पूर्वराजालाई शुभकामना दिन निर्मल निवासमा मन्त्रीहरुको लर्को

२३ असार, २०७३ / पूर्वराजा ज्ञानेन्द्र शाहको ७०औं जन्मोत्सवको अवसरमा शुभकामना दिन उपप्रधानमन्त्री कमल थापा लगायतका नेताहरु निर्मल निवास महाराजगन्ज पुगेका छन् ।

 

ज्ञानेन्द्रलाई शुभकामना दिन भूमिसुधार मन्त्री रामकुमार सुब्बा पनि निर्मल निवास पुगे ।यसैगरी शुभकामना दिन पूर्व परराष्ट्रमन्त्री रमेशनाथ पाण्डे, पत्रकार युवराज घिमिरे, सञ्चार उद्यमी भाष्करराज राजकर्णिकार लगायत निर्मन निवास पुगेका थिए । 

पूर्व राजा ज्ञानेन्द्रले जन्मोत्सवमा आउने शुभचिन्तकहरुलाई बिहान ११ बजेदेखि भेट दिएका थिए ।

बालबालिकादेखि युवकयुवती र बृद्धबृद्धा समेत शुभकामना दिन निर्मल निवास पुगेका थिए ।

स्वास्थ्य मन्त्रालयका ५२ कर्मचारी बर्खास्त

२३ असार, काठमाडौं / अनुशासन उल्लंघन गरेको अभियोगमा स्वास्थ्य मन्त्रालयले आर्थिक वर्ष ०७२/७३ मा ५२ जना कर्मचारीहरुलाई बर्खास्त गरेको छ । मन्त्रालयले उनीहरुलाई भविष्यमा सरकारी सेवाका लागि समेत अयोग्य ठहर हुनेगरी सेवाबाट बर्खास्त गरेको हो । 

बर्खास्तमा परेकाहरुमध्ये अधिकांश स्टाफ नर्स पेशामा आवद्ध छन् । विना जानकारी ६० दिनभन्दा लामो समय विदामा बसेपछि उनीहरुलाई भविष्यमा सरकारी सेवाका लागि समेत अयोग्य हुनेगरी कारबाही गरेको उपसचिव बाबुराम गौतमले जानकारी दिए । मन्त्रालयले उनीहरुलाई नेपाल स्वास्थ्य सेवा ऐन २०५३ को दफा ७२ ९ख० को उपदफा १ अनुसार कारबाही गरेको हो ।

उक्त व्यवस्थाअनुसार विदा स्वीकृत नगराई लगातार ६० दिनभन्दा बढी अनुपस्थित कर्मचारीलाई भविष्यमा सरकारी सेवाका लागि अयोग्य ठहर हुने गरी सेवाबाट बर्खास्त गर्न सकिनेछ । 

 हेर्नुस् कारबाहीमा परेकाहरुको सूची

मेस्सीलाई स्पेनमा २१ महिना जेल सजाय

२२ असार, काठमाडौं /  स्पेनिस एक अदालतले कर छलीको अभियोगमा बार्सिलोनाका स्टार फुटबलर लिओनल मेस्सीलाई २१ महिना जेल सजाय सुनाएको छ । तर, उनी जेल जानु नपर्ने पनि हुनसक्छ । बार्सिलोनाको अदालतले कर छलीका तीन मुद्धामा मेस्सी र उनका बुबा जोर्जलाई समान २१ महिना पनि जेल सजाय सुनाइएको छ । साथै मेस्सीलाई २ मिलियन र जोर्जलाई डेढ मिलियन जरिवाना पनि तिर्न भनिएको छ । 

मेस्सी र उनका बुबामाथि २००७ देखि ०९ को अवधिमा ४.१ मिलियन युरो बराबरको कर नतिरेको अभियोग छ । मेस्सीको करियर कीर्तिमानी पाँच पटक फिफा बालोन डि’ओर विजेता तीन पटक यूईएफए उत्कृष्ट खेलाडी बार्सिलोनाबाट चार च्याम्पियन्स लिग, ८ स्पेनिस ला लिगाको उपाधि अर्जेन्टिनाका लागि सर्वाधिक ५५ गोल अर्जेन्टिनाका लागि चार फाइनल खेले पनि ठूलो उपाधि दिलाउन असफल हालै मात्र अन्तराष्ट्रिय फुटबलबाट सन्यासको घोषणा तस्वीरको कपिराइटबाट आएको पैसा कर छलेर बेलिज र उरुग्वेमा जम्मा गरेको अभियोनकर्ताको दाबी छ । तर, अदालतमा उपस्थित भएका मेस्सीले यसबारे आफूलाई केही थाहा नभएको बताएका थिए । 

 जेल जानु  नपर्ने !

 स्पेनिस अनलाइन मार्काका अनुसार अदालतले २ वर्ष जेल सजाय सुनाइएपनि मेस्सी जेल जानु नपर्ने देखिन्छ । किनकी स्पेनिस कानुन अनुसार अपराधिक रेकर्ड नभएका व्यक्तिलाई २ वर्षभन्दा कम सजायमा जेल बस्नु पर्दैन । तर, आवधिक रुपमा अधिकारीहरु समक्ष उपस्थित हुनुपर्छ । 

 साथै अदालतको फैसलाविरुद्ध स्पेनको सर्वोच्च अदालतमा पुनरावेदन गर्न सक्नेछन् । बार्सिलोनाले आफ्नो पूर्ण समर्थन मेस्सी र उनको परिवारलाई रहेको बताएको छ ।

१९५० को सन्धि पुनरावलोकन गर्न नेपाल भारत तयार

२१ असार , २०७३ / सन् १९५० को सन्धि पुनरावलोकनका लागि नेपाल र भारत दुवै पक्ष तयार भएका छन् । काठमाडौंमा आज सम्पन्न नेपाल र भारतका प्रबुद्ध व्यक्ति समूह र ईपिजिको बैठक पछि सन् १९५० को सन्धि पुनरावलोकन गर्न तयार भएका हुन् । 

त्यसका लागि दुवै मुलुकका सम्बन्धित क्षेत्रका विज्ञहरुसंग छलफल गरि टुङ्गोमा पुगिने बैठकका सहभागिहरुले बताएका छन् । दुई दिनसम्म चलेको बैठक पछि त्यसको निर्णयबारे जानकारी दिन आयोजित पत्रकार सम्मेलनमा नेपालका तर्फबाट संयोजक भेषबहादुर थापाले जिम्मेवारी पुरा गर्नका लागि कार्यपत्र बनाई अघि बढ्ने निर्णय भएको बताउनु भयो । त्यस्तै, ईपिजिको बैठक प्रत्येक तीन महिनामा बस्ने पनि निर्णय भएको छ ।     

६२ हजार सिरीयाली भोकमरीको चपेटामा

२१ असार, २०७३ /  सिरियामा विभिन्न स्थानमा विद्रोही र सरकारी सेनाको घेराबन्दीमा परेका ६२ हजार भन्दा बढी नागरिक भोकमरीको चपेटामा परेको संयुक्त राष्ट्रसंघले जनाएको छ । इस्लामिक अतिवादी संगठन आइएसको कब्जामा रहेका कतिपय शहर मुक्त गर्ने क्रममा अहिले पनि सरकारी सेना र बिद्रोहीबीचको भिडन्त जारी रहेको छ । 

दोहोरो भिडन्तको चपेटामा परेका ती स्थानका हजारौ नागरिक खाद्यन्न, पानी, स्वास्थ्योपचार लगायतका आधारभुत आवश्यकताको अभावमा बाँचिरहेको राष्ट्रसंघले जनाएको छ । दमास्कसस्थित राष्ट्रसंघको कार्यलयले भोकमरीको मारमा परेका उनीहरुलाई तत्काल मानवीय सहायता उपलब्ध गराउन आग्रह गरेको छ । 

सरकारी र बिद्रोही पक्षको लगातारको आक्रमणका कारण हजारौ सिरीयाली नागरिकले ज्यान गुमाएका छन् भने लाखौ विस्थापित भएका छन् । मुलुकमै रहेकाहरुले अत्यन्तै कष्टकर जीवन बिताइरहेकाले उनीहरुको उद्धार तथा राहतकालागि त्यहाँ कारर्यरत मानवीय सहायता सम्बन्धी संघसंस्थले पनि आपिल समेत गरेका छन् ।

पहिरोले घर पुरिँदा एकै परिवारका पाँच सहित ८ जनाको मृत्यु

 २१ असार,२०७३ /  आज विहान आएको पहिरोले प्युठानमा घर पुरिँदा एकै परिवारका पाँचजनासहित ८ जनाको मृत्यु भएको छ। 

पहिरोले घर पुरिँदा रजवारा–३ नेटाका दुर्गाबहादुर मल्लका एकै परिवारका पाँचजना र पूजा गाविस–३ का हुमबहादुर सुनारका परिवारका तीन जना गरी आठ जनाको मृत्यु भएको जिल्ला प्रहरी प्रमुख किशोर राठौरले जानकारी दिए। 

बिहान घरभित्र सुतिरहेका बेला घरमाथिबाट झरेको पहिरोले घर पुरिएको थियो। पहिरोमा पुरिएर रजवारा –३ नेटाका ४१ वर्षीय दुर्गाबहादुर मल्ल, उनकी श्रीमती ३७ वर्षीया सीता मल्ला, छोरीहरु १० वर्षीया सुशीला मल्ल, चार वर्षीया सिर्जना मल्ल र २ वर्षीया लेखा मल्लको मृत्यु भएको राठौरले बताए। 

प्रहरीलाई घटनाबारे बिहान ५ बजेमात्रै थाहा भएको र प्रहरीको टोली घटनास्थल पुग्न केही समय लागेको उनले बताए। घटनास्थल सदरमुकामबाट ४ घन्टाको दूरीमा पर्छ। 

यसैवीच प्युठानकै पूजा गाविस –३ मा पहिरोले घर पुरिँदा एकै परिवारका ३ जनाको मृत्यु भएको छ। पहिरोले स्थानीय हुमबहादुर सुनारको घर पुरिँदा हुमबहादुरसहित उनकी श्रीमती थसी सुनार र सात वर्षीष छोरी सीमा सुनारको मृत्यु भएको छ। घटनाबारे विस्तृत विवरण भने अझै आउन नसकेको राठौरले वताए। 

आइएसको नेपाल कनेक्सन खोज्दै सुरक्षा संयन्त्र,अन्तर्राष्ट्रिय विमानस्थलमा उच्च निगरानी

 २० असार , २०७३ /  गत शुक्रबार बंगलादेशमा भएको आतंकवादी आक्रमणसँगै नेपाली सुरक्षा संयन्त्रले नेपालमा आइएसको कुनै कनेक्सन छ कि भनि खोज शुरु गरेका छन् । सो घटनाले नेपाली सुरक्षा संयन्त्रमा निक्कै ठूलो चुनौति थपिएको छ । सो घटनाबाट अन्तर्राष्ट्रिय आतंकबादको ट्रान्जिट बन्ने उच्च जोखिममा रहेको नेपाललाई शुरक्षा संयन्त्रको कार्यशैलि परिवर्तन गरी आतंकवादी प्रबेशमा निगरानी बढाउन पनि सचेत गराएको छ। 

सिरिया आन्दोलनका क्रममा दुई वर्ष अघि जन्मिएको इस्लामिक स्टेट आइएसले अति सुरक्षित मानिएको बंगलादेशको राजधानी ढाकास्थित गुलसनमा आफ्नो उपस्थिति देखाउदै शुक्रबार २० जनाको निर्ममता पूर्वक हत्या गरेपछि नेपालमा समेत सुरक्षा सर्तकताका लागि आइतबार गृह मन्त्रालय र सुरक्षा निकाय सक्रिय रहे।

काठमाडौं उपत्यकाका तीनै सुरक्षा निकायलाई शंकास्पद ब्यक्ति र स्थानमा उच्च सर्तकता र निगरानी बढाउन गृह मन्त्रालयले आइतबार नै निर्देशन दिएको छ। छिमेकी देश बंगलादेशमा शुक्रबार भएको आतंकबादी आक्रमणको विषयमा केन्द्रीत रहेर आइतबार बसेको सुरक्षा महाशाखाको बैठकले काठमाडौं उपत्यकामा रहेका राजदुतावास र विदेशी नागरिकको चहलपहल हुने स्थानमा उच्च सर्तकता र निगरानी बढाउन निर्देशन दिएको हो।  

बैठकले नेपाल प्रवेश गरेका तेस्रो देशका नागरिकको क्रियाकलापका विषयमा समेत सूचना संकलन गर्ने निर्णय गरेको छ। त्यस्तै अन्तराष्ट्रिय आतंकबादविरुद्ध सक्रिय रहेका क्षेत्रिय सुरक्षा संगठनसँगको सहकार्यमा अनुसन्धान र निगरानी बढाउने निर्णय पनि गरेको छ।

अन्तर्राष्ट्रिय विमानस्थलमा उच्च निगरानी

काठमाडौं उपत्यका मातहत रहेका तीनै सुरक्षा निकायका प्रतिनिधि उपस्थित रहेको बैठकमा सुरक्षा अवस्था र तत्कालका योजनामा केन्द्रित रहेर छलफल भएको छ । काठमाडौं उपत्यका प्रवेश गर्ने नाका र अन्तर्राष्ट्रिय विमानस्थलमा उच्च निगरानी राख्न गृहले निर्देशन दिएको बैठकमा सहभागी एक अधिकारीले जानकारी दिए ।

गृह मन्त्रालय शान्ति सुरक्षा महाशाखाको नेतृत्वमा नेपाल प्रहरीको महानगरीय प्रहरी कार्यालय, सशस्त्र प्रहरी र राष्ट्रिय अनुसन्धान विभागका प्रतिनिधि बैठकमा सहभागी थिए। महानगरीय प्रहरी आयुक्त एआइजी प्रतापसिंह थापाले सामान्य अवस्थामा भन्दा केही थप सुरक्षा सर्तकता राख्न सबै युनिटलाई निर्देशन दिएको बताए। उनले बंगलादेशको घटनापछि काठमाडौं उपत्यकामा रहेका विदेशी नागरिकलाई सुरक्षा प्रत्याभुति दिन सुरक्षा सर्तकता  बढाउन निर्देशन दिएको जनाए।