प्रधानमन्त्रीको राजीनामा स्वीकृत, सरकार कामचलाउ

काठमाडौं— प्रधानमन्त्री केपी शर्मा ओलीले  राष्ट्रपति विद्यादेवी भण्डारी समक्ष दिएको राजीनामा स्वीकृत भएको छ। संविधानको धारा २९८ उपधारा ८ को खण्ड क बमोजिम ओलीले दिएको लिखित राजीनामा राष्ट्रपतिले स्वीकृत गरेकी हुन्।

 

संविधानको धारा १९८ को उपधारा १० बमोजिम अर्को मन्त्रिपरिषद गठन नहुञ्जेलसम्मका यही मन्त्रिपरिषदले कार्य सञ्चालन गर्ने राष्ट्रपति कार्यालयले जनाएको छ।

संविधानको धारा १९८ को उपधारा १० बमोजिम अर्को मन्त्रिपरिषद गठन नहुञ्जेलसम्मका यही मन्त्रिपरिषदले कार्य सञ्चालन गर्ने राष्ट्रपति कार्यालयले जनाएको छ।

मन्त्रिपरिषदले आफ्नो कार्यकालमा सम्पादन गरेका कार्यहरुका लागि प्रधानमन्त्री तथा मन्त्रीहरुलाई राष्ट्रपतिले धन्यावद दिएको राष्ट्रपति कार्यालयका सहायक प्रवक्ताले जारी गरेको विज्ञप्तिमा उल्लेख छ।

दाहालले ओलीलाई भने, ‘राजनेताको परिचय दिनुभयो’

९ श्रावण, २०७३ /   माओवादी केन्द्रका अध्यक्ष पुष्पकमल दाहालले आइतबारदेखि नै कामचलाउ भएका प्रधानमन्त्री केपी शर्मा ओलीले राजनेताको परिचय दिएको प्रतिक्रिया दिएका छन् ।

संसद बैठकमा सम्बोधनसँगै राजीनामा दिएका ओलीलाई संसद भवनस्थित प्रधानमन्त्रीको च्याम्बरमा पुगेर आगामी दिनमा पनि सहकार्य हुने अपेक्षा गरेको बताए । ‘तपाईंले असल राजनेताको परिचय दिनुभएको छ,’ दाहालको भनाइ उद्धृत गर्दै प्रधानमन्त्रीका सञ्चार विज्ञ चेतन अधिकारीले भने, ‘आगामी दिनमा पनि सहकार्य हुने नै छ ।’

जवाफमा प्रधानमन्त्रीले ‘तपाईंलाई पनि आगामी कार्यकालको शुभकामना’ भनेका छन् । दुई नेताले त्यसपछि फोटो खिचाएका थिए । दाहालसँगै प्रधानमन्त्रीको च्याम्बरमा राजीनामा दिएका माओवादी मन्त्रीहरु पुगेका थिए । उनीहरुले पनि प्रधानमन्त्रीसँग तस्बिर खिचाए ।

यसैबीच राप्रपा नेपालका अध्यक्ष एवं उपप्रधानमन्त्री कमल थापाले ओलीलाई ‘असल’ प्रधानमन्त्रीकोरुपमा चित्रण गरेका छन् । ‘देशलाई माया गर्ने असल प्रधानमन्त्रीकोरुपमा केपी ओलीको सम्झना सँधै रहनेछ, तपाईंसँग काम गर्न पाएकोमा खुसी छु । कुनै पछुतो छैन ।’

प्रधानमन्त्री ओलीद्वारा राजीनामा

९ श्रावण , २०७३ /   प्रधानमन्त्री केपी शर्मा ओलीले पदबाट राजीनामा दिएका छन् । संसदमा पेस भएको अविश्वासको प्रस्तावमाथि छलफलको अन्तिम दिन जवाफ दिनुअघि प्रधानमन्त्रीले राष्ट्रपति विद्यादेवी भण्डारीसमक्ष राजीनामा दिएको शीतल निवास स्रोतले जनाएको छ । त्यसपछि संसद भवन पुगेका प्रधानमन्त्रीले केहीबेरपछि राजीनामा घोषणा गर्दैछन् । 

संसदमा सत्तासाझेदार माओवादीकै नेतृत्वमा अविश्वास प्रस्ताव दर्ता गरेपछि अल्पमतमा परेका प्रधानमन्त्रीले संसद फेस गर्ने बताउँदै आएका थिए । संसदमा आफ्ना कुरा राखेपछि प्रधानमन्त्रीले राजीनामा घोषणा गरेका हुन् । आखिरी समयमा सत्तासाझेदार फोरम लोकतान्त्रिक, राप्रपा र समाजवादी जनता दलले पनि समर्थन फिर्ता लिंदै अविश्वासको प्रस्तावको पक्षमा मत दिने निर्णय गरेका थिए ।

ओली असोज २४ गते माओवादी, राप्रपा नेपाल, राप्रपासहितका साना पार्टीको समर्थनमा प्रधानमन्त्री भएका थिए । प्रधानमन्त्री निर्वाचनमा तत्कालिन कांग्रेस सभापति सुशील कोइरालालाई हराउँदै ३ सय ३८ मत ल्याएर निर्वाचित भएका थिए ।

छापामार शैलीमा सरकार परिर्वतनको खेल - प्रधानमन्त्री

९ श्रावण,२०७३, काठमाडौं /  प्रधानमन्त्री केपी शर्मा ओलीले छापामार शैलीमा सरकार परिर्वतनको खेल भएको बताएका छन् ।

आफ्नाविरुद्ध दर्ता भएको अविश्वासको प्रस्तावबारे संसदमा जवाफ दिँदै प्रधानमन्त्री ओलीले सरकारले काम नगरेकाले नभई चिक्त दुखेका र मन फाटेकाले समर्थन फिर्ता लिएको रहेछ भने । प्रचण्डको नाम नलिई उनले अविश्वासको प्रस्ताव प्रस्तोता भन्दै उनले भने, अस्ती कुरा सुनेपछि मलाई लाग्यो, आरोपहरु के छन् सुनेँ । आरोप सुन्दा थाहा भने ममाथिको अविश्वास कामको कारण होइन रहेछ, मन फाटेका, कमलो मन दुखेको, चिक्त नबुझेको आदि कारणले रहेछ ।’

उनले अघि भने, ‘मेले मेरा मित्रको च्यातिएको मन अरुणा लामाको गीतमा भने झै धेरै पटक सिउने कोशिष गरे ।’कहिले साँझ त कहिले रात अबेरसम्म धेरै पटक फाटेको मन तुन्ने काममा विताएको भन्दै उनले भने, ‘भयो के भने आज तुनेर जोडेर पठाउँछु, भोलिपल्ट आउँदा अर्कोतिर फाटेको हुन्छ ।’

प्रधानमन्त्री ओलीले माओवादीले समर्थन फिर्ता लिनु केही दिनअघि प्रचण्डसँग आफ्नो सवा दुई घन्टा कुरा भएको सुनाए । भेटमा आफूले अब कसरी अगाडि जाने भन्नेमा मोडालिटी आओस् भनेका भन्दै उनले अघि भने, ‘उहाँले भोलि पर्सीमा लिएर आउँछु भन्नु भएको थियो । मोडालिटी टेलिफोनबाट थाहा भो समर्थन फिर्ता लिने ।’

नयाँ सरकार गठन गर्न कुनै समस्या छैन : भट्टराई

९ श्रावण , २०७३ /  नयाँ शक्ति नेपालका संयोजक डा. बाबुराम भट्टराईले देशको समृद्धि र विकासको लागि प्रत्यक्ष राष्ट्रपतीय प्रणाली आवश्यक रहेको बताउनु भएको छ । राजनीतिक स्थिरताको लागि पनि प्रत्यक्ष राष्ट्रपतीय प्रणाली आवश्यक रहेको उहाँको दाबी छ । 

प्रेस सोसाइटी पोखराले गरेको पत्रकार सम्मेलनमा उहाँले भन्नुभयो - नयाँ संविधान जारी भएपछि देशले राजनीतिक स्थिरता, विधिको शासन र समृद्धि पाउने जनताले अपेक्षा गरेका थिए, पुराना राजनीतिक दलहरु सत्ताको खेलमा लाग्नु गलत छ । देश र जनताको काम गर्नुपर्ने बेला पार्टी र गुटबन्दीले देशलाई घाटा पुगेको छ । संविधानमा कुनै बाधा अवरोध नभएकाले सरकार बनाउन कुनै अप्ठेरो नभएको तर्क उहाँले गर्नुभयो । तर, आफूहरु सरकार गिराउने र बनाउन खेलमा नलागेको भट्टराईले स्पष्ट पार्नुभयो ।     

सरकार गठन विघटन लोकतान्त्रिक शासन प्रणालीका विशेषता : प्रधानमन्त्री

९ श्रावण, २०७३ /  काठमाडौं–प्रधानमन्त्री केपी ओलीले सरकार गठन विघटन लोकतान्त्रिक शासन प्रणालीका विशेषता रहेको बताएका छन्।

व्यवस्थापिका संसदमा पेश भएको अविश्वासको प्रस्तावमाथिको छलफलमा भाग लिँदै प्रधानमन्त्री ओलीले सरकार गठन विघटन र आवधिक निर्वाचन लोकतान्त्रिक शासन व्यवस्थाका विशेषता रहेको बताएका हुन्।

जनताको सर्वोच्चतामा विश्वास गर्ने, अध्यारो कोठामा नभइ संसदमा विश्वास गर्ने आफ्ना लागि अविश्वासको प्रस्ताव सामान्य रहेको बताए। त्यो प्रक्रियाका हिसाबले सामान्य भएपनि उद्देश्यका हिसाले उचित नभएको बताए। सात दशक लामो बलिदानपूर्ण संघर्ष र दुई वटा संविधानसभाको अनुभवबाट प्राप्त संधिवान कलिलै रहेको भन्दै त्यसलाई बलियो बनाउनुपर्ने बताए। मुलुक आर्थिक समृद्धि देख्न नचाहने र धमिलो पानीमा माछा मार्न पल्केकाप्रति सचेत रहन आग्रह गरे।

नयाँ सरकार बनाउन अवरोध खुल्यो

९ श्रावण, २०७३ /   सरकारले नयाँ सरकार गठन सहज बनाउन राष्ट्रपतिसमक्ष बाधा अड्काउ फुकाउन सिफारिस गरेको छ । 

नयाँ संविधानको धारा २९८ अनुसार नयाँ सरकार गठन गर्न संवैधानिक अड्चन रहेकाले आइतबार बसेको मन्त्रिपरिषद बैठकले धारा ३०५ अनुसार राष्ट्रपतिलाई बाधा अड्काउ फुकाउन सिफारिस गरेको पर्यटन मन्त्री आनन्द पोखरेलले जानकारी दिए ।

संविधानअनुसार नयाँ सरकार बन्नेरनबन्ने रस्साकस्सीबीच सरकारले नै बाधा अड्काउ फुकाउका लागि सिफारिस गरेपछि सरकार गठन सहज भएको छ । नेपालको संविधान २०७२ अनुसार संविधान कार्यान्वयनमा कुनै बाधा अड्काउ परेमा मन्त्रिपरिषदको सिफारिसमा राष्ट्रपतिबाट बाधा अड्काउ फुकाउन सकिनेछ । त्यस्तो आदेशलाई संसदले अनुमोदन गर्नुपर्ने हुन्छ ।