चिनियाँ राष्ट्रपति र भारतीय समकक्षीसँग भएको संयोगको भेटले खुसी छु - दाहाल

१ कार्तिक , २०७३  भारतको गोवामा सम्पन्न ब्रिक्स सम्मेलनमा सहभागी भई प्रधानमन्त्री पुष्पकमल दाहाल आज स्वदेश फर्कनु भएको छ । 

प्रधानमन्त्री दाहाल नेपाल एयरलाईन्सबाट अपरान्ह साढे ३ बजे काठमाडौं आईपुग्नु भएको हो । स्वदेश फर्किएपछि त्रिभुवन विमानस्थलमा सञ्चारकर्मीसँग प्रधानमन्त्री दाहालले आफ्नो भारत भ्रमण फलदायी भएको बताउनुभयो । उहाँले चिनियाँ राष्ट्रपति सि जिनपिङ र भारतीय समकक्षी नरेन्द्र मोदीसँग एकसाथ भएको भेट संयोग मात्र भएको भन्दै त्यसबाट आफु निकै खुसी भएको प्रतिक्रिया दिनुभयो ।

यो भेटले नेपाल र नेपालीको शिर उच्च भएपनि विभिन्न टिका टिप्पणीले आफुलाई दुखित बनाएको उहाँको भनाइ थियो । आफू र चिनियाँ राष्ट्रपति सी बीच नेपाल भ्रमण, विगतमा भएको सहमति कार्यान्वयन लगायतका विषयमा कुराकानी भएको दाहालले जानकारी दिनुभयो । त्रिपक्षीय वार्ताका क्रममा आफुले त्रिदेशीय साझेदारी र त्यसबाट नेपालले लाभ लिन चाहेको कुरा उल्लेख गरेको प्रधानमन्त्री दाहालको भनाई थियो । 

संविधान कार्यान्वयन र शान्ति प्रक्रियाबारे कुरा राख्दा भारतीय प्रधानमन्त्री मोदी र चिनियाँ राष्ट्रपति सीले पूर्ण समर्थन हुने बताएको उहाँले दाबी गर्नुभयो । ब्रिक्स सम्मेलनमा सहभागी हुन प्रधानमन्त्री दाहाल नेतृत्वको १८ सदस्यीय प्रतिनीधिमण्डल शनिबार भारत गएको थियो । 

राष्ट्रिय प्रतियोगिताको तयारीमा झापा

उत्तम रिजाल,

२९ भदौ /  आगामी मंसिर ८ गते देखी पुर्वाञ्चलमा शुरु हुने सातौ राष्ट्रिय खेलकुद प्रतियोगिताका लागि झापाले तयारी तिब्र बनाएको छ । प्रतियोगितमा उत्कृष्ट प्रदर्शन गर्दै बढी भन्दा बढी पदक हत्याउने दाउकासाथ उसले तयारी थालेको हो । जसका लागी जिल्ला विकास समितीको आयोजनामा जिल्लका सम्पूर्ण खेलका जिल्ला संघ र प्रशिक्षकहरुको भेला सम्पन्न गरेको छ  । 

भेलाले राष्ट्रिय प्रतियोगिता लक्षित पुर्वाञ्चल क्षेत्रिय प्रतियोगिताका लागि जिल्लाका २१ खेलका खेलाडी छनोट तालिका पनि सार्बजनिक गरेको छ । खेलाडी छनोट यहि भदौ ३१ गते देखी असोज १४ गते सम्म चल्ने छ । जस अन्तरगत भदौ ३१ गते कराँते,असोज एक गते बास्केटबल, ३ गते कुस्ती,६ गते महिला फुट्बल,७ गते आइटिएफ तेक्वान्दो , ८ गते भलिबल, पुरुष फुट्बल, तेक्वान्दो, सुटिङ्ग, उसु र टेबल टेनिस,९गते ब्याडमिन्टन ,१० गते भारत्तोलन र चेस, ११ गते कबड्डी,१३ र १४ गते बक्सीङ्ग र क्रिकेट तथा १४ गते खो खो खेलका खेलाडी छनोट हुनेछन् । छनोट खेल जिल्लाका विभिन्न एघार स्थानमा हुनेछन् । भेला मेची रंगशालामा भएको थियो । 

मछिन्द्रनाथको रथ जावलाखेलमा (फोटो फिचर)

११ श्रावण, २०७३ /  वर्षा र सहकालका देवताका रुपमा पूजिने रातो मछिन्द्रनाथको रथ शुभ साइतमा मंगलबार ललितपुरको लगनखेलबाट तानेर जावलाखेल ल्याइएको छ। नेपालको सबैभन्दा लामो जात्राको रुपमा परिचित मछिन्द्रनाथको रथ जेठ ६ मा लगनखेल पुर्याइएको थियो।

रथ जावलाखेल लगेको चौथो दिन राष्ट्रप्रमुखलाई भोटो देखाएपछि मात्र जात्रा समाप्त हुने परम्परा छ। यो जात्रा काठमाडौं उपत्यकाको सबैभन्दा प्रसिद्ध जात्रा पनि हो। करिब १६ सय वर्ष अघि सुरु भएको मछिन्द्रनाथको रथ जात्रा वैशाख शुक्ल प्रतिपदामा सुरू भएर असार शुक्ल चौथीसम्म करिब दुई महिना चल्छ।

नेवारी परम्परा तथा बाजागाजाका साथ मंगलबार दिउँसो साढे ४ बजे लगनखेलबाट रथ तान्दै करिब साढे ६ बजे जावलाखेल पुर्याइएको गुठी संस्थान ललितपुरका प्रमुख बैकुण्ठ आचार्यले जानकारी दिए।

वि.सं. ५४६ देखि जात्रा शुरु भएको किंवदन्ती छ । यो जात्रालाई सहकालका देवताका रुपमा हिन्दू धर्मवलम्बी र बौद्ध धर्मालम्बीले पनि मनाउँछन् । १२ वर्षसम्म अनिकाल लागेपछि भक्तपुरका तत्कालिन राजा नरेन्द्र देवले यो जात्राको सुरुआत गराएको पौराणिक कथन छ । हिन्दू धर्मावलम्बी मछिन्द्रनाथलाई ऐतिहासिक सन्त गुरु करुणामयको रूपमा पुज्छन् भने बौद्ध धर्मावलम्बी ‘पद्मपाणि’ पञ्चबुद्ध मध्येका चौथो बुद्धका रूपमा पूजा गर्ने गर्छन् ।

ललितपुरको पुल्चोकमा निर्माण गरिएको रथ अक्षय तृतियादेखि शुभ साइत पारी मच्छिन्द्रनाथको रथारोहण गरिन्छ । भगवान मछिन्द्रनाथलाई रथमा विराजमान गराइसकेपछि विधिवत रुपमा रथ यात्रा शुरु हुन्छ। रथ तान्नु अगाडी गुरुज्यूको पल्टनबाट सलामी समेत दिइन्छ । बाजागाजासहित तान्न थालिएको रथ यात्रा पहिलो दिन ललितपुरको पुल्चोकबाट गाःबहालसम्म पुर्याइन्छ। दोस्रो दिन सुन्धारा पुर्याइन्छ भने सुन्धारा पुर्याएको एक दिन रथ सोही स्थानमा राखिन्छ। त्यहाँ भएका स्थानीयहरुले सोही दिन मच्छिन्द्रनाथको पूजा अर्चना गर्छन्।

 त्यसपछि ललितपुरको थटीटोलमा रथ पुर्याएर नरिवल जात्रा निकाल्ने परम्परा छ । जहाँबाट जावलाखेल लैजान ज्योतिषहरुले साइत हेर्दछन्। थटीटोलबाट जावलाखेल लैजाँदा पश्चिम गमन हुने भएकाले साइत हेर्ने परम्परा चलेको गुठी संस्थान प्रमुख आचार्यले जानकारी दिए।

यात्रा जावलाखेलमा पुगेको चौथो दिनमा भोटो देखाएकै दिन रातो मच्छिन्द्रनाथको रथलाई खटमा राखी बुङ्मती पुर्याउनुपर्ने परम्परा रहिआएको छ।  छ महिनासम्म बुङ्मतीमा रथ राखेपछि साइत हेरेर पाटन मच्छिन्द्रबहालमा ल्याइन्छ । यसरी रातो मच्छिन्द्रनाथको रथलाई छ महिना पाटन र छ महिना बुङ्मतीमा राख्ने गरिन्छ।

सरकार परिवर्तन आन्तरिक मामिला - चीन

११ श्रावण, २०७३ /  उत्तरको छिमेकी मुलुक चीनले नेपालको पछिल्लो राजनीतिक परिवर्तनलाई आन्तरिक मामिलाको रुपमा विश्लेषण गरेको छ ।

प्रधानमन्त्री केपी ओलीले राजिनामा घोषणा गरेको पर्सिपल्ट चीनको विदेश मन्त्रालयले नेपालको राजनीतिक घटनाक्रमबारे प्रतिक्रिया दिंदै भनेको छ– ‘यो नेपालको नितान्त आन्तरिक मामिला हो ।’ छिमेकी चीनको विदेश मन्त्रालयका प्रवक्ता लु खाङले नियमित पत्रकार सम्मेलनमा आएको जिज्ञासा मत्थर गर्दै भने, ‘नेपालको राजनीतिक स्थितिको परिवर्तनमा हामीले ध्यान दिएका छौं । छिमेकी र साथीको रुपमा रहेको चीनले नेपालका विभिन्न पार्टीले राष्ट्रिय र जातीय हितलाई प्राथमिकतामा राख्दै स्थिरता र विकासका लागि कोसिस गर्ने हाम्रो आशा छ ।’ उनले नयाँ सरकारले मुलुकको हितलाई सर्वोपरी ठानेर काम गर्नेमा समेत चीन विश्वस्त रहेको बताए ।

चिनियाँ विदेशमन्त्रालयको वेवसाइटमा चिनियाँ भाषामा राखिएको नियमित पत्रकार सम्मेलनको पूर्ण अंशमा एक जिज्ञासा नेपालको पनि थियो । प्रधानमन्त्री ओलीको राजिनामालाई चीनले कसरी लिएको छ भन्ने जिज्ञासामा विदेश मन्त्रालयका प्रवक्ता लुले भने, ‘चीन र नेपाल एकै पक्षमा रहेको र अन्तराष्ट्रिय तथा आ–आफ्नो आन्तरिक स्थितिको जसरी परिवर्तन भए पनि चीन–नेपाल मैत्रीपूर्ण र आपसी सहकार्य तथा सहयोग रणनीतिमा परिवर्तन हुदैन ।’

 सरकारमा जाने तयारीमा रहेका दलका शिर्ष नेताले समेत सत्ता परिवर्तनले चीन नेपाल सम्वन्धमा कुनै असर नपर्ने बताइरहेका बेला चिनिया सरकारबाट समेत चीनको समान धारणा आएको हो । नेपालमा सरकार परिवर्तनको गृहकार्य भइरहदा चीनको विभिन्न तहका नेता तथा उच्च अधिकारीहरु काठमाडौंमा आएर राजनीतिक भेटघाट समेत गरिरहेका थिए । चीनका नेताहरुले पछिल्लो समय नेपाली कांग्रेससँगको सम्वन्धलाई बढि नै जोड दिइरहेका छन् । काँग्रेस र चिनिया कम्युनिष्ट पार्टि बीचको सम्वन्धलाई उचाईमा लैजान दुवै पक्षले महत्व दिइरहेको अवस्थामा सरकार परिवर्तनको प्रक्रिया अघि बढेको हो ।   

अविश्वास प्रस्तावमाथिको छलफलका क्रममा संसदमा बोल्दै कांग्रेस सभापति शेरबहादुर देउवाले प्रधानमन्त्री ओलीको भ्रमणका क्रममा भएका चीनसँग भएका सम्झौता कार्यावन्यनमा आगामी सरकार गम्भिर भएर अघि बढ्ने बताउदै दुवै छिमेकीसंगको सम्वन्धलाई महत्व दिएर अघि बढ्ने बताएका थिए । माओवादी केन्द्रका अध्यक्ष तथा आगामी प्रधानमन्त्रीको दावेदार पुष्पकमल दाहालले पनि चीनसँगको सम्वन्धमा कुनै असर नपर्ने र दुवै छिमेकीलाई बराबर महत्व दिएर अघि बढ्ने बताएका थिए ।

आगामी असोजको अन्त्यसम्म चिनियाँ राष्ट्रपति सी जिनपिङको नेपाल भ्रमण हुने गरि तयारीहरु भइरहेको छ । चिनियाँ प्रवक्ताको पछिल्लो सकारात्मक धारणाले नेपालमा सरकार परिवर्तन भए पनि चिनियाँ राष्टपतिको भ्रमण नरोकिने संकेत गरेको छ । परराष्ट्र मन्त्रालयका अधिकारीहरु ले पनि चीनको तर्फबाट नेपालमा उच्चस्तरको भ्रमण हुनेमा द्विविधा नभएको दावी गरे । नयाँ सरकार बनेपछि भ्रमणको तिथि तलमाथि होला सन् २०१६ को अन्त्यसम्ममा चीनबाट उच्चस्तरको भ्रमण नेपाल तर्फ हुनेछ, ति अधिकारीले बताए ।

ज

बाढीमा फसेकाहरुको हेलिकप्टरबाट उद्दार [फोटो फिचर]

११ श्रावण, २०७३ /  राप्ती नदीमा आएको भिषण बाढीमा फसेका होलिया चौफेरी गाउँका चार सय बढी सर्वसाधारणहरुलाई सेनाको हेलिकप्टर मार्फत उद्दार गरिएको छ । डुबानमा परेका फत्तेपुर क्षेत्रका एक सय बढी सर्वसाधारणहरु बिस्थापित भएका छन् । उद्दार गरिएका चौफेरीका स्थानीयलाई होलियाको सुरक्षित स्थानमा राखिएको छ । फत्तेपुरका बिस्थापितरहरु पनि सुरक्षित स्थानमा सरेका छन् ।

कोरियन भाषा परीक्षाको नतिजा सार्वजनिक

११ श्रावण, २०७३ /  काठमाडौं– रोजगार विभाग अन्तर्गतको इपिएस कोरिया शाखा नेपालसँगको समन्वयमा कोरियाको मानव संसाधन विकास विभागले रोजगार अनुमति प्रणालीअन्गर्तत लिएको कोरियन भाषा परीक्षाको नतिजा सार्वजनिक गरेको छ।

सन् २०१७ मा दक्षिण कोरियाका लागि आवश्यक नेपाली कामदार लैजान गरिएको उक्त परीक्षाको नतिजा एचआरडी कोरियाले मंगलबार सार्वजनिक गरेको हो। नतिजाअनुसार कुल ३ हजार ५ सय १७ जना भाषा परीषामा उत्तीर्ण भएका छन्। यस मध्ये २ हजार १ सय ४० जना कृषि तथा पशुपालनतर्फ र १ हजार ३ सय ७७ जना उत्पादनमूलक उद्योगतर्फ काम गर्न चाहनेहरु रहेको इपिएस कोरिया शाखाका निर्देशक डिल्लीराम बास्तोलाले बताए। यस मध्ये ३ सय ३४ महिला र ३ हजार १ सय ८३ जना पुरुष रहेका छन्।

परीक्षाको नतिजा  http://www.dofe.gov.np  मा हेर्न सकिने छ।

यस नतिजामा उत्तीर्ण भएकाहरुले कामका लागि कोरिया जान स्वास्थ्य परीक्षणमा राम्रो नतिजा आउनु पर्ने हुन्छ। स्वास्थ्य परीक्षणमा सफल हुनेहरुले रोजगार आवेदन फारम भर्न पाउँछन् । त्यस्तै, आफूसँग भएको सीपको परीक्षण गराउन चाहनेले परीक्षण पनि गराउन सक्ने व्यवस्था रहेको उनले बताए। सन् २०१६ का लागि भाषा परीक्षा उत्तीर्ण गरेका ८ हजार ४ सय ९० मध्ये ५ हजार ७ सय जना कोरिया पुगिसकेको उनले जानकारी दिए।

राष्ट्रपतिद्वारा जारी 'बाधा अड्काउ फुकाउ' आदेश स‌ंसदद्वारा अनुमाेदन

११ श्रावण,२०७३ /  राष्ट्रपति विद्यादेवी भण्डारीले मन्त्रिपरिषदको सिफारिसमा जारी गरेको बाधा अड्काउ फुकाउ आदेश मंगलबार व्यवस्थापिका संसदले बहुमतले पारित गरेको छ ।

राष्ट्रपतिले मन्त्रिपरिषदको सिफारिसमा जारी गरेको बाधा अड्काउ फुकाउ आदेश सभामुख औनसरी घर्तीमगरले व्यवस्थापिका संसदमा प्रस्ताव गरेकी थिइन् । प्रधानमन्त्री केपी शर्मा ओलीले आइतबार राजिनामा दिएसँगै नयाँ सरकार गठनका लागि मार्ग प्रशस्त गर्न ओलीले राष्ट्रपति समक्ष बाधा अड्काउ फुकाउ आदेश जारी गर्न सिफारिस गरेका थिए ।

संसदको पहिलो बैठकको विशेष समयमा बोल्दै सांसदहरुले देशका विभिन्न भागमा आएको बाढी पहिरोका कारण कष्टकर समय गुजारी रहेका मानिसहरुका लागि राहतको कार्यक्रम तत्काल ल्याउन सरकारलाई आग्रह गरेका छ । यस्तै सांसदहरुले विपद् व्यवस्थापनका लागि यथेष्ठ तयारी नगरेकोमा पनि सरकारको आलोचना समेत गरेका थिए ।