माओवादी केन्द्रद्धारा वाइसीएल गठनलाई तिब्रता

दमक/ नेकपा माओवादी केन्द्रले योङ्ग कम्युनिष्ट लीग वाइसीएल गठनलाई तिब्रता दिएको छ । उसले आज मात्र झापाको गौरादहमा धर्म चौहानको अध्यक्षतामा ४१ सदस्यीय कमिटी गठन गर्नेगरि २७ सदस्यीय गौरादह नगर कमिटी गठन गरेको छ । 

युवा नेता बीरेन्द्र बस्नेतको प्रमुख आतिथ्यमा भएको भेलाले सो कमिटी गठन गरेको हो । कमिटी गठनपछि प्रमुख अतिथि बस्नेतले नेकपा सनक र रहरमा बनेको हैन नेपालका कम्युनिष्टहरुको एउटै केन्द्र निर्माण गर्ने ऐतिहासिक आवश्यकताका आधारमा भएको प्रतिक्रिया दिनुभयो ।

उहाँले नेपालका इमान्दार कम्युनिस्टहरुलाई एउटै केन्द्रमा ल्याउने आभियानमा निरन्तर लागिने समेत बताउनु भयो। त्यस्तै उहाँले भन्नुभयो –केपी ओली विगठन तिर र हामी ध्रुवीकरण तर्फ छौं । 

कार्यक्रममा नेताहरु दुर्गा चौलागाईं , पुष्प ढकाल, हुकुम सिह नेपाली डण्डिराज घिमिरे , कुमार खतिवडा लगायतको उपस्थिति रहेको थियो । 

दमकका चोक चोकमा दीप प्रज्वलन

 

राष्ट्र निर्माता श्री ५ बडामहाराजधिराज पृथ्वी नारायण शाहको सम्झनामा आज झापाको दमकका विभिन्न चोकहरुमा दीप प्रज्वलन गरिएको छ ।

दमकको डाँफेमुनाल चोक तथा इलाका प्रहरी कार्यालय अगाडीको चोकमा पहिलो पाईला नेपालको टिम तथा अन्य राष्ट्रवादीहरुको समुहले दीप प्रज्वलन गरेको हो ।

सो अबसरमा पहिलो पाईलाका अध्यक्ष दीपक खड्का, उपाध्यक्ष निशा घिमिरे, शुरेश बराल, सचिव मेघनाथ फुयाँल लगायतको उपस्थिति रहेको थियो । त्यस्तै शाही शक्तिका पुर्वाञ्चल प्रमुख लिप्सन बास्तोलासहितको उपस्थिति रहेको थियो भने अर्जुन रेग्मी, भवानी सुवेदी, उमेश लामा, रेवत बस्नेत लगायत राष्ट्रवादीहरुको पनि सहभागिता रहेको थियो ।

दमक चोकमा करिब एक सयको उपस्थिति रहेको थियो भने इप्रका अगाडीको चोकमा पहिलो पाईलाका सदस्यहरुको मात्र उपस्थिति रहेको थियो । आज देशभर नै २ सय ९९ औं राष्ट्रिय एकता तथा पृथ्वी जयन्ती राष्ट्रवादीहरुले मनाएपनि सरकारले भने कुनै कार्यक्रम गरी मनाएन् । त्यस्तै अन्य राजनीतिक दलहरुले पनि कार्यक्रमको आयोजना गरेनन् ।

महिलालाई आत्मरक्षाको तालिम दिंदै लियो क्लब

 

दमकमा सामाजिक कार्यमा सक्रिय रहेका युवाहरुको एक समुहले महिलामाथी हुने हिंसाका विरुद्ध शसक्त बनाउन आत्मरक्षाका लागि तालिम दिने भएका छन् । लियो क्लब अफ दमकले सो तालिमको आयोजना गरेको छ । 

तालिमले महिलाहरुले आफ्नो सुरक्षा आँफै गर्न सक्ने कलाको विकास गर्ने सो क्लबका अध्यक्ष प्रबेश बास्ताकोटीले जानकारी दिनुभयो । क्लबले आज एक कार्यक्रमको आयोजना गरी पत्रकार सम्मेलन मार्फत यसको जानकारी दिएको हो ।

सो मार्शलआर्ट तालिम ७ दिनको हुने र आगामी माघ ११ गतेबाट शुरु गरिने पनि अध्यक्ष बास्ताकोटीले जानकारी दिनुभयो । त्यस्तै क्लबले यो जाडोलाई मध्यनजर गर्दै विभिन्न कपडा व्यवसायीहरुबाट न्यानो कपडा पनि संकलन गर्दै आएको बास्ताकोटीले जानकारी दिनुभएको छ ।

उहाँका अनुसार संकलन गरिएका कपडाहरु अति विपन्न परिवारका लागि उपलब्ध गराईनेछ । साथै क्लबले दुर्घटना न्युनिकरणका लागि २ सय कुकुरलाई बेल्ट लगाउने र खाना खुवाउने कार्यक्रम पनि तय गरेको छ । यद्यपी सो कार्यक्रमको मिति भने तय भइनसकेको बास्ताकोटीले जानकारी दिनुभयो ।

यसअघि दमकका ४ सय कुकुरलाई बेल्ट लगाइएको पनि उहाँले जानकारी दिनुभयो । क्लबले स्थापनादेखि नै विभिन्न सामाजिक कार्य गर्दै आएको छ । पत्रकार सम्मेलनमा क्लबका विभिन्न पदाधिकारीहरुको सहभागिता रहेको थियो ।

विर्तामोडलाई पाखा लगाउँदै बेलबारी फाईनलमा

विर्तामोड युनाईटेडलाई पाखा लगाउँदै मोरङ्गको नर्थ राधानगर फुट्बल क्लब झापाको दमकमा जारी दुम्सेली नक आउट फुट्बल प्रतियोगिताको फाईनल प्रबेश गरेको छ । उसले विर्तामोड माथी एक शुन्यको जीत निकालेको हो ।

निक्कै नै प्रतिस्पर्धात्मक रहेको खेलमा विजयी टिमका लागि म्यान अफ दि म्याच विवेक पौडेलले निर्णायक गोल गरे । जर्सी नम्बर ७ का पौडेलले दोश्रो हाफको १७ औं मिनेटमा गोल गर्दै टिमलाई अग्रता दिलाएका थिए । त्यसपछि एक शुन्यले पछि परेको विर्तामोडले खेलमा उत्कृष्ट प्रदर्शन गरेपनि गोल गर्न नसक्दा प्रतियोगिताको सेमिफाईनलबाटै बाहिरीएको छ । भोली अन्तिम सेमिफाईनलमा आयोजक चुलाचुली फुट्बल क्लब र फुलबारी स्पोर्टिङ्ग क्लब धरमपुर आमने–सामने हुने खेल संयोजक अनिस बस्नेतले जानकारी दिनुभयो । दमक–३ स्थित चुलाचुली खेल मैदानमा जारी सो प्रतियोगिताको विजेताले नगद २५ हजार र उप–विजेताले नगद १५ हजारसँगै ट्रफी हात पार्ने छन् । प्रतियोगितामा झापा र मोरङ्गका गरी १२ टिमको सहभागिता रहेको छ ।

वाईएफसी पथरीलाई एक शुन्यले पाखा लगाउँदै आयोजक सेमिफाईनलमा

 वाईएफसी पथरीलाई एक शुन्यले पाखा लगाउँदै आयोजक चुलाचुली फुट्बल क्लब झापाको दमकमा जारी दुम्सेली नक आउट फुट्बल प्रतियोगिताको सेमिफाईनल प्रबेश गरेको छ । 

विजयी टिमका लागि म्यान अफ दि म्याच मल्दिनो आङ्गथुपोले निर्णायक गोल गरे । उनले पहिलो हाफको ५ औं मिनेटमा पेनाल्टि मार्फत गरेको गोल नै अयोजकलाई सेमिफाईनल पुग्न पर्याप्त भयो ।

खेलको शुरुवातमै एक शुन्यले पछि परेको वाईएफसीले गोल गर्ने थुप्रै अबसर पाएपनि सदुपयोग गर्न नसक्दा प्रतियोगितामा उत्कृष्ट खेल प्रदर्शन गरेपनि क्वाटरफाईनलबाटै घर फर्किएको छ ।

जितसँगै आयोजकले अब अन्तिम दुई प्रबेशका लागि फुलबारी स्पोर्टिङ्ग क्लब धरमपुरसँग प्रतिस्पर्धा गर्नेछ । भोली प्रतियोगिताको पहिलो सेमिफाईनलमा विर्तामोड युनाईटेड झापा र बेलबारी फुट्बल क्लब मोरङ्ग आमने–सामने हुने खेल संयोजक अनिस बस्नेतले जानकारी दिनुभयो ।

दमक–३ स्थित चुलाचुली खेल मैदानमा जारी सो प्रतियोगिताको विजेताले नगद २५ हजार र उप–विजेताले नगद १५ हजारसँगै ट्रफी हात पार्ने छन् ।

रियललाई पाखा लगाउँदै चात्यासा क्वाटर फाईनलमा

 

झापा, ४ पुस/  रियल स्टार फुट्बल क्लबलाई टाइब्रेकरमा ४–३ ले पाखा लगाउँदै चात्यासा फुट्बल क्लब झापाको दमकमा जारी दुम्सेली नक आउट फुट्बल प्रतियोगिताको क्वाटर फाईनलमा प्रबेश गरेको छ ।

निर्धारीत समय सम्म १–१ को बराबरी भएपछि भएको टाईब्रेकरमा चात्यासाले बाजी मारेको हो । उसका लागी सन्देश केसी, श्याम श्रेष्ठ, राहुल लिम्बु र प्रविन राईले गोल गरेका थिए ।

उता पराजित रियलका तर्फबाट अबिन लिम्बु, बिकास लिम्बु र बिकास माझीले गोल गरे । उसका रोशन धिमालको प्रहार भने चात्यासाका गोलरक्षक योगेश धिमालले बिफल तुल्याएसँगै चात्यासाले अन्तिम आठमा आफ्नो स्थान पक्का गरेको हो ।

यसअघि खेलको ३२ औं मिनेटमा गोल गर्दै प्रबिन राईले चात्यासालाई अग्रता दिलाएका थिए भने किस्मत लिम्बुले दोश्रो हाफको १८ औं मिनेटमा गोल गरेपछि निर्धारित समय सम्म खेल बराबरीमा सकिएको थियो ।

खेलको म्यान अफ दि म्याच विजयी टिमका गोलरक्षक योगेश धिमाल भए । चात्यासाले अब अन्तिम चार प्रबेशका लागी विर्तामोड युनाईटेडसँग बुधबार प्रतिस्पर्धा गर्नेछ ।

भोली भुट्निज युथ क्लब र वाईएफसी पथरीबीच खेल हुने खेल संयोजक अनिस बस्नेतले जानकारी दिनुभयो । प्रतियोगिताको विजेताले नगद २५ हजार हात पार्ने छ भने उप–विजेताले नगद १५ हजार प्राप्त गर्नेछ । प्रतियोगिताको आयोजना चुलाचुली फुट्बल क्लब दुम्सेले गरेको हो ।

फुलबारी क्लबको विजयी शुरुवात

झापा, ३ पुस/   धरमपुरको फुलबारी स्पोर्टिङ्ग क्लबले झापाको दमकमा जारी दुम्सेली नक आउट फुट्बल प्रतियोगितामा विजयी शुरुवात गरेको छ । दमक–३ स्थित चुलाचुली खेल मैदानमा जारी प्रतियोगितामा उसले मोरङ्गको इष्ट स्टार स्पोर्टिङ्ग क्लब मधुमल्लालाई ३–१ ले पराजित गर्दै विजयी शुरुवात गरेको हो ।

 विजयी टिमका लागि सुमन लिम्बु, अमन लिम्बु र पृतम लिम्बुले गोल गरेका थिए । जर्सी नम्बर ११ का सुमनले ७ औं मिनेटमा गोल गर्दै टिमलाई अग्रता दिलाएका थिए भने जर्सी नम्बर १५ का अमनले २४ औं र जर्सी नम्बर ९ का पृतमले दोश्रो हाफको २१ औं मिनेटमा गोल गरेका थिए । 

पराजित टिमकातर्फबाट जर्सी नम्बर ३ का प्रबेश बस्नेतले पहिलो हाफको २३ औं मिनेटमा गोल गरेका थिए । खेलको म्यान अफ दि म्याच विजयी टिमका जर्सी नम्बर ६ का आशिष लावती घोषित भए । जीतसँगै फुलबारी प्रतियोगिताको क्वाटर फाईनल प्रबेश गरेको छ ।

 अब उसले अन्तिम चार प्रबेशका लागि मंगलबार गछिया फुट्बल क्लब मोरङ्गसँग प्रतिस्पर्धा गर्नेछ । शनिबार रियल स्टार फुट्बल क्लब र चात्यासा फुट्बल क्लबबीच खेल हुने खेल संयोजक अनिस बस्नेतले जानकारी दिनु भयो । 

प्रतियोगिताको विजेताले नगद २५ हजार हात पार्ने छ भने उप–विजेताले नगद १५ हजार प्राप्त गर्नेछ । प्रतियोगिताको आयोजना चुलाचुली फुट्बल क्लब दुम्सेले गरेको हो ।