पुर्व नेपाल च्याम्पियन सहितका चेस खेलाडी इलाममा, शुक्रबार दुई राउण्ड खेल हुने

 ६ जेठ,इलाम /  १९ औं राष्ट्रिय चेस च्याम्पियनसीपमा सहभागि हुन पुर्व नेपाल च्याम्पियनहरु सहित राष्ट्रिय प्रतियोगिताका लागि छनोट भएका चेस खेलाडीहरु इलाममा आइ पुगेका छन् । पुर्व नेपाल च्याम्पियन केशव श्रेष्ठ,नविन तण्डुकार र मनिष हमाल इलाम आइपुगेका हुन् । 

प्रतियोगिताको औपचारीक उद्घाटन बिहिबार गौतम बुद्ध सभा गृहमा भएपनि खेल भने शुक्रबारबाट मात्र शुरु हुन लागेको हो । उद्घाटन कार्यक्रम अघि विभिन्न झाँकी सहितको र्यालीले इलाम बजार परिक्रमा गरेको थियो । 

उद्घाटन कार्यक्रममा सम्बोधन गर्दै प्रमूख अतिथी तथा नेपाल ओलम्पिक कमिटीका अध्यक्ष जिवन राम श्रेष्ठले चेस खेललाई राज्यले उपेक्षा गरेको गुनासो गरेका थिए । उनले अन्य खेलका लागि सरकारले बजेट छुट्याएपनि चेस खेलको लागि भने अहिले सम्म कुनै काम नगरेको उल्लेख गरेका थिए । उनले चेस खेलको विकासका लागि घर–घरमा चेसको विकास गर्नुपर्ने बताए । उनले अन्तराष्ट्रिय प्रतियोगिताबाट मेडल ल्याउन सक्ने खेलाडी उत्पादन गर्न  नेपाल ओलम्पिक कमिटीले पनि आफ्नो तर्फबाट कार्य गरिरहेको बताए । 

त्यस्तै कार्यक्रमका सभापति तथा नेपाल बुद्धिचाल संघका अध्यक्ष एकलाल श्रेष्ठले चेसबाट देश चिनाउने अभियान नेपाल बुद्धिचाल संघको रहेको भन्दै अन्तिम पाँचमा छनोट हुने पुरुष तथा महिल खेलाडीहरु अजरबैजानमा हुने ओलम्पियाडमा सहभागि हुनपाउने बताए । कार्यक्रममा सबै राजनीतिक दलको प्रतिनिधित्व गर्दै नेपाली कांग्रेस इलामका सभापति हिमालय कर्माचार्य, नेपाल बुद्धिचाल संघका पुर्व अध्यक्ष राजेस्वरी जोशी, राष्ट्रिय खेलकुद परिषदका सदस्य उपेन्द्र पौडेल, इलाम बुद्धिचाल संघका अध्यक्ष याम प्रसाद लिम्बु लगायतले शुभकामना मन्तव्य राखेका थिए । त्यस्तै कार्यक्रममा तेक्वान्दो संघ, उसु संघ र कराँते संघले आफ्नो प्रस्तुति राखेका थिए भने गायक विमल गौतमले चेस सम्बन्धि आफ्नै गित प्रस्तुत गरेका थिए । 

प्रतियोगितामा विभागिय टोलि नेपाली सेना,सशस्त्र प्रहरी बल सहितका गरि पुरुषतर्फ ३५ जना र महिला तर्फ १८ जना प्रतिस्पर्धा गर्दैछन् । नौ राउण्ड सम्म चल्ने प्रतियोगितामा शुक्रबार दुई राउण्ड खेल हुनेछन् । 

चार खेलाडी सम्मानित

५ जेठ, दमक/ राष्ट्रिय बुद्धिचाल प्रतियोगिताका लागि उनीहरुलाई आज दमकस्थित एभरेष्ट बोर्डिङ्ग स्कुलमा एक कार्यक्रम गरी एभरेष्ट बोर्डिङ्ग स्कुल र झापा जिल्ला बुद्धिचाल संघले संयुक्त रुपमा सम्मान गरेका हुन् । उनीहरुलाई नगद सहित सम्मान गरिएको थियो ।
 

स्कुलका तर्फबाट प्रिन्सिपल कोषराज प्याकुरेलले सोहि स्कुलकी छात्रा खुस्बुलाई एक हजार र अन्यलाई पाँच सयसहित सम्मान गरेका थिए । 

त्यस्तै बुद्धिचाल संघले जनही एक हजार र सम्मान पत्रसहित सम्मान गरेको थियो । भुपेन्द्र बाहेकका तीनै खेलाडी गत महिना ललितपुरमा भएको छनोट प्रतियोगिताबाट छनोट भएका हुन् । भुपेन्द्रलाई भने बुद्धिचाल संघको केन्द्रिय सदस्यमा सर्वाधिक मत ल्याइ विजयी भएको र झापाको साख बढाएको भनि सम्मान गरिएको हो । उनी राष्ट्रिय आरविटर तथा क्यानिडेट मास्टर हुन् । 

संघकोतर्फबाट सम्मानित हुनेहरुलाई झापा जिल्ला बुद्धिचाल संघका अध्यक्ष तथा प्रमुख अतिथि विजय बहादुर मावोहाङ्ग, उपाध्यक्ष देबराज गजमेर, सचिब झमक प्रसाद प्याकुरेल र कोषाध्यक्ष सुरज सुब्बाले सम्मान गरेका थिए । 

कार्यक्रम सोहि स्कुलका प्रिन्सिपल कोषराज प्याकुरेलको अध्यक्षतामा सम्पन्न भएको थियो । राष्ट्रिय प्रतियोगिता शुक्रबारबाट शुरु हुदैछ । प्रतियोगिता पुरुषतर्फ १९ औ प्रतियोगिता हो भने महिला तर्फ चौथो हो । झापाबाट छनोट भएका चार खेलाडी सम्मानित भएका छन् । सम्मानित हुनेहरुमा झापा दमकका भुपेन्द्र निरौला निरज, प्रकाश नेपाल, खुस्बु थापा र काँकडभिट्टाकी पुनम प्रसाई छन् ।

RELATED POSTS

• 
  अन्तराष्ट्रिय बुद्धिचालमा भूपेन्द्र तेस्रो
• 
  पुर्व नेपाल च्याम्पियन सहितका चेस खेलाडी इलाममा, शुक्रबार दुई राउण्ड खेल हुने

सूर्यदर्शन कप फुट्बल हुदै

२२ पुस/  झापाको दमकमा सूर्यदर्शन कप फुट्बल प्रतियोगिता हुदैछ ।

विहीबार बाट शुरुहुने सो प्रतियोगिताको फाईनल खेल भने पर्सी शुक्रबार हुनेछ । 

प्रत्येक बर्ष आयोजना गर्दै आएको सो प्रतियोगितामा दश टिमको सहभागिता रहेको छ । 

उद्घाटन खेलमा मोवाईल व्यबसायी र रेडिमेट कपमडा व्यसायीको टिम प्रतिस्पर्धा गर्नेछन् । त्यस्तै दोस्रो खेलमा मुद्रण व्यवसायी र जुत्ता चप्पल,तेस्रो खेलमा यातायात र मेची वितरक तथा मदिरा व्यवसायी , चौथो खेलमा औषधी व्यवसायी र गल्ला किराना प्रतिस्पर्धा गर्दा पाँचौ खेलमा सुनचाँदी व्यवसायी र तयारी पोशाकवीच प्रतिस्पर्धा हुनेछ ।   

अध्यक्षमा पुन दाहाल

१८ पुस,दमक/ चुरे वातावरण संरक्षण पहिला समिति चुलाचुली इलामको अध्यक्षमा पुन निर्मला दाहाल सर्वसम्मत चयन भएकी छन् । शनिबार सम्पन्न चौथो साधारण सभाले उनीसँगै ९ सदस्यीय कार्यसमिती चयन गरेको छ । निर्वाचन मण्डलीका संयोजक प्रदिप चन्द्र राईका अनुसार उपाध्यक्षमा सरस्वती राई,सचिवमा तुलसा काफ्ले,सह—सचिवमा राधा बस्नेत,कोषाध्यक्षमा गीता बस्नेत भएका छन् । त्यस्तै सदस्यहरुमा माया दुलाल,यसोदा लामगादे,राजकुमारी तामाङ्ग,नन्दमाया सुवेदी चयन भएका छन् । अन्य दुई सदस्य भने पछि चयन गर्ने जनाइएको छ ।  सो समितीको सल्लाहकार समितीको संयोजक भने प्रदिप चन्द्र राई चयन भएका छन् । सात सदस्य रहेको सल्लाहकार समितीको सह–संयोजकमा डिल्लीराम चापागाई,सदस्यहरु देव बस्नेत,भिम नाथ भट्टराई,सन्त बहादुर विक,सोमनाथ अधिकारी र गीता भण्डारी चयन भएका छन् ।

बाह्र खेलाडीलाई फष्ट डान

१७ पुस,दमक/ सगरमाथा मल्टि मार्सलका १२ खेलाडीलाई फष्ट डान प्रदान गरिएको छ ।

उनीहरुलाई नेपाल राष्ट्रिय तेक्वान्दो महासंघका महासचिव राजकुमार कार्कीले सो टाइटल प्रदान गरेका हुन् । 

एकेडेमीले एक कार्यक्रमको आयोजना गरी उनीहरुलाई आज उक्त टाइटल प्रदान गरेको हो ।

टाइटल पाउनेहरुमा मन बहादुर कट्वाल,मिलन खतिवडा,टिका पराजुली,विरेन चौधरी,निरज चौहान,संदेश राई,महेश कुमाल,दिपर्शन पाण्डे,मन्दिप राई,निशान राई,आशा राई र यादव चौधरी रहेका छन् । कार्यक्रममा एकेडेमीका संस्थापक अध्यक्ष तथा पुर्व राष्ट्रिय खेलाडी दीपक धिमालले विश्वका कुनैपनि प्रतियोगिताबाट मेडल ल्याउने उदेश्यले एकेडेमी स्थापना गरेकाले एकेडेमीले अझै धेरै गर्न बाँकी रहेको बताए । उनले आफ्ना खेलाडी निकट भविष्यमै अमेरिका,बेलायत,क्यानडा जस्ता मुलुकमा प्रतिस्पर्धाका लागि जाने बताए ।

दमकमा टोपी दिवस मनाइने

दमक/ राष्ट्रिय टोपी दिवसको अभियान अन्तरगत दमकमा टोपी रयाली निकालीने भएको छ । जनवरी १ तारीक अर्थात मंसिर १७ गते शुक्रबारका दिन राष्ट्रिय टोपी दिवसको अभियान अन्र्तगत रयालिको आयोजना गर्न लागिएको हो । जिवन चत्र समाज नेपालको आयोजनामा हुन लागेको सो रयालीमा टोपी सहित सहभागिहुन आयोजकले सबैलाई आग्रह गरेको छ । मंसिर १७ गते विहान ७ बजे दमकको गणतन्त्र चौकमा कार्यक्रमको अयोजना गरिएको समाजका अध्यक्ष गणेश गौतमले जानकारी दिए । युवा पुस्ताहरुमा टोपीको महत्व घटदै जाँदा राष्ट्रिय पहिचान माथिनै संकट उत्पन्न भएको भन्दै सो दिन मुलुकका बिभिन्न स्थानमा कार्यक्रमको अयोजना गरिदै आएको छ ।

न्यानो कपडा वितरण

१४ पुस,दमक/  नेपाली कांग्रेस तोपगाछी गाँउ समितिले मंगलबार स्वीटर वितरण गरेको छ । कमला मदन आश्रित स्मृती उच्च मावि तोपगाछी ८ का विद्यार्थीहरुलाई न्यानो कपडा स्वीटर वितरण गरेको हो । पार्टीले गएको तिहारमा संचालन गरेको देउसी भैलो कार्यक्रमबाट प्राप्त सहयोगको केहि रकमले विपन्न, दलित तथा सिमान्तकृत समुदायका २० जना बालबालिकाहरुलाई स्वीटर वितरण गरेको हो । वितरण कार्यक्रममा नेपाली कांग्रेसका तर्फबाट समानुपातिक सांसद महेन्द्रा कुमारी सुब्बाको प्रमुख उपस्थिती रहेको थियो । सो अवसरमा सांसद सुब्बाले मुलुकको आमुल परिवर्तनको मुख्य थलो शिक्षा क्षेत्र राजनीति मुक्त हुनपर्ने बताइन । आजका बाल बालिका भोलीको समुन्नत समाज निर्माणका संम्बाहक भएकाले उनिहरुलाई समय अनुकुल शिक्षा आवश्यक रहेको बताइन । नेपाली कांग्रेस गाँउ समिति सभापति पूर्णमान श्रेष्ठको सभापतित्वमा सम्पन्न सो कार्यक्रमा विद्यार्थीहरुले नृत्य समेत प्रस्तुत गरेका थिए । गाउँ समिति सचिब लोकनाथ खनालले स्वागत गरेको कार्यक्रमा महासमिति सदस्य राजन बहादुर ढुङाना, झापा बाणिज्य संघ तोपगाछी शाखा अध्यक्ष पृथ्वीध्वज डाँगी, प्याब्सन झापाका कोषाध्यक्ष गौरीमान फागो विद्यालयका प्रधानाध्यापक हिम प्रसाद दाहाल, नेपाली कांग्रेस क्षेत्रिय प्रतिनिधि जिवन न्यौपाने लगायतले बोलेका थिए ।