियोगिताका विजेताहरुलाई प्रमुख अतिथी समाजसेवी प्रेम प्रकाश कोइराला,समापन कार्यक्रमका सभापति तथा विद्यालयका निर्देशक सुरेन्द्र सुबेदी, झापा जिल्ला बुद्धिचाल संघका अध्यक्ष विजय सुब्बा,सुनगाभा उमाविका विजय श्रेष्ठ,हिमचुलीका भवानी आचार्य,झापा मोडलका जय बहादुर श्रेष्ठ,राष्ट्रिय फुट्बल खेलाडी संजिब बुढाथोकी लगायतले नगद तथा ट्रफी प्रदान गरिएको थियो ।

कार्यक्रममा चिफ आरविटर तथा नेपाल च्याम्पियन भुपेन्द्र निरौला (निरज) र आरविटर तथा संचारकर्मी उत्तम रिजाल र मोरङ्गकी पहिलो महिला रेटेड खुसी मुखियालाई सम्मान पनि गरिएको थियो । कार्यक्रममा झापा र मोरङ्गका ८ विद्यालयका ६२ विद्यार्थीको सहभागिता रहेको थियो ।

पूर्वराजाले देशभर धार्मिक यात्रा थाल्ने

                                           काठमाडौं । पूर्वराजा ज्ञानेन्द्र शाहले हिन्दु

राष्ट्र नेपाल बनाउन करिव २५ जिल्लामा धार्मिक यात्रा गर्ने भएका छन् । दुई सातादेखि आफ्नै लगानीमा रहेको झापास्थित हिमालयन टी स्टेटमा रहेका पूर्वराजाले हिन्दुराष्ट्रका लागि धार्मिक यात्रा सुरु गर्ने योजना बनाएका छन् ।

हिमाल, पहाड र तराईका २५ जिल्लामा उनले धार्मिक यात्रा गर्ने तयारी गरेका छन् । जनकपुरको रामजानकी मन्दिरदेखि प्यूठानको स्वर्गद्धारीसम्म उनले धार्मिक यात्रा गर्ने स्रोतले बताएको छ । त्यही सिलसिलमा उनी मुगुको रारा पनि पुग्ने योजना  छ ।

पूर्वराजाको धार्मिक यात्राका लागि दजनौ मन्दिरहरुमा बिशेष कार्यक्रम र पुजा गरिने भएको छ । धार्मिक कार्यक्रममा पूर्वयुवराज्ञी हिमानी शाहलाई पनि पूर्वराजाले सँगै लिने योजना बनाएका छन् । पूर्वराजपरिवका सदस्य मध्ये अलि बढि चर्चा र साहनुभूतिमा हिमानी पर्दछिन् । हिमानीको सहानुभूतिलाई नागरिक समक्ष राख्ने योजना पूर्वराजाले बनाएका छन् ।

त्यसैगरी पूर्वराजाको धार्मिक यात्रामा धार्मिक संगठनहरुको पनि सहभागिता हुने भएको छ । उनले २५ जिल्लाका २५ मन्दिरहरुमा पुजाआजा गर्ने भएका छन् । पुजाआजाका बेला सर्वसाधरणसँग भेट गर्ने कार्यक्रम रहेको उनी निकट स्रोतले बताएको छ ।

आफ्नो धार्मिक भ्रमणका बारेमा छलफल गर्न पूर्वराजाले अतिनिकट तीन ब्यक्तिलाई शुक्रबार झापा बोलाएका थिए । भरतकेशर सिंह, प्रभाकर सम्शेर र प्रभु समशेरलाई झापा बोलाएर पूर्वराजाले भ्रमण योजना तय गरेका हुन् । असारको खेति सकिएलगतै उनले धार्मिक यात्रा थाल्ने भएका छन् ।

प्रथम मिस दमकको उपाधि ढकाललाई

१५ जेठ,दमक/  झापाको दमकमा सम्पन्न प्रथम मिस दमक २०१६ को उपाधि रुजु ढकालले हात पारेकी छन् । शुक्रबार रेडक्रस भवन दमकमा भएको ग्राण्ड फिनालेमा अन्य १६ प्रतिस्पर्धीलाई पछि पार्दै उनी प्रथम मिस दमक बन्न सफल भएकी हुन् । एड लिङ्ग एडभरटाईजिङ एजेन्सीको आयोजना तथा कौचा कन्ट्रक्सन कम्पनी प्राइभेट लिमिटेडको मुख्य प्रायोजनमा भएको सो प्रतियोगितामा सेकेण्ड रनरअपको उपाधि सोयाश्री बज्रचार्यले हात पार्दा फस्ट रनरअप भने मेरिना विश्वकर्मा भइन् ।  

सत्र प्रतिस्पर्धीको पहिलो प्रस्तुतिबाट टप टेन छनोटमा दश निर्णायक रहेको सो फिनालेका निर्णायकले उनीहरुको परिचय तथा प्रस्तुतिबाट अन्तिम दश छनोट गरेका थिए । अन्तिम दशमा प्रबेश पाएकाहरुलाई दश निर्णायकले प्रतिस्पर्धी आँफैले तानेको टोकनमा जुन निर्णायकको नाम परेको थियो सोहि निर्णायकले प्रश्न सोधेका थिए । सोहि प्रश्नको जबाफका आधारमा दश निर्णायकले टप टेनबाट टप फाइभ छनोट गरेका थिए । टप टेनमा सोधिएको प्रश्नको केहि प्रतिस्पर्धीले जबाफ दिन नसक्दा सम्भावना भएरपनि बाहिरीनु परेको थियो ।

त्यसपछि अन्तिम पाँचमा पुगेका उनीहरुलाई तपाइ मिस दमक हुनुभयो भने दमकलाई ग्रिन सिटी बनाउन तपाइको कस्तो भुमिका हुनेछ भन्ने एउटा साझा प्रश्न सोधिएको थियो । त्यस प्रश्नको जबाफ उनीहरुलाई तीन मिनेट भित्र लेख्न भनिएको थियो । सोहि समय भित्र उनीहरुले खेलेको आ–आफ्नो जबाफ करिब पाँच सय बढी दर्शकका माझ आँफै पढेर सुनाएका थिए । सोहि जबाफका आधारमा प्रतियोगिताको विजेता छनोट गरिएको थियो । जसमा ढकालले बाजी मारिन ।

त्यस्तै प्रतियोगितामा अन्य दश विधाका उत्कृष्ट पनि छनोट गरिएको थियो । जसमा मिस ट्यालेन्ट र बेष्ट आइजको उपाधि सोयाश्री बज्रचार्यले हात पारिन भने बेष्ट स्किनको उपाधी श्रृजना अधिकारीले, बेष्ट स्माइलको उपाधि गरिमा प्रधानले, बेष्ट हेयरको उपाधि आशिका राईले, बेष्ट क्याटवाकको उपाधि सिम्रन गजमेरले, बेष्ट पर्सनालिटीको उपाधि मौसम सुब्बाले, बेष्ट फ्रेण्डसीपको उपाधि काजोल क्षेत्रीले, बेष्ट फोटोजेनिकको उपाधि करुणा तामाङ्गले र पब्लिक च्याइसको उपाधि रक्षा सुब्बाले हात पारेका थिए । 

प्रतियोगिता सशस्त्र प्रहरीबल पाथिभरा गणका गणपति भरतबाबु कार्कीको प्रमुख आतिथ्यमा सम्पन्न भएको थियो ।

विमानस्थलमा भेटियो माइक्रोवेभ भित्र साढे ३ किलो सुन

१२ जेठ /  त्रिभुवन अन्तर्राष्ट्रिय विमानस्थल भन्सारले मंगलवार राति साढे ३ किलो अवैध सुनसहित भारतीय मुलका सिंगापुरीयन नागरिक मारुगाइयन सेल्भमलाई पक्राउ गरेको छ ।

मालिन्दो एयरको ओडी ८०४ फ्लाइटबाट राति ८:३० मा आएका सेल्भमको साथमा रहेका एम्प्लिफायर र माइक्रोवेभमा ३७ पिस सुन लुकाएको अवस्थामा बरामद भएको हो ।

विमानस्थल भन्सारका प्रमुख भन्सार अधिकृत तुलसी चौलागाईंले भने 'भन्सारका साथीहरुले शंका लागि मार्क गरेपछि हामीले बाहिर निस्केपछि खोलेर जाँच गर्दा सोनीको म्याक्स एम्प्लिफायर र माइक्रोवेभ भित्र सुन भेटाएका हौं,' ।

अधिकृत चौलागाईंका अनुसार ई५५५८४२एच नम्बरको सिंगापुरको रहादानीवहाक सेल्भमलाई अहिले भन्सारको हिरासतमा राखिएको छ ।

'विदेशबाट आउने नेपालीलाई ५० ग्राम काँचाे सुन ल्याउन पनि छु्ट हुन्छ,' उनले भने, 'तर विदेशीलाई भने सो परिमाणकाे गरगहना मात्र ल्याउन छुट छ । बढी परिमाणको सुन, त्यो पनि लुकाइ छिपाइ ल्याउनु गैर कानुनी हो ।'

काठमाण्डौंको दब्दबा सकियो,झापाका भुपेन्द्र नेपाल च्याम्पियन

१० जेठ,इलाम /  बुद्धिचालमा काठमाण्डौंको एकल दब्दबा सकिएको छ । इलाममा जारी १९ औं राष्ट्रिय प्रतियोगिताको सोमबार आठौ राउण्डको खेल सकिएसँगै झापा दमकका भुपेन्द्र निरौला (निरज) एक खेल अगावै नेपाल च्याम्पियन भएपछि काठमाण्डौंको एकल दब्दबा समाप्त भएको हो । अहिले सम्म राजधानी बाहिरका कोहिपनि नेपाल च्याम्पियन बनेका थिएनन् । उनको ७ अंक रहेको छ । उनलाई पच्छ्याइ रहेका ओलम्पियाड ललितपुरे सजिन महर्जन पुर्व नेपाल च्याम्पियन क्यान्डिडेट माष्टर केशब श्रेष्ठसँग चित खाएपछि भुपेन्द्र एक खेल अगावै नेपाल च्याम्पियन बन्न सफल भएका हुन् । यससँगै आगामी ओलम्पियाडका लागि छनोट हुनेपनि उनी पहिलो खेलाडी भएका छन् । पहिलो बोर्डमा खेलेका भुपेन्द्रले भने आठौं राउण्डमा क्षितिज भण्डारीसँग अंक बाडेका थिए । यद्यपी उनले खेलमा एक अंकको स्पष्ट अग्रता लिएका थिए । भण्डारीको ५.५ अंक रहेको छ ।

दोस्रो बोर्डमा पराजय भोगेका महर्जनको पनि पराजयको बाबजुद ५.५ अंक नै रहेको छ । महर्जनले श्रेष्ठलाई पराजित गरेको भए खेलको निणर्य नौं औं तथा अन्तिम राउण्डबाट मात्र आउने थियो । झापा दमककै प्रकाश नेपाल फिडे माष्टर मनिष हमाललाई बराबरीमा रोक्न सफल भए । उनले तेस्रो बोर्डमा खेलेका थिए । बराबरीपछि प्रकाश र मनिषको समान ५ अंक भएको छ । त्यस्तै चौथो बोर्डमा खेलेका फिडे माष्टर विलमलाल श्रेष्ठ र पुरुषोत्तम चौलागाईले पनि बराबरी खेलेका छन् । क्यान्डिडेट माष्टर रिजेन्द्र राजभण्डारी भने हिमाल लामासँग पराजित भए । जित हासिल गरेका लामाको ५.५ अंक भएको छ । यो सँगै अजरबैजानमा हुने आगामी ओलम्पियाडमा सहभागि हुने बाँकी चार खेलाडीको टुङगो अन्तिम राउण्डबाट मात्र लाग्ने भएको छ । अन्तिम राउण्डका टप ५ बोर्डमा रहने खेलाडी गर या मरको अवस्था रहने छन् ।

 उता चौथो महिला राष्ट्रिय प्रतियोगितामा पुर्व च्याम्पियन विना जैसवाल पराजित हुदै ओलम्पियाडका लागि छनोट हुने सम्भाबनाबाट टाढा भएकी छन् । उनको चार अंक मात्र रहेको छ । शिर्ष स्थानमा  रहेकी सिन्दीरा जोशीको ६.५,दोस्रो स्थानमा रहेकी मोनालिसा खम्बुको ६,तेस्रो स्थानमा रहेकी शान्ता थापाको ६,चौथा स्थानमा रहेकी सुजना लोहनीको ५.५ पाँचौ स्थानमा रहेकी संगिता जैसवालको र छैटौ स्थानमा रहेकी विसेखा जैसवालको समान ४.५ अंक रहेको छ । त्यस्तै सुरुचि थिङको ४ अंक रहेको छ । अन्तिम राउण्ड मंलबार विहान ७ बजेबाट शुरुहुनेछ ।

हिमाल लामालाई पराजित गरेसँगै झापाका भुपेन्द्र निरौला उपाधि नजिक

१० जेठ,इलाम/  ईलाममा जारी १९ औं राष्ट्रिय बुद्धिचाल प्रतियोगितामा झापा दमकका भुपेन्द्र निरौला (निरज) उपाधि नजिक पुगेका छन् । आज चौथो दिनको पहिलो राउण्डको खेलमा हिमाल लामालाई पराजित गरेपछि उनि उपाधी नजिक पुगेका हुन् । लामाले ३१ औं चालमा गरेको ड्र अफरलाई ठाडै अस्विकार गरेका उनले ८५ औं चालमा लामालाई हार स्विकार्न बाध्य बनाएका थिए । जितसँगै भुपेन्द्रको ६.५ अंक भएको छ । पराजित हिमलको भने ४.५ अंक रहेको छ ।

 त्यस्तै दोस्रो बोर्डमा खेलेका ओलम्पियाड सजिन महर्जनले पुरुषोत्तम चौलागाईलाई पराजित गरेका छन् । महर्जनको ५.५ अंक पुगेको छ । त्यस्तै पुर्व नेपाल च्याम्पियन नविन तण्डुकारलाई क्षितिज भण्डारीले पाखा लगाए । जितसँगै उनको ५ अंक भएको छ । तेस्रो बोर्डमा खेलेका फिडे माष्टर मनिष हमाल र क्यान्डिडेट माष्टर केशब श्रेष्ठले बराबरी खेल्दा झापा दमककै प्रकाश नेपालले रबिन्द्र शाक्यलाई चित ख्वाए ।

प्रतियोगितामा यि तीनै जनाको समान ४.५ अंक रहेको छ । अन्य खेलमा फिडे माष्टर बिलमलाल श्रेष्ठ,विजय डंगोल,क्यान्डिडेट माष्टर प्रचण्डमान मालाकार र बाबुराजा महर्जनले आ–आफ्नो खेलमा जित निकाल्दै थप एक÷एक अंक बटुलेका छन् । उता चौथो महिला राष्ट्रिय प्रतियोगितामा सातौ राउण्डको बराबरीसँगै सिन्दीरा जोशी आफ्नो अग्रतालाई कायमै राख्न सफल भएकी छन् । उनको ५.५ अंक रहेको छ । उनले पहिलो बोर्डमा सुजना लोहनीसँग बराबरी खेलेकी हुन् ।

 त्यस्तै दोस्रो बोर्डमा खेलेकी शान्ता थापाले मोनालिसा खम्बुसँग बराबरी गर्न सफल भइन् । खम्बु,लोहनी र थापाको समान ४.५ अंक रहेको छ । उनीहरुलाई अनिसा न्यौपाने,अस्मिता अधिकारी,विनिता कपाली र विना जैसवालले पच्छ्याइ रहेका छन् । 

भुपेन्द्रको अग्रता कायमै

९ जेठ,इलाम/  इलाममा जारी १९ औं राष्ट्रिय बुद्धिचाल

प्रतियोगितामा झापा दमकका भुपेन्द्र निरौला (निरज)को अग्रता कायमै रहेको छ । आइतबार दोस्रो राउण्डमा पहिलो बोर्डमा ब्लाकबाट खेलेका उनले पुरुषोत्तम चौलागाईसँग बराबरी खेलेपनि एक अंकको अग्रता कायमै रहेको छ । उनको ५.५ अंक रहेको छ ।

पहिलो राउण्डमा ओलम्पियाड सजिन महर्जनलाई माथ दिएका निरौलाले चौलागाईसँग भने आशातित प्रदर्शन गर्न सकेनन् । चौलागाईले निरौलालाई कडा चुनौति दिएका थिए । निरौलासँग बराबरी खेलेका  चौलागाई र हिमाल लामाको ,तथा सजिन महर्जनको समान ४.५ अंक रहेको छ । दोस्रो राउण्डमा तेस्रो बोर्डमा खेलेका महर्जनले रिजेन्द्र राजभण्डारीलाई पराजित गरेका हुन् ।  तीनै जनाले निरौलालाई पच्छ्याइ रहेका छन् । दोस्रो बोर्डमा खेलेका लामाले पुर्व नेपाल च्याम्पियन नविन तण्डुकारलाइ पराजित गरेका थिए । पराजय भोगे पनि तण्डुकारको ४ अंक रहेको छ । उनीसँगै फिडे माष्टर मनिष हमाल र राष्ट्रिय एमेच्योर च्याम्पियन क्षितिज भण्डारीको पनि ४ अंक रहेको छ । त्यस्तै फिडे माष्टर बिलमलाल श्रेष्ठ र सुमित पन्त समान ३.५ अंकका साथ उनीहरुलाई पच्छ्याइ रहेका छन् । यता अर्का फिडे माष्टर सुजेन्द्र प्रसाद श्रेष्ठ भने झापा दमककै प्रकाश नेपालसँग चित खाएका छन् । यो सँगै एकल अग्रता कायम गरेका भुपेन्द्र माथी च्याम्पियन बन्नका लागि बाँकी तीन खेलमा कम्तिमा एक जित र एक बराबरी गर्नु पर्ने छ । 

प्रतियोगितामा आश गरिएका खेलाडी गणेशमान दुवाल,प्रचण्डमान मालाकार र जनार्दन श्रेष्ठ भने सोचे अनुसारको खेल देखाउन सकेका छैनन् । उता चौथो महिला राष्ट्रिय बुद्धिचालमा भने पुर्व नेपाल चयाम्पियन विना जैसवाल अन रेटेड सुजना लोहनीसँग स्तब्ध भएसँगै यस बर्ष पनि च्याम्पियन बन्ने उनको सपना अधुरै हुने भएको छ । उनको ३ अंक छ भने लोहनीको ४ तथा शिर्ष स्थानमा रहेकी सिन्दिरा जोशीको ५ तथा मोनालिसा खम्बु र शान्ता थापाको समान ४.५ अंक रहेको छ । 

 त्यस्तै संगिता जैसवालको ३.५ तथा विनिता जैसवाल,सुरुचि थिङ र अभा पुडासैनिको समान ३ अंक रहेको छ । पुरुष तथा महिला तर्फ अन्तिम पाँचमा रहने खेलाडी अजरबैजानमा हुने ओलम्पियाडका लागि छनोट हुनेछन् । प्रतियोगिता शिवानी एयरको मुख्य प्रायोजन तथा नेपाल निर्माण व्यवसायी महासंघ र गजुरमुखी निर्माण कम्पनीको सह–प्रायोजनमा भइरहेको छ । होटल समिटको हलमा भइरहेको प्रतियोगितामा सोमबार पनि दुई खेल हुनेछन् ।